Salmos 68 - Old Testament Quechua Wanca（QVW）

Llallipäcuśhanpïmi Israelcunaca taquipäcunDavidpa isquirbishan taqui; taquïcunäpa puydïninpämi.

1Tayta Dios śhalcuptinꞌa cuntrancuna wicta-cayta ayiculcächun.

Ćhïnicünincuna ñawpäninpïta ayiculcächun.

2Untayca waywäćhu chincäcänu chincaculcächun.

Ninäćhu sïra chullücänu chullülälichun.

Chaynu mana allin nunacunaca Tayta Diospa ñawpäninpi chincälälichun.

3Allin nunacunäñatac cushiculcächun.

Tayta Diospa ñawpäninćhu

cushiculcal paćhcaycaćhapäcuchun.

4Tayta Diosta alawapäcuy; śhutinta taquicunawan alawapäcuy.

Pucutaycäpa jananćhu cäcäta altuman julaycäliy.

Paypa śhutin Tayta Diosmi.

Paypa ñawpäninćhu cushiculcayꞌari.

5Chuya wasinćhu yaćhäca mana taytayu-mamayücunäpa taytanmi.

Japanyäśha walmicunäpa śhalcüninmi.

6Jitäśha nunacunäta Tayta Diosmi juc wasicta uycun.

Wićhaläcunäta allinllactamá juluycun.

Cullu linlicunäñatacmi ichá chunyä chaqui allpaćhu yaćhapäcunꞌa.

7Am Tayta Diosllá,

malcayquip puntanta ñawpal chunyäcäpa puliptiquim, Selah

8allpaca śhaśhäla, tamyapis jillpuypa-jillpumula.

Israelcunap Tayta Diosninpa puntanćhu Sinai ulꞌupis chucchülamá.

9Am Tayta Diosllämi, aclacuśhayquiman tamyacta jicutaycachimulanqui.

Pasaypi chaquïsha allpätapis licaćhacächimulanqui.

10Chay allpamanmá malcayquita ćhulayculanqui.

Tayta Diosllay, llaquipayniquićhümá wacchacunäta yanapayculanqui.

11Tayta Diosmi willacuyninta niycamula.

Chaytamá achca-achca walmicuna willaculcäla:

12“Mandacücunaca lluy pilyänintin-camamá ayiculcan” nil.

Chay walmicunämari ćhïnicüninpa maquinpi waycaśhancunäta wasicunäćhu aypunaculcäla.

13Illaywan laꞌaśha ulpaypa laplancunactawan üruwan laꞌaśha laplancunactamá aypunaculcäla.

Jinayalcaptin amcunañatacmi ichá uwishpa canćhancunaćhu jawca puñuculcälanqui.

14Sumä munayniyu Tayta Dios mandacücunäta chiꞌichiptin

Salmon ulꞌuman laśhta maśhtaläśhannümá cacula.

15Basan ulꞌucunaca maynu altu-altumá.

Basan ulꞌucunaca sumä-cama puntayümá.

16Am, altu-cama ulꞌucuna

¿imapïtá Tayta Dios yaćhananpä aclacuśhan ulꞌüta ćhïnicuywan licapayalcanqui?

Chayćhümá Tayta Dios wiña-wiñaypä yaćhanꞌa.

17Tayta Dios pilyananpä carritancuna walangantin-walangantinpamá cayan.

Chaywanmari Sinaipïta alawana wasinman pay śhamula.

18Am Tayta Diosllá,

lluy llallishancunäta puśhaculcul altunninmanmá puśhaculanqui.

Nunacunäpa lulaynincunapïmá am ćhasquiyculanqui.

Pasaypi cullu linlicunäpis ćhaquiquimanmá uyshuycälimula

amwan yaćhapäcunanpä.

19Tayta Dios altuman juluycuśha cachun.

Salbaycamäninchic Tayta Dios

walan-walanmari yanapaycamanchic. Selah

20Tayta Diosmá salbaycamäninchic.

Tayta Diosmá wañuycäpi libraycamäninchic.

21Tayta Diosmá ćhïnicünincunacta umaćhu uycülunꞌa.

Jinalla juchacta luläcätamá umanta partïlunꞌa.

22Tayta Diosmi nin:

“Basanpïtam ćhïnicüniquicunacta cutichimuśhä.

Luli-luli lamarcapïtam cutichimuśhä,

23paycunap yawarninman ćhaquiquita challpunayquipä,

allꞌuyquicunapis lläwapäcunanpä” nil.

24Tayta Diosnillay, fïlalla nunayquicuna liyalcätam licayá.

Mandacü Tayta Diosnillay, lluymá chuya wasiquiman liyalcan.

25Taquïcunämi ñawpayalcan, tucäcunäñatacmi ipanta,

pandirïtacta tucä wamlacunäñatacmi ćhawpicta liyalcan.

26Juntunacüśha cäcuna Tayta Diosta altuman julaycäliy.

Israelpa milaynincuna Tayta Diosta alawaycäliy.

27Śhullca Benjamin puntanta

ñawpaptinmi Juda, Zabulon,

Neftali ayllucunap puydïnincunapis lipäcula.

28Tayta Diosnillay, sumä munayniquitari licaycälichillämay.

Yaꞌacunawan punta lulaśhayquinuꞌari

cananpis munayniquita licaycälichillämay.

29Jerusalenćhu alawana wasiqui-laycumá

mandacücunaca śhunꞌunpi yalamuśhanta uycälishunqui.

30Pilyayllapä cä juyu uywanu śhuꞌuśh-śhuꞌuśhcunällaćhu cäcunäta anyäluy,

piña türucunänu, malta türucunänu cäcunäta anyäluy.

Imapis cäniyu cayta munayninwan malcacunäta uyshulächïcäta uyshulächiy.

Pilyaypi wañupacü malcacunäta chiꞌichiy.

31Egiptopïmi sumä puydïcuna śhapämun.

Etiopia läducunäpis Tayta Diosmanmi maquinta chacchalapäcun.

32Jinantin pachäćhu nasyuncuna Tayta Diosta altuman juluycapäcuy.

Taquicunawan Tayta Diosta alawapäcuy. Selah

33Janay pachäpa altunninćhu una-unaypi cäcäta alawapäcuy.

Sumä-sumä limayniyücäta uyalipäcuy.

34Tayta Diospa munayninta lisipäcuy.

Paymi Israelćhu sumä-sumäca.

Munaynin janay pachäpïpis mas-masmi.

35Tayta Diosnillay, maynu sumä manchaymá chuya wasiquićhu cayanqui.

Israelcunäpa Tayta Diosninmá malcanta callpactawan munayta uycüca.

¡Tayta Dios allinpä licaycuśha cachun!