Ezequiel 28 - Old Testament Quechua Wanca（QVW）

Tiro malcap mandacüninpa cuntranmi nin

1Chaypïta Tayta Diosmi niman:

2“Wañucülla nuna, Tiro malcap mandacüninta niycuy yaꞌa Tayta Dios nishacta:

“ ‘Nunatuculculmi am niyanqui:

“Yaꞌa diosmi cá.

Lamarpa ćhawpinćhu cä dispächućhülämi täcuyäpis” nil.

Ñatac am nunallamá canqui; manamá Dioschu,

masqui Tayta Dios tantiaśhanmannu tantiätuculpis.

3¿Danielpïpis mas yaćhayniyüchun am cayanqui imatá?

¿Lluy pacäśha cäcunätapis lisiyanquichun imamá?

4Awari, yaćhayniquiwanmi cäniquicunacta juntuytá juntuculanqui;

tantiayniquiwanmi illaytawan üructa pilwaculanquipis.

5Sumä yaćhayniyu calmi nigusyuyquicunawan

cäniquicunacta milächilanqui.

Chay cäniquicunallawanmá

am nunatucülunqui.

6“ ‘Chaynu captinpis Tayta Diosmi nin:

“ ‘¿Dios tantiaśhanmannülämá am tantiätucuñanqui aw?

7Chaymi juyu-cama juc nasyuncunätalä cuntrayqui śhalcachishä.

Paycunamá tuqui-tuqui cayniquip, yaćhayniquip cuntran ispädanta julupäcunꞌa.

Sumä cayniquitamá millachicuyman muyülächinꞌa.

8Wañüśha cäcunämanmá ćhälälichishunqui.

Lamarcäpa ćhawpinćhümá wañupäcunqui.

9¿Wañuyalcächishuptiqui “Tayta Diosmi cá”

niyanquimanchun imatá?

Chay wañuchishüniquip maquinćhu

manamá dioschu canqui, sinuꞌa nunallam.

10Mana siñalachicüśhacunänümá wañunqui.

Mana lisishayqui nunacunap maquinćhümari wañunqui.

Yaꞌa Tayta Diosmari niyá’ ” nil.

11Chaypïta Tayta Diosmi niman:

12“Wañucülla nuna, llaquicuy taquicta Tiro malcap mandacüninpä taquiycuy, yaꞌa Tayta Dios nishacta:

“Amćhu ima mana allinllapis manamá cayculachu.

Tuquish tuquishninmi calanqui.

Yaćhayniyu, sumä allin tincüllanmanmá cayculanquipis.

13Tayta Diospa Eden wirtanćhümá cayälanqui.

Imaymana tuqui-cama aläja lumicunawanmi

müdanayquipis adurnäśha cacula: cornalina,

topacio, jaspe, crisolito, berilio, onice,

zafiro, carbunclo, esmeralda, jinaman üruwanpis.

Chaycuna lulaśhuśhayqui muyunpïtañamá

ampäña alistäśha cala.

14Amta, querubin anjiltanümi ćhulayculac;

Tayta Diospa ulꞌunmannümi ćhulayculac.

Chay chipipicyayä śhanśha lumićhümá pulï calanqui.

15Camaśha caśhayqui muyunpi

aśhta mana allinca amćhu canancamamá

mana juchayülla calanqui.

16Ñatac alli-alli nigusyucta lulaśhayquipam

supayapachinacuywan apachicülul juchacülanqui.

Chaymi am querubincäta ulꞌüpïta yaꞌa Tayta Dios wicapälac;

chay chipipicyayä śhanśha lumïpïta alapacülac.

17Tuquish cayniquiwanmi nunatucülanqui.

Sumä caśhayquiwanmá yaćhayniquita

mana allinman muyüchilanqui.

Chaymi pampaman wicapayculac;

mandacücunäpa puntanćhu

pinꞌayćhu canayquipä ćhulayculac.

18Mana allin lulayniquicunawan, nigusyuyquicunaćhu

ingañacuyniquicunawanmá alawana wasiquita

millachicuyman muyüchilanqui.

Chaymi camacaycüśhunayquipä ninacta anman yalachimulá.

Lluy lisishüniquicunap ñawquinmá ućhpaman muyüchilac.

19Chaynüta licalmi lluy lisishüniqui

malcacunaca äśhalayllaman camapäcun.

Pasaypi llaquinaśhmanmá muyülunqui.

Wiña-wiñaypäñamá chincacunqui” nil.

Sidon malcap cuntranmi nin

20Chaypïta Tayta Diosmi niman:

21“Wañucülla nuna, Sidon malcaman ñawiquita ćhulaycul paypa cuntran willacamuy,

22yaꞌa Tayta Dios caynu nishäta:

“ ‘Sidon malca, cuntrayquim yaꞌa cayá.

Cäraycuptí, chuya sumä caśhäta camalachicuptïmá

Tayta Dios yaꞌa caśhäta lluy licäcunaca yaćhapäcunꞌa.

Chaynüpam ampa ñawpäniquićhu alawaśha caycuśhä.

23Anmanmi sumä ishyaycunacta caćhamuśhä;

caminuyquicunaćhümi yawarlla maśhtaläcunꞌa.

Wicpi-caypi ispädawan ćhächiptïmi

cällicunäćhu camacaycüśhallaña maśhtaläcunꞌa.

Chaynüpam Tayta Dios yaꞌa caśhäta lluy yaćhapäcunꞌa.

24“ ‘Jinaptïmi Israel läducunaca manaña ñacanꞌachu.

Muyülïninćhu cä malcacunaca manañamá

caśha tucsïcänu, caśha lawćhacänu canꞌañachu.

Chaynüpam Tayta Dios yaꞌa caśhäta lluy yaćhapäcunꞌa’ ” nil.

25Chaypïtam Tayta Dios niman: “Jinantin nasyuncunaćhu chiꞌisha capäcuśhanpïtam Israel malcacta juntumuśhä. Jinaycuśhäpamari chay nasyuncunap ñawpäninćhu sumä caynïta camalaycachishä. Jinaptïmi sirbïní Jacobman uycuśhá allpaćhu Israel läducunaca yaćhapäcunꞌa.

26Chay allpaćhümi jawcallaña yaćhapäcunꞌa, wasicunactapis śhalcachipäcunꞌa, üba lantacunactapis talpupäcunꞌa. Chaynu capäcunꞌa muyülïninćhu alapacü malcacunäta cäraycul mućhuycachiptïmá. Chaynüpam lluy nasyuncunaca yaćhapäcunꞌa Israelpa Tayta Diosnin yaꞌa caśhäta” nil.