Salmos 118 - Old Testament Quechua Wanca（QVW）

Salbaycuśhanpïtam Tayta Diosta sulpäta uycun

1 Tayta Dios allin caśhanpïta,

llaquipäcuynin wiña-wiñaypä caśhanpïta sulpäta uycapäcuy.

2Israel malca nipäcuy: “Tayta Diospa

llaquipäcuynin wiña-wiñaypämá” nil.

3Sasirdüti Aaronpa milaynincunapis nipäcuy:

“Tayta Diospa llaquipäcuynin wiña-wiñaypämá” nil.

4Payta manchacücunäpis nipäcuy: “Tayta Diospa

llaquipäcuynin wiña-wiñaypämá” nil.

5Llaquicuynïćhu Tayta Diosta

ayacuptïmi pay uyaliycamal libriman julaycalläman.

6 Tayta Dios yaꞌawanmari cayan.

Chaymi mana manchacuná canchu;

¿Nunacunalla imanämanꞌatá?

7 Tayta Diosmari yaꞌawan cayan; paymá yanapamäní.

Chaymá ćhïnicünïcuna camacaycüśha caśhanta licaycuśhä.

8Nunacunällaman chalapacunanchictá

mas allin Tayta Diosman chalapacuymi.

9Mandacücunällaman chalapacuyänanchicpïtá

mas allin Tayta Diosman chalapacuymi.

10Lluy nasyuncuna intucayalcämaptinpis,

Tayta Diospa śhutinćhümi camacaycülú.

11Wicpa caypa lluy-lluy shipucälälimaptinpis,

Tayta Diospa śhutinćhümá camacaycülú.

12Urunwaycunänümá shipucäläliman.

Caśhacta nina lupaśhancänümá quiquincuna chincälälin.

Tayta Diospa śhutinćhümá camacaycülú.

13Cućhpanäpä sumä tanꞌaycayalcämaptinpis,

Tayta Diosmá yanapaycamäní śhaycamula.

14 Tayta Diosmá callpanchaycamäní.

Anmá taquiycachimanqui.

Amllamá salbaycamäní canqui.

15Allin nunacunäpa wasincunaćhu llallipäcuśhanpi,

sumä cushicuy taquicunamá lüyayalcämun:

“Tayta Diosmi pudirninwan llallïlun.

16 Tayta Diosmá llallishanpi maquinta chacchalayan.

Tayta Diospa pudirnin sumäcunactamá lulaycun” nil.

17-18 Tayta Diosmá sumäta lawćhäman.

Ñatac manamá wañunäcamachu.

Manamá wañuśhächu, aśhwanpamá cawsaśhä

Tayta Dios lluy lulaycuśhancunäta willaycunäpä.

19Allincäman yaycuna puncucta quićhaycallämay.

Tayta Diosta alawanäpä yaycuyculläśhä.

20Cayꞌa Tayta Diosman yaycuna puncumá.

Chayninpamá cäsucünin nunacunaca yaycapäcun.

21Tayta Diosllay, uyaliycamäśhayquipïmá,

salbaycamäśhayquipïmá alawaycuśhayqui.

22Wasi luläcuna jalutacuśhan lumim

mas allin puydï chaläninmanlä muyüñä.

23Caytanu Tayta Diosmá lulaycula.

Äśhalayllaman camanapä lulaycunactamá licaycachimanchic.

24Cay muyuncämá Tayta Dios caynüta lulaycula.

Chayćhümá sumä-sumäta cushicuśhun.

25 Tayta Diosllay, canan salbaycälillämayꞌari.

Tayta Diosllay, canan llalliycälichillämayꞌari.

26¡Tayta Diospa śhutinćhu śhamüca alawäśha cachun!

¡Tayta Diospa wasinpïmá amcunacta allinpä licaycälishayqui!

27 Tayta Diosllamari rasunpa Diosninchicꞌa;

paymá acchiycamanchic.

Jaćhap pallayninta apticälälisha-camari uycuna pataccäpa wälaniläninman lipäcuy.

28Amllamá Tayta Diosní canqui; chaymi alawaycuc.

Amllamá Diosní canqui; chaymi altuman juluycuc.

29 Tayta Dios allin caśhanpïta,

llaquipäcuynin wiña-wiñaypä caśhanpïta sulpäta uycapäcuy.