1 Samuel 11 - Old Testament Quechua Wanca（QVW）

Jabes malcayücunätam Amon läducunäpa maquinpi Saul libraycun

1Amon lädup mandacünin Nahasmi Jabes malcacta camacaycunanpä lila. Chayta yaćhälälilmi Jabes malcaćhu nunacunaca mandacücäman caćhälälin: “Yaꞌacunawan limaliculcay uywayniquicuna capäcunäpä” nil.

2Niptinmi mandacü Nahas nin: “Amcunap allï ñawiquita-cama juluycul-lämi amcunawan limalicüman. Chaynüpamá jinantin Israelpa pinꞌaynin capäcunqui” nil.

3Niptinmi Jabes malcap yaśhancuna nipäcun: “Jinantin Israel malcamasïcunaman willacüta caćhanäpä anćhish muyunllacta uycälimay. Sïchuśh mayanpis yanapämäní mana captinꞌa nimäśhayquinüñaćh canꞌa” nil.

4Chaymi willacücunaca Saul yaćhaśhan Gabaa malcaman ćhaycälil willaycäliptin jinantin malcaca waꞌaculcäla.

5Chaynu pasayaptinmi ćhaclapïta yundancunawan Saul cutiyämul nin: “¿Nunacunäta imatan pasälun? ¿Imapïmi caynu-caynüpaña awćhucuyalcan?” nil.

Chaymi Jabes malcayu nunacunäpä willacuy apamuśhanta Saulman willaycälila.

6Chay willacuyta Saul uyalïluptinmi Tayta Diospa Ispiritun śhämuptin Saul sumä-sumäta piñacüla.

7Chaymi ishcay wäcacta cuchuy pawalcul jinantin Israel ayllucunäman apächila caynu nil: “Saulta, Samuelta pilyuman mana liwshïcunap wäcancunacta caynümi camacaycülunꞌa” nin.

Chaynu Tayta Dios nichishanta uyalïlälilmi jinantin malcaca manchälälil juc nunanülla juntunacälälila.

8Chaynu Saul ayächiptinmi nunacunaca pilyawshinanpä Bezec malcaman juntunacälälimula: Israel läducunäpïta quimsa paćhac walanga (300,000) nunacuna, Juda läducunäpïñatac quimsa ćhunca walanga (30,000) nunacuna.

9Chaypïtam willacü śhamücunäta Saul nin: “Galaad lädu Jabes malcaćhu yaćhäcunäta caynu nimuy: ‘Wala ćhawpi muyuntam Amon läducunäpi libraycälinacpä ćhäpämuśhä’ ” nil.

Niptinmi willacücunaca Jabes malcaćhu cäcunäta willaycälila. Chayta uyalilälilmari sumä cushicälälila.

10Chaymi ćhïnicünin Amon läducunäta nipäcun: “Wälamanmi maquiquiman ćhulacaycälimuśhä munaśhayquita yaꞌacunawan lulapäcunayquipä” nil.

11Chay walantintañatacmi manaläpis achicämuptin pilyänincunacta quimsaman Saul laquïla. Jinalcul achicalpuyaptinña Amon läducunäta allacaycälilmi ćhawpi muyuncama camacaycälälila. Cawsäcunäñatacmi wicta cayta juc-juclla ayiculcäla.

Saultam mandacüpa tacyalpachin

12Chaypïtam Samuelta Israel caśhtacunaca nicuyalcan: “¿Mayancunam ‘Saul manam mandacüninchic canmanchu’ nïcunaca cayalcan? Chay nunacunäta puśhamuy wañuchinapä” nil.

13Chaychu Saulñatacmi nin: “Israel caśhtacunäta Tayta Diosmi canan libraycamanchic. Manamá mayanpis canan wañunmanchu” nil.

14Samuelñatacmi malcäta nin: “Gilgalta acu lishun; chayćhu mandacüninchicpä Saulta tacyalpachishun” nil.

15Niptin lluy nunacunaca Gilgal malcaman lipäcuptinmi chay Tayta Diospa ñawpäninćhu Saul mandacünin cananpä tacyalpachipäcula. Jinalculmi allin cawsaśhanpi cäcunacta Tayta Diosman uycälila. Chayćhümi Saul jinantin Israel caśhtacunäwan sumä-sumäta cushiculcäla.