Josue 9 - Old Testament Quechua Wanca（QVW）

Gabaon läducunämi Israel caśhtacunäta casquipälälin

1Jordanpa inti jiꞌalpunan lädućhu cä pampancunaćhu, jatun lamar ućhap patanpïta aśhta Libano lädu ulꞌucunäćhu yaćhä mandacücunämi lluy chaycunacta uyalïla. Paycunam Het, Amhor, Canaan, Ferez, Hev, Jebus läducunaca capäcula.

2Paycunamari chaynu yaćhälälil jucllachanacälälin Josueta, lluy Israel caśhtacunäta camacaycälälïnanpä.

3Ñatac Gabaon malcaćhu yaćhäcunäñatacmi yaćhälälin Jerico malcactawan Hai malcacta Josue imacta lulapäcuśhantapis.

4Chaymi paycuna calupïta śhamütucul casquillanwan mawca cuśhtalta, lataśh tülläśha bïnu apacunta aśhnunman cargapaculcul liculcan.

5Chaynütacmi müdanantapis, śhucuynintapis pasaypi lataśh champay-champay jiläśhacta ćhulacälälin. Milcapanpäpis pasaypi chaquïsha uwisäśha tantactam apapäcula.

6Chaymi Gilgalćhu Josuewan Israel caśhtacunaca jamapäcuśhanman ćhaycul nipäcun: “Calu-calu malcapïmi śhayalcämullá. Amcunawan limalinacuytam munapäcullá” nil.

7Niptinmi Hev läducunäta Israelcunaca nipäcun: “Ichapis amcuna cay lädu-lädullanchicpïpis cayalcanqui. Chaynu capäcuptiquiꞌa manam imactapis amcunawan limalinacuchwanchu” nil.

8Niptinmi nipäcun: “Yaꞌacuna sirbïniquicuna capäcunäpä listum cayalcällá” nil.

Niptinmi Josue: “¿Mayancunam capäcunqui, maypïmi śhapämunqui?” nin.

9Niptinmi paycuna: “Yaꞌa sirbïniquicuna calu-calu malcapïtam śhayalcämullá. Chaycamamari Tayta Diosniquip sumä lulaśhancuna ćhämun. Pay Egiptoćhu lluy ima lulaśhantapis yaćhälälïmi.

10Chaynütacmi yaćhälälí Jordan mayup chimpanćhu Amhor läducunäpa mandacünincunawan imacta lulapäcuśhayquitapis: Hesbonpa mandacünin Sehonwan, Basanpa mandacünin Ogwan, Astarotćhu cayalcan. Puliy-puliy cayalcaptïmari müdanäcunapis, śhucuynïcunapis pasaypi lataśhyälunña” nil.

14Chay Gabaon nunacunaca apapämuśhantam israelcunaca ćhasquipäcula sumäta licaycälinanpä; Tayta Diostañatacmi ichá mana tapupäculachu.

15Chaymi paycunawan jawca cawsaycälil mana wañuchipäcunanpä Josue limalicula. Israelcunap puydïnincunapis chaynu cananpämari tacyalpachipäcula.

16Quimsa muyunña chaynu limalicüśha cayalcaptinñam israelcunaca yaćhälälin Gabaoncunaca bisinullan capäcul sircancunallaćhu yaćhapäcuśhanta.

17Chaymi ashï lipäcul quimsa muyuntá malcanman ćhälälin: Gabaonman, Cafiraman, Beerotman, Quiriat-jearimmanpis.

18Chayćhu Israel caśhtacunaca manam wañuchipäculachu. Israelcunap Tayta Diosninpa śhutinta śhaycaycachil mana wañuchipäcunanpä lluy puydïnincunamari limalicüśha capäcula.

Chaymi jinantin Israel caśhtaca puydïnincunacta jamuyapäcula.

19Puydïcunäñatacmi nipäcun: “Yaꞌacuna Tayta Diosninchicpa śhutinta śhaycaycachilmi limaliculcälá. Chaymi ima mana allintapis manaña lulachwanñachu.

20Aśhwanpa caynüta lulaśhun: Paycunacta ama wañuchishunchu. Limalicuśhanchicta jalutacüluptinchicꞌa Tayta Diosmari piñacülunman” nil.

21Nilculmi puydïcunaca nin: “Cawsayniyüta caćhaycuśhun, lluy malca-masinchiccunap yamta cuchüninchic, yacu apamüninchic cananpä” nil. Chaynüpam puydïcunaca limalicuśhanmannu cawsayniyüta caćhaycapäcula.

22Chaymi Gabaon nunacunäta ayalcul Josue nin: “Sircallaćhu yaćhayalcal ¿imapïtam ‘calu-calućhümi yaćhapäcú’ nil casquipapämälanqui?

23Chaymi cananpïtá mana allinpä licaśha capäcunqui; imaycamapis uyway nunamá capäcunqui. Tayta Diosnïpa wasinmanmi yacucta apapämunqui, yamtactapis cuchupämunqui” nil.

24Niptinmi Gabaon nunacunaca nin: “Cay uyway nunallayquicuna tuquictam yaćhapäculá Tayta Diosniqui cay jinantin allpacunäta maquiquiman ćhulaycunanpä, jinaman cayćhu lluy yaćhäcunätapis wañuchipäcunayquipä uywaynin Moisesman camachishanta. Chaymi wañülächimänayquita manchacul chaynüta lulälälillalá.

25Cananꞌa maquiquićhümi cayalcällá. Allin tincüniquimannuꞌari yaꞌacunawan munaśhayquita lulaycälillay” nil.

26Chaynüpam Gabaon läducunaca Israelpa maquinćhu wañupäcunanpïta Josue salbaycula.

27Chay muyunpïtam paycunacta Josue ćhulala israelcunäpäwan Tayta Diospa uycuna patacninpä yamtactawan yacucta aśhtapämunanpä. Tayta Dios aclaśhan sityumanmari paycuna aśhtapämü cala. Canancamapis Gabaon nunacunäpa chaynüllamari lulaynincuna.