2 Reyes 9 - Old Testament Quechua Wanca（QVW）

Israel lädućhu mandacüpä Jehutam ćhulapäcun

1Chaypïtam jucnin willacü-masinta ayalcul willacü Eliseo nin: “Linayquipä allichacuy. Cay butïlla asayticta apaculcul Galaad lädućhu Ramot malcaman liy.

2Ćhälulmi Nimsip willcan, Josafatpa chulin Jehuta ashinqui. Paytam juccunäpïta japächalcul juc cuartuman puśhanqui.

3Chayćhümi asayticta umanman jillpuycunqui cay nil: ‘Tayta Diosmi nin: “Israel lädup mandacüninpämi japächaycuc” nil. Nilculmi puncucta quićhaycul mana śhaycuycullalña ayicunqui’ ” nil.

4Niptinmi Galaad lädu Ramot malcaman willacü müsuca licun.

5Ćhänanpämi pilyäcunap puydïnincuna juntulalcäña. Chayćhümi willacüca nin: “Taytay, willaycunacmi cayan” nil.

Niptinmi Jehu: “¿Mayannïta?” nin.

Niptinmi willacüca: “Taytay, am puydïcätam” nin.

6Niptin Jehu cuartuman yaycuycuptinmi chayćhu umanman asayticta jillpuycula cay nil: “Israelpa Tayta Diosninmi nin: ‘Israel malcäpa mandacüninpämi japächaycuc.

Nilculmi willacüca puncucta quićhaycul ayicun.

11Jehuñatacmi chay cuartunpi yalulcul mandacüninpa puydïnincunawan juntunacuśhanman cutila. Chayćhümi paycuna nipäcun: “¿Allinchun cälun? ¿Chay lücuca imapämi ayaśhuñanqui?” nil.

Niptinmi Jehu: “Chay nuna imanuy caśhantapis, limaśhantapis yaćhapäcunquiñamari” nin.

12Niptinmi nipäcun: “Ama casquipapämaychu. Nishuśhayquita willapämay” nil.

Niptinmi Jehu nin: “Caytanümi nimäla: ‘Tayta Diosmi caynu nin: Israel lädup mandacünin canayquipämi japächaycuc’ ” nil.

13Niptin-pacham puydïcunaca Jehupa puntanćhu gradacunäman sacunnincunacta maśhtapäcula. Jinalculmi curnitillacta tucalcul callpa-callpawan bïbatityacuyalcan: “Jehumi mandacüca” nil.

Israel lädup mandacünin Joramtawan Ocoziastam Jehu wañuchin

14Jinaptinmi Nimsip willcan, Josafatpa chulin Jehu Israel lädup mandacünin Jorampa cuntran śhalcula. (Má, chay timpuñatacmi Israel lädućhu lluy pilyäcunäwan Joram difindinacuyalcäla Galaad lädu Ramot malcacta Siriap mandacünin Hazaelpïta.

15Chaynu Siriap mandacünin Hazaelwan pilyaśhanćhümi Joramta dañädüla. Jinalmi jampichicü Jezreel malcacta cutila.) Chayćhümi paywan cäcunäta Jehu nin: “Mandacü canäta rasunpa munapäculꞌa amari cay malcapi mayanpis willaycü Jezreelman yalupäcuchunchu” nil.

16Chaypïtam Jehu pilyananpä carritanman ishpiculcul Jezreelman pasacun. Chayćhümari Joram dañäduncunapi jampichicuyäla. Chayćhütacmi Juda lädup mandacünin Ocoziaspis Joramta watucü lishanćhu cayäla.

17Ñatac Jezreel malcacta türrićhu täpäcämi licälun lluy nunancunawan Jehu śhacayämüta. Chaymi ayaycaćhacuyan: “Pilyäcunam śhacayämun” nil.

Niptinmi Joram: “Jucnin sillädacta ayalcul caćhäluy allinpä ütac mana allinpä śhamuśhantapis tapumunanpä” nin.

18Niptinmi sillaculcul licun Jehuta tapumü: “Mandacücämi nin: ‘¿Allinpächuśh śhayämunqui icha manachuśh?’ ” nil.

Niptinmi Jehu: “Chay amtá ¡imam ucuśhunqui! Ipäman ćhulacamuy yaꞌawan linapä” nin.

Malcacta türrićhu täpäcäñatacmi nin: “Caćhaśhayquica paycunaman ćhälunñam. Ñatac manam cuticälimunchu” nil.

19Chaymi mandacüca juc sillädactañatac paycunaman caćhälun. Paypis ćhayculmi nin: “¿Allinpächuśh śhayämunqui icha manachuśh?” nil.

Niptinmi Jehu: “Chay amtá ¡imam ucuśhunqui! Ipäman ćhulacamuy yaꞌawan linapä” nin.

20Malcacta täpäcäñatacmi yapa nin: “Caćhaśhayquica paycunaman ćhälunñam. Paypis manatacmi cuticälimunchu. Ñatac Nimsip willcan Jehućha carritacta manijamüca; lücunümari manijäcayämun” nil.

21Niptinmi Joram: “Carritäman cawallucunäta watapäcuy” nin.

Chaynu watäläliptinmi Israel lädup mandacünin Joramwan Juda lädup mandacünin Ocozias carritanwan-cama liculcan. Jinalmi Jezreel malcayu Nabotpa ćhaclanćhu Jehuwan tincülälin.

22Chayćhu Jehuta licälulmi Joram nin: “Jehu, ¿allinpächun śhayämunqui icha manachun?” nil.

Niptinmi Jehu: “¿Ima jawca allintá cälunman mamayqui Jezabel waticacuyaptin, rüjacuycunacta ćhapayaptin?” nin.

23Niptinmi muyulcul Joram ayicuyan: “Ocozias, wic ¡ipanchämanchicmá! ¡ipanchämanchicmá!” nil apalcaćhaśhtin.

24Jehuñatacmi flïchanta chalalcul Joramta ćhächin. Chaymi waśhanpa yaycülul śhunꞌunpa pasäluptin carritanćhu wañülun.

25Jinaptinmi yanapänin Bidcarta Jehu nin: “Jululcul Jezreel malcayu Nabotpa ćhaclanman wicapaycüluy. Yalpayꞌari papänin Acabpa ipanta carritanchicwan liyaptinchic Tayta Dios paypa cuntran caynu nishanta:

26‘Yaꞌa Tayta Diosmi ní: maynümi anyan licalá Nabotpawan chulincunap yawarninta, chaynümi cay quiquin ćhaclaćhu tincüniquiman mućhuycachishayqui’ nil.1Rey 21.19. Chayurá Tayta Dios nishannu jululcul Nabotpa ćhaclanman wicapaycüluy” nilmi nila.

27Chayta licälulmi Juda lädup mandacünin Ocozias Bet-haganman lï caminup ayicun. Jehuñatacmi aticun: “Chay ayicätapis wañüchiy” nishtin.

Chaymi Ibleam malcap wätan Gur wichaycäćhu ćhächin. Ocoziasñatacmi Meguido malcaman ayicul chayćhüña wañucula.

28Chaypïtam ayäta yanapänincuna carritawan Jerusalenman apaculcan. Chayćhu awquilluncuna pampaläśhan Davidpa Malcan nishanmanmi pampälälila.

29Cay mandacü Ocozias Juda lädućhu mandacuyta allaycula Acabpa chulin Joram ćhunca jucniyu (11) wataña Israel lädućhu mandacuyaptinmi.

Jezabeltam Jehu wañuchin

30Chaypïtam Jezreel malcacta Jehu licun. Chaynu śhamuśhanta Jezabel yaćhälulmi ñawincunacta pintaculcul, ächancunacta allichaculcul bintananpa licapayämula.

31Malcap puncunta Jehu yaycaycayämuptinmi Jezabel nin: “Mandacüniquita wañuchï Zimri,1Rey 16.8-12. ¿allinllachun cayanqui?” nil.

32Niptinmi bintanaman Jehu licalcul: “Yaꞌa parti ¿mayantan cayan?” nin.

Chayćhümi ishcay quimsa puydï yanapänincuna anculpaycälimun.

33Paycunactam Jehu: “Chay walmicta jitalpapämuy” nin.

Chaynu jitalpaycälälimuptinmi pilamanpis cawallumanpis yawarnin lluy paćhcäla. Carritacta aysä cawallucunämari jaluy pawäla.

34Chaypïtam micü, upyä Jehu pasacula. Jinalculmi nin: “Chay mana allinpä licaśha walmïta pampaycälimuy; mandacücäpa chulinmari” nil.

35Chaynu pampamü lipäculmi uma tullullanta, ćhaquillanta, maquillantaña talïlälin.

36Chaymi cuticulcan Jehuta willaycälimü. Payñatacmi nin: “Tayta Dios nishanmi lulacacülun. Paymi Tisbe malcayu willacünin Eliaswan nichila: ‘Jezreel ćhaclaćhu allꞌucunam Jezabelpa aychanta micapäcunꞌa.1Rey 21.23.

37Wanunümi Jezabelpa aychan Jezreel ćhaclapä canꞌa. Manamá mayanpis lisiycunꞌañachu: “Caymi Jezabel” ninallanpäpis’ ” nil.