Daniel 2 - Old Testament Quechua Wanca（QVW）

Mandacü Nabucodonosorpa suyñuśhantam Daniel tantiachin

1Ishcay wataña Nabucodonosor mandacuyalmi suyñuyninćhu imaymanacta suyñucülul jucmanyacüla. Jinalmi puñuytapis manaña talilachu.

2Chaymi licacücunäta, tantiäcunäta, musyäcunäta, uyllurcunawan licacücunäta ayachila chay suyñuśhanca imapä caśhantapis tantiaycunanpä. Chaymi paycuna mandacüca caśhanman lipäcula.

3Chayćhümi mandacüca nin: “Suyñucuśhäca ima ninantapis mana yaćhalmi umapis muyüśha cacuyällá” nil.

4Niptinmi uyllurcunawan licacücunaca arameo limayćhu nicuyalcan: “Mandacü taytallay, wiñaypa cawsay. Cay nunallayquicunaman imam suyñucuśhayquita willaycälimay, imapä caśhantapis niycälinacpä” nil.

5Niptinmi mandacüca nin: “Imanuy canantapis pinsälüñam. Imacta suyñucuśhätapis mana willaycälimaptiquiꞌa, jinaman ima ninantapis mana niycälimaptiquiꞌa uchuy-uchuyllactam lluy cuchülächishayqui; wasiquicunapis pampaman muyüchisham canꞌa.

6Ñatac ima suyñucuśhäta niycälimaptiqui, jinaman imapä caśhantapis niycälimaptiquim ichá rigälucunacta uycälishayqui, imaćhüpis yanapaycälishayqui, altumanpis juluycälishayqui. Chayurá má, willaycälimayꞌari ima suyñuśhätapis, imapä caśhantapis” nil.

7Niptinmi yaćhäcunaca yapañatac nicuyalcan: “Taytallay, suyñuśhayquita cay nunallayquiman willaycälimaptiquiꞌa imapä caśhantapis niycälishayquim” nil.

8Niptinmi mandacüca: “Imanuy cananpä pinsaśhäta amcuna tuquicta yaćhalmá dimurayalcächimanqui jinalla.

9Ima suyñuśhätapis mana niycälimaptiquiꞌa ima alcaśhuśhayquitapis yaćhayalcanquiñamá. Amcuna limanacälälinqui timpucta pasachinayquipä artiquiwan mana cäcunällacta willamänayquipämi. Amcuna mana willaycullaptí imacta suyñuśhätapis niycälimaptiquiꞌa, imapä caśhantapis willaycälimaptiquiꞌa tantiaśhämi” nil.

10Niptinmi tantiäcunaca nin: “Mandacü taytallay, jinantin allpäćhu ima suyñuśhayquita manamá mayanpis niycälishunquimanchu. Manamá mayan mandacüpis, puydïpis chaynütá tapulachu tantiänincunacta, licacünincunacta, uyllurcunawan licacü yaćhänincunactapis.

11Mandacü taytallay, sasa-sasactamá niyalcämanqui. Chaytá manam mayanpis niycälishunquimanchu; dioscunallam niycälishunquiman. Ñatac dioscunaca manamá nunacunäćhuꞌa yaćhapäcunchu” nil.

12Niptinmi mandacüca sumä piñacülul Babiloniaćhu cä yaćhayniyücunäta lluy wañüchinanpä nila.

13Lluy yaćhayniyücunaca wañuchisha cananpämari juc camachicuyta camachila. Chaymi Danieltawan malca-masincunactapis wañuchipäcunanpä ashipäcula.

14Chay palasyućhu cä cachacuncunap puydïninmi Arioc cala. Pay Babiloniaćhu lluy yaćhayniyücunäta wañuchï yaluptinmi Danielꞌa sumä tantiaywan niycun:

15“¿Imapïmi mandacüca sasa-sasa camachicuyta camachila?” nil.

Niptinmi imapi pasaśhantapis Arioc willaycula.

16Chaymi Daniel mandacücäman lilcul nin: “Ama chaynu callaychu, suyñuśhayquica imapä caśhantapis niycunacpä uchuyllacta alcaycallämay” nil.

17Nilcul wasinman Daniel cutilcamulmi malca-masin Ananiasta, Misaelta, Azariasta ima pasaśhantapis willaycula:

18“Chay suyñuśhanta mana niycäliptinꞌa Babiloniaćhu cä juc yaćhäcunätawan cuscactaśh wañüchimäśhun. Chaymi janay pachäćhu cä Tayta Diosta mañacuśhun suyñuśhanca imapä caśhantapis tantiaycachimänanchicpä” nil.

19Chaymi chay imapä caśhantapis chay tuta suyñuyninćhünu Danielta Tayta Dios tantiaycachila. Jinaptinmi janay pachäćhu cä Tayta Diosta alawala,

20caynu:

“Tayta Dios, wiña-wiñaypä alawäśha cachun.

Paypamá yaćhaycäpis, munaycäpis.

21Paymá muyuncätapis, timpuctapis muyuchin.

Paymá mandacücunacta ćhulaycunpis wicapanpis.

Paymá yaćhayniyücunätapis yaćhayta uycun.

Paymá tantiayniyücunätapis tantiayta uycun.

22Paymá mana tantiana, pacäśha cäcunätapis camalaycachin.

Tutapäcäćhu cäcunätapis pay yaćhaycunmá.

Paywanmá achquica cayan.

23Awquillücunap am Tayta Diosnïtam

sulpäta uycuc, alawaycuc.

Yaćhaytawan sumä callpactamá uycamanqui.

Mañaculcäśhätamá canan tantiaycachimanqui.

Mandacücäpa suyñuntamá yaćhaycachimanqui” nil.

24Chaypïtam puydï Ariocman Daniel lila. Paytamari mandacüca ćhulala Babiloniaćhu yaćhayniyu cäcunäta wañuchinanpä. Paytam Daniel nin: “Yaćhayniyücunäta ama wañuchiychu. Mandacücäman yaꞌacta puśhamay suyñuśhanca imapä caśhantapis tantiaycachinäpä” nil.

25Niptinmi Arioc mana-mana mandacücäman Danielta puśhalcul nin: “Juda läducuna prïsu śhamücunäćhümi jucnin nunacta talïlú. Paymi suyñuśhayquica imapä caśhantapis niycuśhunqui” nil.

26Niptinmi Beltsasar nishan Danielta mandacüca nin: “Chayurá ¿amchun, imacta suyñuśhätapis, imapä caśhantapis niycamanqui?” nil.

27Niptinmi Daniel: “Mandacü taytallay, pacäśha cä suyñuśhayquita manamá tantiayta atipanmanchu maynu yaćhayniyüpis, rüjapis, tantiäpis, nï licacücunäpis.

28Ñatac pacäśha cäcunäta camalaycachï janay pachäćhu Tayta Dios cayanmi. Paymi śhamü watacunäćhu imapä caśhantapis suyñuyniquićhu mandacü taytallay yaćhaycachishulanqui. Cananñatacmi willaycuśhayqui suyñuyniquićhu imacta licaśhayquitapis.

29Am mandacüca, puñunayquićhu cayaptiquim śhamü watacunäćhu imacuna pasananman pinsayälanqui. Chaymari pacäśha cäcunäta tantiaycachïca imacuna pasanantapis licaycachishulanqui.

30Ñatac chay pacäśha cayäcäta yaꞌaman tantiaycachimäla manam juccunapïta mas yaćhayniyu caśhäpïchu sinuꞌa am mandacücäpa suyñuyniqui imapä caśhantapis camalaycachishunayquipämi; jinaman umayquićhu muyuyäśhancäta tantialpachishunayquipämari.

31“Mandacü taytallay, caynütam licalanqui: puntayquićhu jatun nunanu cä śhaycächisha cayäcämi sumä achichipyayä jatu-jatun caña. Ñatac manchanaśhmi cacuña.

32Chay śhaycächisha cäcäpa umanmi ürunllanpi cacuña, pïchunwan liclanñatacmi illaypïta, patanwan uticunñatacmi brunsipïta caña.

33Caćhpanñatacmi jïrrupïta, ćhaquinñatacmi partinninꞌa jïrrupïta, juc partinninñatac ćhaśhächisha mitupïta caña.

34Chay śhaycächisha cäcäta licapayaptiquim mana mayanpis imanayaptin juc jatun lumi palpämuña. Jinalmi jïrruwan mitupi cä ćhaquinman ćhälul lluy amshüña.

35Jinaptinmi jïrrupi, mitupi cäca, chay brunsipi, illaypi, ürupi cäcunäwan lluy amllüśha licalïläliña. Cusicha timpućhu trïgu jalüchisha cäcänümá chay śhaycächishaca pulbu quïdäña. Chay pulbucta waywaca pichäluptinñatacmi mana imapis quïdañächu. Chay śhaycächishaman jatun lumi ćhäcäñatacmi jatun ulꞌuman muyulcul jinantin allpäman juntäña.

36“Chaynümi suyñuyniqui cala. Mandacü taytay, cananñatacmi suyñuyniqui imapä caśhantapis niycuśhayqui.

37Lluy mandacücunapïpis am mandacü taytämi sumäninca canqui. Janay pachäćhu cä Tayta Diosmi mandacüpa ćhulaycuśhulanqui; munayniyu, allin lisisha canayquipämá ćhulaycuśhulanqui.

38Jinantin allpäćhu cä nunacunäta, uywacunäta, pälïcunätapis ampa maquiquimanmi ćhulaycamuśhulanqui. Mandacü taytallay, chay ürupi uma cayäcänümá am cayanqui.

39“Ampa mandacuyniquipi ipayquitam juc mandacü śhalcamunꞌa. Chaypa mandacuyninꞌa mana ancha munayniyüñamari canꞌa. Chaypa ipantañatacmi brunsipi cä mandacü śhalcamunꞌa. Paypa maquinćhümá jinantin allpaca canꞌa.

40Chaypa ipanmanñatacmi tawa cä mandacüca jïrrunu callpasapa śhalcamunꞌa. Jïrru amshuśhancänu, paquishancänümá chay mandacücunätapis amshülunꞌa, pampaman muyüchinꞌa.

41“Chay partin ćhaquin jïrrupi, juc partinñatac ćhaśhächisha mitupi licaśhayquïñatacmi, camalachin mandacuynin masïsu caśhantawan pishi caśhanta. Chay jïrruwan mituwan cayäta licaśhayquinümi waquinćhuꞌa masïsu tacyaycunꞌa, juccunaćhuꞌa manamá tacyaycunꞌachu.

42Chay ćhaquinpa dïduncuna waquinnincuna jïrrupïta, juccunäñatac ñiꞌipi caśhancänümi chaypa mandacuynin abisnintá sumä tacyaycunꞌa, juccunaćhuꞌa pishi callpa caycunꞌa.

43Maynümi jïrruwan mituwan jucllachäśhacta licalanqui, chaynümi juc mandacücunäwan casaracuśhanpa jucllachanaculcanꞌa. Awari, jïrruwan mituca mana sumä jucllachanacuśhancänümari canꞌa.

44Chay timpućhümi janay pachäćhu cä Tayta Dios śhalcachinꞌa imaypis mana llallichicü mandacüta; mañatacmá juc malcap maquinmanpis ćhulaycuśhachu canꞌa. Aśhwanpamari lluy mandacüpa mandacuśhancunäta camacaycülunꞌa. Payñatacmi ichá wiñaypä tacyaycunꞌa.

45Licalanquimá mana mayanpis imanayaptin jatun lumi jiꞌalpalcamul jïrrupi, brunsipi, mitupi, illaypi, ürupi śhaycächisha cäcäta lluy amshüśhanta. Sumä jatun Tayta Diosmari amta licachishulanqui śhamü muyuncunäćhu ima pasanantapis. Cay suyñuśhayquica rasunpam; imam cällanman tantiaycuśham cayanpis” nil.

46Niptinmi mandacü Nabucodonosor pampäman unꞌulacuycul Danielman uyshuycula. Jinaman niyculam canpis uycunacunacta Danielman uycälinanpä, insinsiuctapis cañaycälipunanpä.

47Jinamanmi Danielta nin: “Tayta Diosniqui lluy dioscunapïpis sumäninmi; mandacücunäpa mandäninmi; mayanpis mana tantiaśhanta tantiaycachïcämi. Chaymi cay pacäśha cäcunätapis tantiaycachishunqui” nil.

48Nilculmi mandacüca Danielta altuman juluycul alli-alli rigälucunacta uycula. Jinaman Babiloniap jatun malcanpä puydïninpämi ćhulaycula. Chaynütac jinantin Babiloniaćhu yaćhayniyücunäpa puydïninpälämi ćhulayculapis.

49Chaypïta Daniel mañacula Sadrac, Mesac, Abed-negopämi. Chaynu mañacuptinmi Babiloniap jatun malcancunap puydïnin cananpä paycuna ćhulaycuśha capäcula. Quiquin Danielñatacmi mandacücäpa palasyunćhu quïdacula.