1Israel, Tayta Diosniquiman cuticamuy.
Juchayquimá lluy palpüchishunqui.
2 Tayta Diosman cutiycamulꞌari caynu niycuy:
“Lluy mana allin lulaylläta pampachaycallämay.
Amta alawaycuśhäta allinpari ćhasquiycallämay.
3Chay Asiria lädu libraycuyta manañamá atipapämanꞌachu
nïtac gïrrapä cä cawallücunapis.
Chaynütac maquïcunawan lulapäcuśhäcunactapis
manañamá ‘diosnïmi’ niyalcäśhäñachu.
Mana taytayu-mamayüca amllaćhüñamari llaquipaycuyta taliycälillan” nil.
4Tayta Diosmi nin:
“Cullucuycul japächacuśhanca ishyaynümá cayan;
chayta yaꞌamari allinyaycachishä.
Śhunꞌüpi yalamuśhallanwanmari cuyaycuśhä.
Piñacuyní manalcülunñamá.
5Śhullinümá Israelpa caycuśhä.
Liryunümá pay waytaycälinꞌa.
Libano ulꞌüćhu cedrocuna sumä sapichacälälisha
caśhancänümá caycälinꞌa.
6Pallaynincunapis sumämi wiñaycunꞌa.
Sumä cayninpis ulïbus lantacunänümá caycunꞌa.
Libanoćhu cedro lantacunap tuqui aśhnayninnümá caycunꞌapis.
7Llantuynïćhu cawsäcunaca caśhanmá cutiycälimunꞌa.
Trïgucunänümá wiñaycälinꞌa.
Üba lantacunänümá waytaycälinꞌapis.
Libano lädu bïnucunänümá sumä lisisha-lisisha caycälinꞌapis.
8Chayćhümi Efrain ninꞌa: ‘Taytachacunaca
manañam imapis ucamanñachu’ nil.
Yaꞌañamari mañacamäśhanta uyaliycuśhä, chaynütac licaycuśhäpis.
Paycunapä tuqui pïnu lantannümá cayá.
Yaꞌawanmá sumä wayuycälinꞌa” nil.
9¿Mayanllá yaćhayniyütan caycunacta yaćhaycunanpä?
¿Mayanllá tantiayniyütan caycunacta tantiaycunanpä?
Tayta Diospa caminunꞌa allin tincüllanmanmá.
Tincüllanman cawsäcunämá chayninpa pulipäcun.
Cuntran śhalcücunacá chayman mitcacaculmi cućhpapäcun.
Who We AreWhat We EelieveWhat We Do
2025 by iamachristian.org,Inc All rights reserved.
