Zacarias 6 - Old Testament Quechua Wanca（QVW）

Tawa carritacunactam lican

1Chaypi yapa licalcuśhäćhümi ishcay ulꞌucuna brunsipïta cayäta licäñá. Chaycunap ćhawpinpïñatacmi tawa carritacuna sumä-cama cawallucunap aysäśha yalayämuña.

2Chay punta carritactam puca cawallucuna aysamuña, ishcay carritactañatac yana cawallucuna,

3quimsa carritactañatac yulä cawallucuna, tawa carritactañatac mulu cawallucuna aysamuña.

4Chayćhümi yaꞌawan limä anjilcäta nilá: “Taytallay, ¿imactam caycuna tantiachimanchic?” nil.

5Niptïmi niman: “Caycuna janay pachäćhu cä tawa waywacunämi. Chaycunamari yalayalcämun jinantin pachäta maquillanćhu cachï Tayta Diospa ñawpäninpïta.

6Yana cawallucuna aysaśhan carritam nurti läduman yaluyalcan, yulä cawallucunäñatac inti jiꞌalpunan läduman, mulu cawallucunäñatac sur läduman” nil.

7Chay sumä-cama cawallucunaca jinantin pachäćhu cürricaćhamunanpä wañupacucuyalcaptinmi anjilca nin: “Jinantin pachäman wayra lipäcuy” nil. Niptinmi jinantin pachäman pasaculcan.

8Chaypïtam ayalcamal anjilca niman: “Licay, nurti läduman lï cawallucunämi piñacuynïta chayman apayalcan. Chayman ćhaycachiptinmari jawcayaycú” nil.

Josueta curunawan umanman ćhulaśhantam lican

9Chaypïtam Tayta Dios niman:

10“Babiloniapïmi prïsu ćhämuśha cacuyalcan Heldai, Tobias, Jedaiaspis. Canan-pacha paycuna üru, illay apapämuśhancunäta mañalcul Sofoniaspa chulin Josiaspa wasinman apay.

11Chay illay, üru apaśhayquiwanꞌari curunacta lulaycachiy. Jinalcul Josadacpa chulin puydï sasirdüti Josuepa umanman ćhulaycuy.

12Jinalculmi ninqui: ‘Sumä munayniyu Tayta Diosmi nin: Cayćhümi “Chillqui” nishan nunaca cayan. Paymi sapipi chillquimul Tayta Diospa alawana wasinta śhalcachinꞌa.

13Awari, Tayta Diospa alawana wasinta śhalcachiptinmá sumäpa licaycuśha canꞌa. Chaymi mandananpä dispächunćhu täcunꞌa; sasirdütipis dispächunpa lädunćhümá täcunꞌa. Ishcayninmi tuquillap apanaculcanꞌa.

14Chay curunañatacmi Tayta Diospa alawana wasinćhu quïdanꞌa Helem, Tobias, Jedaias, jinaman Sofoniaspa chulin Henpis yalpaśha capäcunanpä’ nil.

15“Nunacunaca calu-calucunapïmá śhapämunꞌa Tayta Diospa alawana wasinta śhalcachiyta yanapapäcunanpä. Chaynu lulacacuptinmari sumä munayniyu Tayta Dios amcunaman caćhamäśhanta yaćhapäcunqui. Caynu pasaycunꞌa Tayta Diosniqui nishanta uyaliculcaptiquimá” nil.