2 Samuel 7 - Old Testament Quechua Wanca（QVW）

David allin cananpämi Tayta Dios limalicun 1Cro 17.1-27

1Chay palasyunćhu mandacü David yaćhayaptinñam, jinaman ćhïnicünincunawan Tayta Dios jawcacta caycachiptinñam,

2Diospa willacünin Natanta mandacü David nin: “Yaćhaśhayquinüpis cedropi luläśha palasyućhülämi yaꞌa yaćhayá; Tayta Diospa babulninñatacmi ichá carpallaćhu cayan” nil.

3Niptinmi Natan: “Allinmi, śhunꞌuyqui nishanmannuꞌari imactapis lulaycuy. Tayta Diosninchic anwanmi cayan” nin.

4Chay tutallatacmi Natanta Tayta Dios nin:

5“Uywayní Davidman lilcul caynu nimuy: ‘¿Tayta Dios yaćhananpä wasicta amchun lulaśha niyanqui imatá?

6Israelcunäta Egiptopi julamuśhäpïta canancama wasićhu manamá yaćhayculächu; wicman cayman apaycaćhaśha carpallaćhümi pulilá.

7Imay timpupis israelcunäwan pulishäćhu malcäta michiycunanpä caminaycüta ćhulalpis manamá mayan ayllullactapis cedro ilupi wasicta lulaycapamänanpä nilächu’ nil.

8Chayurá uywayní Davidman sumä munayniyu yaꞌa Tayta Dios nishäta niycamuy: ‘Israel malcäpa mandacünin canayquipämi uwish michishayquipïta julaycamulac.

9Mayta lishayquićhüpis anwanmi calá; lluy ćhïnicüniquicunactapis ñawpäniquićhümi camacaycülá. Cananñatacmi cay pachäćhu munayniyücunänu sumä lisisha canayquipä yanapäśhayqui.

10-11Chaynütacmi Israel malcäpä juc sityucta aclaycuśhä. Chaymanmi taycaycachishä manaña mayanpis cuyuchinanpä. Chayćhu manañamá mayanpis nï mana allin nunacunäpis ñacachinꞌañachu, Israel malcäćhu caminaycücunacta ćhulaycuśhá muyuncunänuꞌa. Amtañatacmi ichá ćhïnicüniquicunapïta jawcactaña cawsaycachishayqui. Wasïta lulapamayta munaśhayquipïtá aśhwanpa yaꞌa Tayta Diosmi wasiquita tacyalpachil milayniquipi mandacücunacta śhalcachishä.

12Cawsayniqui camacayninman ćhäluptin awquilluyquicuna caśhanman jamacunayquipä licuptiquipis yaꞌamari quiquiquip milayniquipïta pudirniqui mandacüta ćhulaycul tacyalpachishä.

13Paymi altuman julaycamayninwan wasicta lulaycapamanꞌa. Yaꞌañatacmi mandacuyninpa dispächunta wiña-wiñaypä tacyaycachishä.

14Yaꞌamari taytan caśhä; payñatacmi chulí canꞌa. Chaymi mana allinta lulaptinꞌa juc tayta asutishannu asutishä.

17Chaynu Tayta Dios lluy nishancunäta, licaśhancunätam Davidman Natan willaycula.

18Chaypïtam carpäćhu Tayta Dios caśhanman yaycuycul mandacü David nin: “Tayta Diosllay, ¿mayantá callá milaynïcunapis caycama ćhaycachisha capäcunäpä?

19Caycama ćhaycachimäśhayquica yanꞌallachun ampá; aśhta milaynïcunapis allin caycälinanpälämi limalicayämanqui. Tayta Diosllay, ¿yaꞌawan lulaśhayquinüchun lluy nunacunäwan lulaycunqui?

20Tayta Diosllay, ¿ima mastamá cay nunayqui David niycuśhunquiman? Cay nunallayquita am tuquictamari lisiyällämanqui.

21Cay sumä lulaśhayquicunäta limalicuśhayquimannümi, munaśhayquimannümi lulayculanqui. Chaycunactamari cay nunallayquiman camalaycachimanqui.

22¡Sumä jatun munayniyu Tayta Diosllay maynu sumä-sumämi canqui! Anman tincuꞌa manamá mayanpis canchu. Am Tayta Diosnuꞌa manamá juc canchu; ampïta lluy uyalipäcuśhäcunaca rasunpamá.

23¿Mayan nasyunmá Israel malcayquiwan tincuycachisha caycunman? Tayta Diosllay, anmi librayculanqui nunayquicunaña cananpä. Milagrucunacta lulaśhayquiwanmari paycunacta sumä lisishacta lulalanqui. Egiptopïta julamuśhayquićhümi juc nasyuncunacta taytachantinta-cama malcayquip ñawpäninpi alapacülanqui.

24Anmá Israel malcayqui wiñaypä cananpä tacyaycachilanqui; amñatacmi paycunap Tayta Diosnin cälunqui.

25“Chayurá Tayta Diosllay, cay nunallayquiman milaynintinman limalicuśhayquita wiña-wiñaypä tacyalpachillay. Nishayquimannuꞌari lulaycuy.

26Chayćha śhutiqui altuman juluycuśhä wiña-wiñaypä caycunꞌa. Jinaman lluypis nipäcunꞌam: ‘¡Sumä munayniyüca Israelpa Tayta Diosninmi!’ nil. Cay nunallayqui Davidpa wasin ñawillayquićhümá tacyaycunꞌa.

27Israelpa sumä munayniyu Tayta Diosnillay, anmi cay nunallayquip wasin mandacü cananpä nimälanqui. Chaymi nishayquica lulacacunanpä cay nunallayqui nićhacamullá.

28Tayta Diosllay, amllamari Tayta Dios canqui; limaśhayquipis rasuncällamá. Cay nunallayquimanmi lluy caycunacta limalicamälanqui.

29Cay nunallayquip wasinta allinpä licaycälillämay imaycamapis ñawillayquićhu capäcunäpa. Am Tayta Diosllämi limalicamälanqui cay nunallayquip milaynincuna yanapayniquiwan wiña-wiñaypä allinpä licaycuśha capäcunäpä” nil.