Proverbios 22 - Old Testament Quechua Wanca（QVW）

1Sumä cäniyu caypïtá mas allin cayan allin nunapä lisisha caymi;

illaycäpïtapis, ürupïtapis mas allin cayan allinpä licaśha caymi.

2Rïcupis wacchapis chaynüllamá cayalcan;

ishcayninpis Tayta Diospa lulaycuśhallanmá.

3Allin tantiayniyüca mana allincäta licälulꞌa aśhucunmi;

sumä-sumä mana tantiayniyücäñatacmi ichá chayman yaycul ñacayninta talin.

4Mana nunatucullal Tayta Diosta manchacuptinꞌa imapis cäniyüta,

altuman juluycuśhacta, jinaman cawsayniyütamá caycachin.

5Juyu nunap pulinanćhuꞌa caśhacunawan trampacunallam cayan;

allin cawsayta munäcäñatacmi ichá chaycunapi aśhucun.

6Chuliquita uchuyllanpïta allincäta yaćhaycachiy;

chaymi awquishyälulpis yaćhaśhallanćhu tacyaycunꞌa.

7Rïcu nunam wacchacunäpa duyñun;

mañacücämi mañäninpa sirbïnin licalin.

8Mana allinta talpücá, mana allinllactamá cusichanꞌa;

mana allinta lulananpä cä garutinpis camacaycüśhamá canꞌa.

9Llaquipaycü nunaca, wacchacunäta micunanpä

uycüca allinpä licaycuśhamá caycunꞌa.

10Nunatucüśha nunacta alupacüluptiquiꞌa piñanacuypis,

ćhïninacuypis, palanacuypis camacanꞌamá.

11Cuyaśhan chuya śhunꞌuyücämá allin limayninwan

mandacücäpa śhunꞌunpänu caycunꞌa.

12Yaćhaycätamá Tayta Dios ñawillanćhu caycachin;

ipanchäcunäpa lulay munaśhancunactañatacmi ichá mana cäman ćhulälun.

13Illa nunaca mana lulay munayninwanmi nin:

“Liyunmi caminućhu cayan; yalüluptiꞌa micämanmanćha” nil.

14Mansibädu walmip shiminꞌa luli-luli püsunümá;

chayman palpupäcun Tayta Diosta piñachïcunämá.

15Luclu cayta pinsayca müsucunap śhunꞌunćhümá cayan;

chaypïta lawćhaycunapä asutimá libraycun.

16Sumä cäniyüman muyuyta munayninwan wacchacunäta

usuchïcá ütac rïcucunäman uycücá pasaypi wacchamanmi muyunꞌa.

Yaćhäcunäpa limapaynincuna

17Canan má, yaćhayniyücäpa limapayninta linliquita quićhaycul uyaliy;

yaćhachicuyninta śhunꞌuyquiman ćhulaycuy.

18Chayta umayquiman ćhulaycuśhayquica sumä allinmari caycunꞌa;

imay ürapis limalcunayquipä shimillayquićhümá caycunꞌa.

19Chaymi canan amtapis yaćhaycachic

Tayta Diosllaman masïsu chalapacunayquipä.

20¿Manachun quimsa ćhunca (30) limapaycunacta,

yaćhachicuycunacta isquirbiycälimulac imamá?

21Chaywanmá imanuy rasunca caśhantapis yaćhaycunqui.

Chayćha mayan tapucuśhüniquitapis rasuncäwan niycunqui.

1

22Waccha nunäta waccha caśhan-laycu ama waycayaychu;

mana mayanllanpis yanapänin cäcunäta quija allichäcunäćhu ama ñacachiychu.

23Paycunactá Tayta Diosmari śhalcunꞌa;

waycäcunätañatacmi ichá cawsaynintapis waycalpülunꞌa.

2

24Juclla piñacü nunawan ama jucllachacuychu;

juclla rabyacü nunawan cuscalla ama puliychu.

25Yanꞌalmi mana allin lulaynincunacta atichinquiman,

jinal quiquillayqui cunca cuchuyniquita ashicülunquiman.

3

26Jucpi ama limalicuychu;

jucpa mänunta päganayquipä ama niyaychu.

27Mana päganayquipä captinꞌa

cämayquitapis quitäśhunquimá.

4

28Awquilluyquicuna ćhululchaśhan

culindancunacta ama aśhuchiychu.5

29¿Lulayninta sumä allin lulayä nunacta licalanquichun?

Chaynu nunaca mandäcunäpa puntanćhülämá caycunꞌa;

manamá yanꞌal nunacunallap puntanćhüchu.