1Tayta Diospa willacünin yaꞌa Isaiastam Moab lädupi caynu willamäla:
Juc tutallapämi Moab lädućhu cä
Ar malca, camacaycüśha chunyanꞌa.
Juc tutallapämi Moab lädućhu
Kir malcapis, camacaycüśha chunyanꞌa.
2Dibon malcayu nunacunaca ulꞌućhu
uycunancunaman waꞌaśhtinmi ishpipäcunꞌa.
Nebo malca, Medeba malca camacaycüśha
caśhanpïtamá Moab lädu waꞌanꞌa.
Llaquicuyninćhümi umanta lutuculcanꞌa,
śhaplanta cuchuculcanꞌa.
3Shicacü müdanawan müdacuśham,
cällicunäćhu taplaycaćhapäcunꞌa;
wasinpa altuśhnincunaćhüpis, malcap läsancunaćhüpis
apalcaćhaypam icchulcul-icchulcul waꞌapäcunꞌa.
4Jahaza malcayücunaca uyalipäcunancamamá
Hesbon malcaca, Eleale malcaca apalcaćhapäcunꞌa.
Moab lädu sumä-cama pilyäcunäpis awćhupäcunꞌamá;
manchacuypïmá jinallaćhu isälälinꞌa.
5Moab lädu-laycumá śhunꞌüpis alalaycullan.
Nunancunamá Zoar malcäcama mana-mana ayipäcunꞌa;
Luhit läductam waꞌaśhtin ishpipäcunꞌa.
Horonaim caminunpam,
llaquicuypi apalcaćhaśhtin lipäcunꞌa.
6Nimrimćhu cä yacucunäpis chaquïlunꞌamá;
ulacunäpis lluymi chaquïlunꞌa;
chillquimü pastucunäpis lluymá awïlunꞌa;
lluy birdi pastucunämá manaña canꞌañachu.
7Chaymi nunacunaca ima puchüllancunactapis,
ashllay quïdäcunätapis Sauce nishan
wayup chimpanman aśhtapäcunꞌa.
8Jinantin Moab lädućhümi llaqui-llaqui
waꞌayllaña muyucunꞌa;
Eglaim läducamam apalcaćhaynin ćhälunꞌa;
Beer-elim läducamam ayaycaćhaynin ćhälunꞌa.
9Dimon malcap yacuncuna yawarwan tallüśhamá linꞌa.
Jinaman sumä-sumä
mućhuchicuycunactalämá ćhaycachishäpis.
Moab lädupi ayïcunätawan chayćhu
quïdäcunätamá liyunca lacsacalpunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
