2 Samuel 11 - Old Testament Quechua Wanca（QVW）

Davidmi juchaman Betsabewan palpun

1Má, watap allaycuyninćhu mandacücuna pilyuman yalunan timpum cala. Chay timpućhümi Amon läducunäta Joab camacaycünanpä David caćhälun. Chaymi Israel pilyäcunäwan puydïnincunawan Joab lipäcul Raba malcacta cunćhälälin. Davidñatacmi liwshinantá Jerusalenllaćhu quïdacula.

2Jucnin tardim David jamapäśhanpi śhalcuculcul palasyunpa patacninćhu pulipayäla. Jinayäśhanćhümi sumä tuquish-tuquish walmi almacuyäta licälun.

3Chaymi David pï caśhantapis yaćhanan-laycu caćhäla. Chaymi willaycälila: “Pay Eliampa chulinmi, Het lädu Uriaspa walmin Betsabemi” nil.

4Chay walmi ishyacuyninpïta custumrinmannu chuya cananpämi almacuyäla. Chayćhümi Betsabeta puśhamunanpä nunancunacta David caćhälun. Chaynu ćhächimuptinmi paywan puñupäcuśhanpïta wasinman cuticula.

5Chaypïtam patayu licalïshanta Davidman willaycachila.

6Chaymi Joabman willacüta David caćhälun: “Het lädu Uriasta caćhamuy” nil. Niptinmi nishannülla Joab lulaycula.

7Chaynu Urias ćhämuptinmi David tapuycula lluy pilyänincuna, Joab, imanuy capäcuśhantapis, jinaman pilyuca imanuy caśhantapis.

8Chaypïtam David nin: “Wasiquita lil walmiquiwan puñumuy” nil.

Chay palasyupi yalüluptin-pachallam mandacüca allin micuyta Uriasman apachila.

9Ñatac Urias wasinman mana lilmi palasyup puncunćhu puydï täpäcäpa puñunanćhu puñucuycuña.

10Chaynu Urias wasinta mana cutishanta willaycäläliptinmi David nin: “¿Calupïta cutiyämul imapïtam wasiquita mana lilanquichu?” nil.

11Niptinmi Urias: “Tayta Diospa babulninpis, Israel, Juda pilyäcunäpis chucllachaycaćhäśhacunallaćhümi cayalcan. Mandäní Joabpis, lluy yanapänincunapis libri pampällaćhümi puñuyalcan. ¿Chaychun yaꞌañatac wasïman cutiycul jawca micuyal, upyayal, walmïwanpis puñuyäman? ¡Taytallay cawsayniqui-laycu chaytanuꞌa manamá lulayämanchu!” nin.

12Niptinmi David: “Chayurá cananpis chayllaćhu quïdacuy; wälamanñaćh cuticunqui” nin.

Niptin chay muyun Jerusalenllaćhu Urias cayaptinlämi,

13David jatun cumbiducta lulaycapul lluy shincächin. Chaynu jinäluptinpis Urias manam wasinta lilachu, sinuꞌa chay puydï täpä canancällaćhümi wäläña.

14Chay walantinmi David cartacta isquirbiycul quiquin Uriaswan Joabman apächila.

15Chay cartaćhümi niña: “Pilyäcunäpa puntanman, sumä-sumä pilyu cäninmanlä Uriasta ćhulaycuy. Chayćhu japallanta caćhaycäläliy wañülächinanpä” nil.

16Niptinmi Joab chay malcacta lluy cunćhälälil ćhïnicünincunap sumä-cama pilyänin caśhanman Uriasta ćhuläla.

17Chay malcapi pilyäcunäñatacmi Joabwan pilyapäcunanpä yalälälimun. Chayćhümi Davidpa waquin puydï pilyänincunapis wañülälin, chaynütac Het lädu Uriaspis wañucun.

18Chaynu pilyućhu lluy pasaśhancunätam Davidman Joab willaycachila.

19Chay willacücätam caynu yaćhaycachila: “Mandacücäta imanuy pilyu caśhantapis lluy manyallapi willapayta camacäluptiqui,

20ichapis piñacülul nishunqui: ‘¿Imapätan chay malcap murällanman anchap aśhuycapäculanqui? ¿Manachun yaćhapäculanqui murällanpi imawanpis ćhächipäcuśhunayquita imatá?

21¿Jerobaalpa chulin Abimelecta mayanmá wañüchila? ¿Manachun Tebes murällapi jatun tunay lumicta juc walmi jitalpaycämuśhanwan wañüchila imamá?Jue 9.53. Chayurá ¿imapïtá murällaman anchap aśhuycuyalcälanqui?’ nil. Chaynu tapuśhuptiquim ninqui: ‘Am taytäpa sirbïniqui Het lädu Uriaspis wañucunmi’ ” nil.

22Chaymi willacüca Davidman ćhaycul Joab nishallantanu lluy willaycula.

23Chayćhümi nin: “Ćhïnimäninchic pampäman yalalcamul llallicayalcämaptinpis malcanpa puncuncamam aticaćhälälilá.

24Chayćhu nunayquicunacta flïcha ćhächïnin ćhächimuptinmi achca wañuculcan. Het lädu nunayqui Uriaspis wañucunmi” nil.

25Niptinmi David: “Joabta callpanchaycamuy caynu nil: ‘Chay pasaśhancunapïta ama llaquicuyaychu; pilyućhu ispadaca mayanta camacaycunantapis manamá yaćhanchicchu. Aśhwanpa mas callpawan chay malcacta camacaycüluy’ ” nin.

26Chaynu wayapan Urias wañucuśhanta yaćhälulmi Betsabé awćhucula.

27Chay llaquicunan muyuncuna pasäluptinmi David palasyunman puśhalcachimul walminpäña uywaptin chulin nasïmula. Ñatac chaynu David lulaśhan Tayta Diospa śhunꞌunpächu manam cala.