1 Cronicas 5 - Old Testament Quechua Wanca（QVW）

Rubenpa milaynincuna

1Israelpa chulin Ruben wamä chuli cayninta mana ćhasquilachu papäninpa uywanacuśhan walminwan puñuśhan-laycum.

7Beerapa wawꞌi-caśhancunap wasinpa-cama milaynincuna caycunam: Puydï Jeiel, Zacarias,

8jinaman Azazpa chulin Belapis. Azazñatacmi Semap chulin. Semañatacmi Joelpa chulin. Belamari Aroer malcaćhu yaćhala; paypa allpancunam Nebopi aśhta Baal-meoncama cala.

9Galaad lädućhu uywancuna alli-alliman miläluptinmari chunyäcäpa manyancama cacula, aśhta Eufrates mayücama.

10Saul mandacuśhan timpupis Ruben ayllucunaca Agarpa milaynincunawan pilyapäculmi llallïlälila. Jinalculmi paycuna Galaadpa inti ishpimunan läducunacta chalacuycul chayćhu yaćhapäcula.

Gadpa milaynincuna

11Ruben ayllup chimpanćhümi Gad ayllucunaca yaćhapäcula, Basan lädupïta aśhta Salca malcäcama.

12Mandacünincunam capäcula: Joel, Safan, Jaanai, Safatpis.

13Taytapi cä wawꞌi-caśhancunam anćhish capäcula: Micael, Mesulam, Seba, Jorai, Jacan, Zia, Heberpis.

14Chay anćhish puydïcunaca Abihailpa milaynincunam. Abihailñatacmi Huripa chulin, Huriñatac Jaroanpa, Jaroanñatac Galaadpa, Galaadñatac Micaelpa, Micaelñatac Jesisaipa, Jesisaiñatac Jahdopa, Jahdoñatacmi Buzpa.

15Chay ayllup puydïninmi Ahi cala. Paymi Abdielpa chulin, Gunip willcan cala.

16Paycunamari Galaad lädućhu, Basanćhu, lluy tacsha malcachancunaćhüpis, jinaman Saronpa lluy ichadïruncama yaćhapäcula.

17Cay lluy milaynincunamari isquirbinancäman ćhulaśha capäcula, Juda lädućhu Jotam mandacuyaptin, Israel lädućhüñatac Jeroboam mandacuyaptin.

Ruben, Gad, Manasespa ćhawpi aylluctam llallin

18Rubenpa, Gadpa, Manases ćhawpi ayllucunäpa alli-cama pilyänincunam tawa ćhunca tawayu walanga anćhish paćhac süta ćhunca (44,760) capäcula. Paycuna atajachicucta, ispädacta, flïchacta ichüman-allïman manijaypä ishpisha-ishpisham capäcula.

19Paycunam pilyapäcula Agar, Jetur, Nafis, Nodab lädu nunacunäwan.

20Paycunawan Ruben, Gad, Manases ćhawpi ayllu pilyayalcalmari Tayta Diosta mañaculcäla. Chaynu chalapacuyninwan mañaculcäśhanpïmi paypa maquinman Agar läducta, yanapänincunacta Tayta Dios ćhulaycula.

21Chaymi uywancunacta apaculcäla: picha ćhunca walanga (50,000) camïllucunacta, ishcay paćhac picha ćhunca walanga (250,000) uwishcunacta, ishcay walanga (2,000) aśhnucunacta, paćhac walanga (100,000) nunacunactapis.

22Tayta Dios paycunawan cayaptinmari achca-achca nunacunactapis wañüchila. Chaynüpam paycunaña chayćhu yaćhapäcula prïsu puśhanan timpucama.

23Manases ćhawpi ayllu achca-achcaman milälälilmi Basan lädupi aśhta Baal-hermon, Senir, Hermon ulꞌucama yaćhapäcula.

24Taytapi aylluncunap puydïnincunam: Efer, Isi, Eliel, Azriel, Jeremias, Hodovias, Jahdielpis cala. Paycuna lisisha-cama, allin pilyä-cama, wasinćhu-cama puydïnincunamari capäcula.

25Ñatac awquilluncunap Tayta Diosnin chincachishan malcacunäpa taytachancunaman watica walminu muyucalcälil alawaśhanwanmi Tayta Diosta jalutaculcäla.

26Chaymi israelcunäpa Tayta Diosnin, Asiria malcap mandacünin Pulta2Rey 15.19. paycunapa cuntran caćhäla. Pulpap jucnin śhutinꞌa Tiglat-pilesermi2Rey 17.6. cala. Paymi Ruben, Gad, Manases ćhawpi ayllucunacta prïsu puśhacula Halah, Habor, Hara, läducunaman, jinaman Gozan mayu lädumanpis. Chayćhümari canancamapis yaćhayalcan.