Jeremias 41 - Old Testament Quechua Wanca（QVW）

Gedaliastam wañuchin 2Rey 25.25-26

1Chaypi anćhish quillaćhümi Elisamap willcan, Netaniaspa chulin Ismael ćhunca nunancunawan lipäcula Mizpa malcaćhu cä Ahicampa chulin Gedaliasman. Ismaelꞌa Juda lädup mandacücäpa milayninmari cala. Chayman ćhaycul lluy micuyalcaptinmi,

2Netaniaspa chulin Ismael liwshi ćhunca nunancunawan śhalculcälil Safanpa willcan, Ahicampa chulin Gedaliasta ispädawan wañülächin. Chaynüpamá Babilonia mandacücäpa ćhulaśha cä Juda lädup mandacüninta wañülächila.

3Chaynütacmi lluy Juda läducunätawan Mizpa malcaćhu Gedaliaswan cä Babilonia lädu pilyäcunätapis Ismael wañüchila.

4Chay walantin Gedaliasta wañülächishanta manalä mayanpis yaćhayaptinlämi,

5Shiquem, Silo, Samaria lädupïta pusä ćhunca (80) wayapacuna ćhälälimun śhaplancuna cuchucälälisha, müdanancunacta laćhyälälisha, quiquincunap aychanćhüpis cuchucälälisha-cama. Paycunam Tayta Diospa alawana wasinćhu uycälinanpä ćhacla micuycunacta, insinsiucunacta apapämuña.

6Ñatac Netaniaspa chulin Ismael, Mizpa malcapïmi talipänin waꞌaśhtin lila. Tincülulmi nin: “Ahicampa chulin Gedaliasta licaycälï śhapämuy” nil.

7Ñatac chay wayapacunaca malcaman yaycäläliptinmi Netaniaspa chulin Ismael lluy nunancunawan muꞌuywan wañülächin. Jinalculmi püsuman jitalpaycälälin.

8Ñatac paycunapi ćhunca wayapacunam Ismaelta nipäcula: “Ama chaynu callaychu, ama wañuchipämaychu. Ulꞌućhümi trïgucunacta, siwäcunacta, asayticunacta, mishquicunacta pacaycul caćhaycälälimullá” nil. Chaynu nipäcuptinmi juccunätawan cuscacta mana wañuchipäculachu.

9Má, Israel lädu mandacünin Baasapïta1Rey 15.16-22. pacaculcänanpämi jatu-jatun püsucta mandacü Asa unay lulachila. Chay jatu-jatun püsumanmari Gedaliaswan cuscacta lluy wañuchishancunäta, Netaniaspa chulin Ismael lluy juntächila.

10Chaypïtam Mizpaćhu quïdä nunacunätawan mandacücäpa walmi chulincunacta Ismael prïsu puśhacun. Chay pilyäcunap puydïnin Nabuzaradanmari Ahicampa chulin Gedaliasta puydï cananpä ćhulaycula. Chay prïsucunätamari Netaniaspa chulin Ismael puśhacun Amon läducunäman.

11Chaynu Netaniaspa chulin Ismael wañuchishantam yaćhäläliña Careap chulin Johanan, jinaman pilyäcunäpa juc puydï-masincunapis.

12Chaymi lluy nunancunacta juntuycul Netaniaspa chulin Ismaelwan pilyä lipäcula. Jinalmi Gabaon malcaćhu cä jatun istanquip lädunćhu cayalcäta talïlälin.2Sam 2.13.

13Chay Ismael prïsu puśhaśhan nunacunäñatacmi cushicälälin Johananta, pilyänincunap lluy puydïcunactawan licälälil.

14Chayćhümi Mizpa malcapi prïsucta Ismael puśhaśhancunaca cutipämul Careap chulin Johananwanña liculcan.

15Ñatac Netaniaspa chulin Ismael, pusä nunancunawan Johananpa maquinpïta lluptilcälilmi Amon läduman ayiculcan.

Quïdä Juda läducunämi Egiptoman ayiculcan

16Chayurá Ahicampa chulin Gedaliasta wañulcachil Mizpa malcapïta Netaniaspa chulin Ismael prïsu puśhaśhancunactam, Careap chulin Johanan pilyänincunap puydïnincunawan cutichipäcula. Chaynu Gabaon malcapïta cutichishancunämi capäcula: pilyäcunaca, walmicunaca, wawincuna, capäśha cä mandacücäpa sirbïnincunapis.

17Paycuna Belen malcap lädunćhu cä Guerut-quimam nishancamam pasapäcula. Chayćhümi jamapäcula Egiptoman ayiculcänan-laycu.

18Chaynu ayicuyta munala Babiloniap mandacünin, ćhulaśhan puydï Gedaliasta wañuchishanpïta sumä manchaculmari; awari, Ahicampa chulin Gedaliasta, Netaniaspa chulin Ismael wañuchishanpïtamari.