1 Cronicas 12 - Old Testament Quechua Wanca（QVW）

Davidta yanapänanpämi pilyäcuna ćhäpämun

1Má, Cispa chulin Saulpi pacacüśham Siclag malcaćhu David cayäla. Chaymanmi alli-cama achca pilyäcuna Davidta yanapapäcunanpä lipäcula.

2Paycuna allï-ichü maquinwan flïchacta ütac waracacta ćhächipäcunanpäpis ishpisha-camam capäcula.

Chayurá Benjamin ayllupi cä Saulpi caycunam cala:

3Gabaa malcayu Semaapa chulin Ahiezerwan Joas. (Ahiezermi puydïca cala.)

Jinaman cala Azmavetpa chulin Jezielwan Pelet,

Anat lädu Beracawan Jehu,

4Gabaon lädu Ismaias. Paymi quimsa ćhunca alli-camacunäpa puydïnin cala.

Jinaman cala Jeremias, Jahaziel, Johanan,

Gedera malcayu Jozabad,

5Eluzai, Jerimot, Bealias, Semarias,

Haruf malcayu Sefatias,

6Core lädu Elcana, Isias, Azareel, Joezer, Jasobeam,

7Gedor malcayu Jerohampa chulin Joelawan Zebadiaspis cala.

8Chaynütacmi David sumänin cäcäćhu cayaptin Gad malcapïpis waquincuna payman jucllachaculcäla. Paycunapis alli-cama pilyäcuna, atajachicuwan lansancunawan armäśha, liyunnu sumä-cama, luychunu bïbu-camatacmi capäculapis.

9Paycunamari capäcula: puydï Ezer, jinaman Obadias, Eliab,

10Mismana, picha cä Jeremias,

11Atai, Eliel,

12Johanan, Elzabad,

13ćhunca cä Jeremias, Macbanaipis.

14Paycunamari Gad lädu pilyäcunäpa puydïnincuna capäcula. Mas callpayücäpa walanga (1,000) cachacucunap callpannümi callpan cacula. Pishi callpayücäpapis paćhac (100) cachacucunap callpannümari callpan cacula.

15Paycunamá allaycuy quillaćhu Jordan mayuca wicninpa cayninpa llüllayaptin pasapäcula. Jinalculmi pampaćhu yaćhäcunäta inti ishpimunan, inti jiꞌalpunan läducunaman aticaćhälälila.

16Chaynütacmi Benjamin, Juda ayllucunapi waquinnin pilyäcunapis David pacaläśhancäman jucllachaculcä lipäcula.

17Chaymi David yalalcamul nin: “Rasunpa yanapäní śhapämuptiquiꞌa llapan śhunꞌüwanmi jucllachacalcämunayquipä ćhasquiycälic. Ñatac allincällacta lulayaptïpis ipanchalcul ćhïnicünïpa maquinman ćhulaycapämänayquipä śhapämuptiquiꞌa ¡awquillunchicpa quiquin Tayta Diosnin licaycul mućhuycälichishunqui!” nil.

18Chay quimsa ćhunca (30) pilyäcunap puydïnin Amasaiman Tayta Diospa Ispiritun śhalcamulmi limachila:

“¡David, anmanmi śhayalcämú!

¡Isaipa chulin, anwanmi cayalcá!

¡Ampis yanapäniquicunapis jawca caycäliy!

¡Tayta Diosniquimari yanapäśhüniqui!” nil.

Chaymi David ćhasquiycul pilyänincunaćhu puydïnincunapä ćhulaycula.

19Chaynütacmi Manases ayllupi waquinnin pilyäcuna Davidman jucllachaculcäla; chayćhu Filisteo läducunäwan jucllachacuyculmi Saulwan pilyananpä cayalcäla. (Má, Davidꞌa manam pilyä lilachu. Filisteo läducunäpa puydïnincunamari limanacaycälil mićhaculcäla: “Cayꞌa llapanchicta wañulcachilćha mandacünin Saulwan allin caycunꞌa” nil.)

20Siclag malcaman David cutiptin, Manases ayllupi pilyä jucllachacücunaca caycunamari: Adnas, Jozabad, Jediael, Micael, Jozabad, Eliu, Ziletaipis. Paycunamari Manases ayllunćhu walanga-cama (1,000) pilyäcunap alli-cama puydïnincuna capäcula.

21Cay alli-cama pilyäcunämi, puydïcunämi chay suwacunäpa cuntran pilyućhu Davidta yanapapäcula.

22Muyun-muyunmari mas pilyäcuna Davidman jucllachaculcäla. Chaynüpamá Tayta Diospa sumä pilyänincuna achca-achcaman licalïlälila.

23Canan má, Hebron malcaćhu David cayaptinmi Tayta Dios nishannu, Saulpa pudirnin mandacü ćhulaśha cananpä, alli-cama pilyäcunaca juntunaculcäla. Paycunam capäcula:

24Juda ayllupi süta walanga pusä paćhacniyu (6,800) nunacuna atajachicuyu, lansayü-cama pilyaypä ishpisha-ishpisha,

25Simeon ayllupïñatacmi anćhish walanga paćhac (7,100) alli-cama pilyäcuna,

26Levi ayllupïñatacmi tawa walanga süta paćhac (4,600) nunacuna,

27Aaronpa milaynincunapïñatacmi quimsa walanga anćhish paćhac (3,700) nunacuna, puydïnin Joiadawan capäcula.

28Chaynütacmi allinnin pilyä müsu Sadocpis, ayllunćhu cä ishcay ćhunca ishcayniyu (22) puydïnincunawan capäcula.

29Benjamin ayllućhu cä Saulpïñatacmi quimsa walanga (3,000) nunacuna. Paycunamari Davidman manalä jucllachacuśhancama Saul-llaman masïsu chalapaculcäla.

30Efrain ayllupïtañatacmi ishcay ćhunca walanga pusä paćhacniyu (20,800) alli-cama nunacuna; ayllunćhüpis sumä lisisha-camam capäcula.

31Ćhawpi Manases ayllupïtañatacmi ćhunca pusäniyu walanga (18,000) nunacunaca capäcula. Paycunamari śhapämula mandacüpa Davidta ćhulaycapäcunanpä.

32Isacar ayllupïtañatacmi ishcay paćhac (200) puydïcuna. Paycunamari timpucunäta allicta tantiäcuna, jinaman israelcunäpa ima lulaynincuna caśhantapis tantiä-cama capäcula. Paycunamari lluy aylluncunap puydïnincuna capäcula.

33Zabulon ayllupïtañatacmi picha ćhunca walanga (50,000) pilyananpä imaymana armancunacta apacälälisha, mana ishcayyällal Davidta yanapapäcunanpä listu-cama capäcula.

34Neftali ayllupïñatacmi walanga (1,000) puydïcuna, quimsa ćhunca anćhishniyu walanga (37,000) nunancunawan capäcula, lluypis atajachicunwan-cama lansancunawan-camamari.

35Dan ayllupïñatacmi ishcay ćhunca pusäniyu walanga süta paćhacniyu (28,600) pilyapäcunanpä listu-cama capäcula.

36Aser ayllupïñatacmi tawa ćhunca walanga (40,000) pilyapäcunanpä capäcula.

37Jordan mayup chimpanćhu cä Ruben, Gad, ayllupi, jinaman Manases ćhawpi ayllupïñatacmi paćhac ishcay ćhunca walanga (120,000) pilyäcuna imaymana armancunawan listu-cama capäcula.

38Lluy paycunamari pilyananpä listu-cama Hebron malcaman lipäcula, Israel lädup mandäninpa Davidta mana ishcayyällal ćhulapäcunanpä. Chaynüllam juc Israel läducunäpis chaycusca mandacüninpä ćhulapäcula.

39Chay Hebronćhu cä aylluncuna micuycunacta apapämuptinmi, chayćhu lluy cäcunaca Davidwan quimsa muyunlä micuśhtin upyaśhtin capäcula.

40Chaynütacmi matäninćhu yaćhä Isacar, Zabulon, Neftali ayllucunapïpis micuycunacta apapäcula aśhnucunawan, camïllucunawan, mulacunawan, wäcacunawanpis. Achca-achcactamari apapäcula: arinacunacta, culpachäśha ïguscunacta, päsaśhcunacta, bïnucunacta, asayticunacta, wäcacunacta, uwishcunactapis. Chaynu apapäcula Israelćhu sumä-sumä cushicuy cacuptinmari.