Jeremias 42 - Old Testament Quechua Wanca（QVW）

Tayta Diosta mañacunanpämi Jeremiasta nipäcun

1Ñatac Careap chulin Johanan, Osaiaspa chulin Azariasmi pilyäcunäpa puydïnincunawan, jinantin malcäwan uchuyllapis yaśhacunäpis aśhuycapäcula Jeremiasman.

2Chayćhümi willacü Jeremiasta nipäcun: “Ama chaynu caychu uyaliycälillämay. Yaꞌa quïdäcunäpi Tayta Diosniquita mañacullay. Licaśhayquinüpis puntacta achcam capäculá; cananñatacmi licachillapäña quïdälälí.

3Tayta Diosniquitari mañacullay, mayninpa lipäcunäpä, imacta lulapäcunäpä tantiaycälichimänanpä” nil.

4Nipäcuptinmi willacü Jeremias nin: “Uyaliycälicñam. Nipämäśhayquitanüllamá Tayta Diosniquita mañacuśhä. Pay nimäśhallantamá imactapis mana pacaycullal willaycälishayqui” nil.

5Niptinmi nipäcun: “Amwan willachimäśhanta munal mana munalpis yaꞌacuna lulaycälishämi; mana lulaycäliptí Tayta Dios mućhuycälichimächun.

6Tapuchipäcuśhá Tayta Diosninchic nipämäśhantam śhunꞌüpä captinpis ütac mana captinpis lulapäculläśhä. Tayta Diosninchicta cäsuculcaptïmá imapis allin caycunꞌa” nil.

7Mañacuśhanpi ćhunca muyun pasäluptinmi Jeremiasta Tayta Dios limapäla.

8Jinaptinmi Jeremias Careap chulin Johananta, paywan cä pilyäcunäpa puydïnincunacta, jinaman uchuyllanpïta yaśhannincama jinantin nunacunäta ayächin.

9Jinalculmi nin: “Amcuna mañapämäśhayquimannu mañacuptïmi Israelpa Tayta Diosnin niman:

10‘Cay allpällaćhu quïdaculcaptiquiꞌa yaꞌa quiquïmi śhalcachipäcuśhayqui; manañamá pampaman muyuchipäcuśhayquichu. Tacyaycälichishayquimá; manañamá julupäcuśhayquiñachu. Amcunacta sumä ñacachiśhäpïtamari śhunꞌú nanaycaman.

11Babiloniap mandacüninta amcuna manchaculcanquimá. Ñatac manamá manchaculcänayqui canchu, paypa maquinpïta yaꞌa Tayta Dios salbaycunacpä, libraycunacpä cayaptiꞌa.

12Amcunacta llaquipaycälishayquimá. Chaynütacmi Babiloniap mandacüninpis llaquipaycälishunqui allpayquiman manaña cutipäcul quïdaculcänayquipä’ nil.

13“Ñatac amcuna Tayta Diosniquita mana cäsuculcal cay allpaćhu quïdayta mana munapäcul:

14‘Egiptocta licuśhun. Chayćhu manañam wañuchinacuyta, gïrrapä curnitilla tucayta uyalishunñachu, nïtac micuy wanaywanpis wañuśhunñachu’ nil nipäcunqui.

15Chayurá cay Juda lädućhu quïdäcuna Tayta Dios nishanta uyalipäcuy. Israelpa sumä munayniyu Tayta Diosninmari nin: ‘Sïchuśh Egiptoćhu yaćhapäcunayquipä liyta wañupaculcanqui,

16chayurá chay sumä manchaculcäśhayqui gïrramá chay Egiptoćhu chalälälishunqui; micuy wanay manchacuśhayquimari chaycama atïlälishunqui. Chaymari chayćhu wañupäcunqui.

17Egiptoćhu yaćhayta wañupacücunaca chayćhümá gïrrawan, micuy wanaywan, ishyaywan wañupäcunꞌa. Manamá jucllayllapis quïdapäcunꞌachu; nïtac mayanllapis mućhuchicuy caćhamunäpïta ayipäcunꞌachu’ nil.

18“Israelpa sumä munayniyu Tayta Diosninmari nin: ‘Maynümi piñacülul Jerusalenćhu cäcunäta camacaycülá, chaynümi amcuna Egiptoman liculcaptiquiꞌa piñacuynïwan camacaycälälishayqui. Chayurá mana allinpä licaśhañamá capäcunqui; mana cäpä licaśha pinꞌayćhüñamari capäcunqui. Cay sityucta manañamá imaypis licapäcunquiñachu’ nil.

19“Chayurá Judaćhu am quïdäcunätamari Tayta Dios niyalcäśhunqui Egiptoman manaña lipäcunayquipä. Sumätari uyalipäcuy, yaꞌami anyapayalcac.

20Am quiquiquicunamá mana allinniquita ashiculcälanqui: ‘Yaꞌacunapi Tayta Diosnïta mañacuy. Imacta lulay nipämäśhantapis willaycälimay jinalla lulaycälinäpä’ nil nipämäśhayquiwan.

21Cananñatacmi Tayta Dios nimäśhanta niycäliptí amcuna mayannintapis cäsuculcayta mana munapäcunquichu.

22Chay yaćhayta wañupacuśhayqui Egipto lädućhümi gïrrawan, micuy wanaywan, ishyaywan wañupäcunqui” nil.