Nehemias 6 - Old Testament Quechua Wanca（QVW）

Nehemiaspa ćhïnicünincunam caśhan śhalcapäcun

1Chay timpupa uchuy aśhalayällactapis mana caćhayculmi lluy murällacta śhalcächilá. Ñatac puncucunacá manalämi ćhulalpuśhachu cayalcäla. Lluy caycunacta Sanbalat, Tobias, Arabia lädu Gesem, jinaman lluy ćhïnicunïcunamari yaćhäläliña.

2Chaymi Sanbalatwan Gesem nichimäla: “Ono pampap jucnin malcachanćhu tincunäpä śhamuy” nil. Chaynu ayachimäla mana allinta lulapämänanpämi.

3Chaymi juc willacüta caćhalá: “Sumä jatun lulayćhümi cayá; manam śhamuyta atipamümanchu. Amcunawan juntunacü śhacamuśhäcama lulaśhäca śhaycülunmanmi” nil.

4Chaynu willacüninwan tawa cuticamam nichimäla. Nichimaptin yaꞌapis chaynu willacachishätanüllatacmari nichilá.

5Picha cutićhüñatacmi Sanbalat jucnin uywaynin nunanwan mana wićhaśha cartacta apachimumäña.

6Chay cartaćhümi caynu niña:

“Amwan lluy Juda läducunaca mandacücäpa cuntran śhalcapäcuśhayquitam lluy nunacunäpis, Gesempis limayalcan. Chayshi murällactapis śhalcayächinqui, am mandacü canayquipä.

7Chaynu canayquipä Jerusalenćhu willaculcänanpä willacüniquicunactapis lluyñaśh ćhulälunqui: ‘Judaćhu mandacüninchic cayanñam’ nipäcunanpä. Chaymi mandacü Artajerjes manalä yaćhaśhancama, caypi limananchicpä jucllaña śhamunayqui” nil.

8Nichimaptinmi yaꞌañatac nichilá: “Cay nimäśhayquicunaca yanꞌalmi. Chaycuna quiquiquicunap pinsayllayquipi julapäcuśhayquicunamá” nil.

9Rasunpa paycuna nipämäla manchachipämänanpämi: “Manchächiptinchic jucmanyälälilmi lulayta nï camacapäcunꞌachu” nil.

Yaꞌañatacmi ichá mañaculá: “Tayta Diosllay, callpacta uycälillämay” nil.

10Chaypïtam Mehetabelpa willcan, Delaiapa chulin Semaiaspa wasinta lilá. Paymi pacacuyninwan wasin lulićhu wićhalayäña. Chayćhümi niman: “Tayta Diospa alawana wasinpa lulinman pacacü lilcul lulipi lluy wićhacämuśhun. Canan tutamari wañuchishunayquipä śhacayalcämun” nil.

11Nimaptinmi nilá: “¿¡Yaꞌanu cä nunacunaca ayiyalcanmanchun ampá!? ¿¡Bidäta salbaynïwan Tayta Diospa alawana wasinman pacacuyämanchun imatá!? Manamá pacacümanchu” nil.

12Chayćhümi tantialú Tayta Diospa mana caćhaśha cayal limaśhanta. Aśhwanpa chaynu limala Sanbalatwan Tobias illayta pägaycuptinmi.

13Chaynu manchächimaptin pacacul juchacta lulanä-laycumari pägaycula. Chaynu lulaycuptí jamuyapämalćha pinꞌayman ćhulapämanman cala.

14Chaymi mañaculá: “Tayta Diosllay, Sanbalatwan Tobias lulapäcuśhanta amari unꞌaycuychu. Chaynütac willacü Noadiaswan juc willacücunaca manchachiyta munapämäśhancunactapis amari unꞌaycuychu” nil.

15Má, murällacta Elul quillap ishcay ćhunca pichayu (25) muyuncäćhümi ishpichilá. Lulayta camacalá picha ćhunca ishcayniyu (52) muyunmi.

16Chayta lluy ćhïnicunïcuna yaćhälälilmi muyülïnïćhu nasyuncunaca manchäläliptin nunatucuyninpis mana caśhanman muyülun. Chayćhülämi tantiälälin Tayta Diospa yanapayninwan lluy lulapäcuśhäta.

17Chay timpum Tobiaswan Juda lädup puydïnincuna cartacta apachinaculcä capäcula.

18Chaynu Tobiasta achca yanapapäcula Arap chulin Israel caśhta Secaniaspa maśhan captinmari. Jinaman paypa chulin Johananpis Israel caśhta Berequiaspa chulin Mesulampa wamla chulinwan casaracüśhamari cala.

19Chaymi ñawpänïćhuꞌa Tobiaspïta allinllactaña willapapämä cala; yaꞌa nishätañatac payman willaycapäcula. Tobiasñatacmari manchachimayninwan cartacta apachimumä-apachimumä cala.