Ester 8 - Old Testament Quechua Wanca（QVW）

Israelcunäpa allinninpämi mandacüca camachin

1Chay muyunllam israelcunäta ćhïnicü Amanpa wasinta, mandacü Asuero walmin Esterman uycula. Mardoqueo ayllun caśhanta Ester willaycuptinmari, mandacücäpa ñawpäninman Mardoqueocta yaycachila.

2Mandacücäñatacmi Amanpi cutichicuśhan surtijanta Mardoqueomanña uycula. Jinaman Esterpis chay Amanpa lluy cänincunacta licaycunanpämi Mardoqueop maquiman ćhulaycula.

3Chaypïta Ester yapañatacmi mandacücäman cutiycul ćhaquinman macallacuycul waꞌayninpa-cama mañacula, israelcunäta camacaycunanpä Agag caśhta Aman lulachishan camachicuyta mana caśhanman muyuchinanpä.

4Chayćhu mandacücäñatacmi aptiläśhan üru bäranta Esterman chacchaycula. Jinaptinmi Ester śhalcuculcul nin:

5“Mandacü taytallay, cay nishäca, luläśhäca śhunꞌuyquipänu captinꞌa, jinaman rasunpa cuyamalꞌa lluy mandacuyniquićhu cä lluy israelcunäta wañuchinanpä, Agag caśhta Hamedatapa chulin Aman camachishanca, mana caśhanman muyuchisha cananpäri papilman isquirbichiy.

6¿Imanuypamá malcá, ayllücuna camacaycuśha cananta licapayäman?” nil.

7Niptinmi walmin Estertawan Israel lädu Mardoqueocta mandacü Asuero nin: “Israel läducunäta ćhïnï Amanta walcächïñam. Lluy ima cänintapis Estermanñam uycülú.

8Cananñatac am Israel läducunäpä allinniquipä imactapis isquirbiycäliy, camachisha cananpä. Jinalcul yaꞌap śhutïćhu surtijäwan sïllaycäliy. Mandacücäpa śhutinćhu isquirbiycul surtijanwan sïlläśhactá manañamá ipaman mayanpis cutichinmanñachu” nil.

9Niptinmi mandacücäpa isquirbïnincuna ayachisha cala quimsa quilla Sivan nishanćhu, ishcay ćhunca quimsayu (23) muyunninćhu. Chayćhümi Mardoqueo lluy Israel läducunäpä, malcap puydïnincunapä, chay India lädupïta aśhta Etiopia läducama paćhac ishcay ćhunca anćhishniyu (127) malcancunap puydïnincunap allinninpä isquirbiycachila. Chay camachicuyca lluy malcacunäpa limayninmannu-cama, isquirbipäcuśhanmannu-camamá cala; chaynütac israelcunäpäpis limayninmannu, isquirbipäcuśhanmannu-camamari lulaśha cala.

10Jinalculmi mandacü Asuerop śhutinta ćhulaycul, surtijanwan sïllaycul camachicuyta apachila, mandacücäpa sumä päliyä ishpisha-cama cawalluncunawan silläcuśha-camacta.

11Chay camachicuyćhümi mandacüca niña: “Israel läducuna, may malcaćhu yaćhapäculpis juntunacuycul difindiculcänayquipämi yaꞌa camaycachí. Wañuchishüniqui śhamücunätapis chulintinta walmintinta-camactam camacaycülälinquiman, wañülächinquiman, pampaman muyülächinquiman; jinaman lluy ima cänincunactapis apaculcanquimanmari.

12Cay camachishäca jinantin mandaśhá malcacunäćhümi Adar quillap ćhunca quimsayu (13) muyuncäćhu lulaycuśha canꞌa” nil.

13Chay camachicuypa cupyantañatacmi jatućhä tacsha malcacunäman lisichipäcunan cala. Chayćha lluy israelcunaca ćhïnicünincunacta cutichiculcänanpä listu capäcunan cala.

14Chaynu mandacüca nishanmannümi caćhaśhancunaca päliyä cawalluncunawan sillacälälisha pasaculcan. Chay camachicuyca palasyu caśhan quiquin Susa malcaćhüpis willacachishamari cala.

15Mardoqueoñatacmi mandacüpa muräduwan yulä müdananwan müdacüśha, ürupi curunanwan ćhulacüśha, yana-nilä puca allinnin lïnupi cä capütanwan müdacüśha palasyupi yalämun. Chay Susa malcäćhümi jinantin nunacunaca cushicuypi lüyacuyalcan.

16Chaynu israelcunäpa śhunꞌunpis achicälunmi, sumä-sumämi cushicälälin, altuman juluycuśham capäculapis.

17Mandacüca camachishan may malcamanpis ćhäśhancäćhuꞌa israelcunaca sumä-sumä cushiculcalmari cumbiducunacta lulacaycälil fistachaculcäla. Jinaman israelcunäta manchaculcalmá juc caśhta nunacunäpis Israel lädumanlä muyupäcula canpis.