Isaias 24 - Old Testament Quechua Wanca（QVW）

Jinantin allpämi camacaycüśha canꞌa

1Licapäcuy, jinantin allpätamá Tayta Dios camacaycülunꞌa;

lluy-lluytamá pulumächinꞌa.

Cay pachätamá sumä-sumä cuyüchinꞌa;

chayćhu lluy yaćhänincunactapis wicman-caymanmá chiꞌichinꞌa.

2Chaynu chiꞌichishamá capäcunꞌa

sasirdütiwan nunacunäpis,

uyway nunäwan patrunninpis,

uyway walmiwan patrünanpis,

lanticücäwan lantïcäpis,

mañäcäwan mañacücäpis,

lïtäcäwan lïtacücäpis.

3Jinantin allpaca pasaypi camacaycüśha,

waycäśhamá canꞌa.

Caynu pasananpä quiquin Tayta Diosmari niyan.

4Cay allpaca llaquicuyćhu cayalmá ishyälunꞌa,

jinantin pachämá awïlunꞌa.

Cay pachäćhu alli-cama nunacunäpis sumämá llaquiculcanꞌa.

5Jinantin allpäta chayćhu yaćhänincunamá jalutacälälin.

Camachicuycunactamá mana cäsuculcanchu;

yaćhachicuytamá iwilälin;

wiña-wiñaypä cä limalicuytamá jalutacälälin.

6Chaynu captinmi cay jinantin pachaca mana allinllaćhu cayan;

cay pachäćhu cä nunacunämi juchanpïta lawćhaycuśha capäcun.

Chaymari jinantin allpäćhu nunacunäpis ullüśhaña cayan;

ashllayllañamari cawsayniyu quïdaycälin.

7Üba lantacunaca lluymá awilälin;

bïnupis chincacunñamá;

sumä cushicuyllaćhu cawsäcunäpis awćhuculcanmá.

8Tamburcunäpa suynaynincunapis upällälunñamá;

arpacunäpa mishqui-mishqui waꞌaynincunapis chincacunñamá;

cushicuyllaćhüña cäcunäpa cushicuyninpis camacälunñamá.

9Manañamá bïnu upyaycunapis, taquiycunapis canñachu.

Ima trägu upyaśhancunapis sumä ćhacćhämanñamá licalïlun.

10Malcaca pasaypi pulumäśha

chunyäśhañamá cayan;

lluy wasicunaman mayanpis

mana yaycunanpämá wićhäśhaña cayan.

11Bïnu mana captinmá nunacunaca caminucunäćhu ayaycaćhapäcun.

Cushicuyca llaquicuymanmá muyülun;

jinantin pachäpïmá cushicuyca licun.

12Malcaca pasaypi pulumäśhamá cayan;

puncuncunapis lluy amllüśhamá cayan.

13Cay jinantin allpäwan

nasyuncunaca cusichaćhu ulïbus tapsïshanu

ütac üba cusichapi

quïdaśhancänümá quïdälälinꞌa.

14Quïdäcunäñatacmi Tayta Diospa sumä cayninpïta

inti jiꞌalpunanpi cushicuywan alawapäcunꞌa.

15Pampacunäćhu, lamarpa patancunaćhüpis

Israelpa Tayta Diosninta

altumanmi julaycälinꞌa.

16Cay pachäpa manyanpïtalä taquipämuśhantamá uyaliyanchic:

“¡Tincüninman licaycüca altuman juluycuśha cachun!” nïta.

Ñatac yaꞌami nilá: “¡Yaꞌa, imanuylä aycanuylä caśhä!

¡Śhunꞌüpis llaquicuypi nanaypam nanaycun! Ipanchäcunaca ipanchayllactañamá ćhapapäcun;

ipanchayllañamá mayćhüñapis timpuyan” nil.

17Cay allpäćhu am yaćhäcuna, aticaćhaśha capäculmi

manchacuylla, trampalla, ućhculla alcapäcuśhunqui.

18Manchacuy apalcaćhaypi ayicá ućhcumanmi palpunꞌa;

luli ućhcupi ishpimücá trampamanmi jiꞌacalpunꞌa.

Sumä lücu tamya camacaycämuptinmá,

allpäpa simintuncunapis śhaśhapäcunꞌa.

19Awari, jinantin pachaca cuyunꞌamá;

sumä-sumämi laꞌalälunꞌa;

allpaca sumä-sumä tapsïshamari cacunꞌa.

20Cay allpaca shincanümá tanliycaćhacunꞌa;

chucllanümá aywicaćhacunꞌa.

Juchanpa sumä-sumä llasayninwanmá cućhpälunꞌa;

manañamá imaypis śhalcunꞌañachu.

21Chay muyunćhümi altu sïlüćhu cä munayniyücunätapis,

cay allpäćhu mandacücunätapis Tayta Dios mućhuycachinꞌa.

22Chaycunacta carsilman wićhaśhancänümi

allpap lulinćhu cä carsilman juntuycülunꞌa.

Achca muyuncunapïtalämá

paycuna mućhuycachisha capäcunꞌa.

23Sumä munayniyu Tayta Dios Sion ulꞌućhu,

Jerusalenćhu mandacuyta allaycuptinmi,

jinaman yaśhancunap ñawpäninćhu sumä caynin

chipipicyaptinmi, yulä quillapis pinꞌacuypi pucayacunꞌa;

intïpa achquiyninpis chincacunꞌamá.