1 Tayta Diosmi nin:
“¡Mana waćhacü machüra walmi
sumä-sumäta cushicuy!
¡Dulurta mana lisï walmi cushicuypïta
taquicunawan alaway!
Jitäśha walmipïtapis
mas achca achcalämi
wawiquicuna cacunꞌa.
2Carpayquita mas jatunman muyuchiy;
atacuntapis mas jatunman maśhtaycuy;
watuncunactapis jatunyaycachiy;
amari lisiraychu.
Ishtacancunactapis sumäta tacaycuy.
3Amcunamá allï läduman,
ichü lädumanpis lluy milapäcunqui.
Milayniquicunamari nasyuncunacta alapaculcul
pulumäśha malcacunäćhu yaćhapäcunꞌa.
4“Ama manchacuychu; manamá uyshulächishachu canqui.
Ama jucmanyaychu; manamá pinꞌayćhüchu canqui.
Müsu cayniquićhu pinꞌacuyniquitapis unꞌaycunquiñamá;
japanyäśha cayal uyshulächisha cayniquitapis manañamá yalpanquichu.
5Lulaśhüniquimá wayapayqui cayan;
Sumä Munayniyu Tayta Diosmá śhutinpis.
Israelpa Chuya Tayta Diosninmá libraycüniqui cayan;
Jinantin Allpäpa Tayta Diosnin nishamá śhutinpis.
6Wayapan jitäluptin llaquisha
śhunꞌuyu walmictanümi,
lasac wamlallalä cayaptin wayapan
caćhaycüśha walmictanümi
Tayta Diosniqui ayaśhulanqui.
Yaꞌa Tayta Diosmari niyá:
7Rätullapämi jitälac;
ñatac sumä llaquipaywanmi caśhan cuscaycunapä śhayämú.
8Juclla piñacüśha cayalmi rätullapa ampïta pacacuyculá.
Ñatac mana camacaycü llaquipaynïwanmi
wiña-wiñaypä llaquipayculac.
Libraycüniqui Tayta Diosmari chaynu niyá.
9“Noe timpućhu yacu fisyuwan cay allpäta
manaña imaypis camacaycünäpämi limaliculá.
Chaynümi cananpis limalicú amwan
manaña imaypis piñacunäpä
nï mućhuchinacpä.
10Ulꞌucunaca aśhuptinpis, tacsha ulꞌuchacunaca
chincacuptinpis cuyacuyní ampïta
manamá japächacunꞌachu;
jawca caycunapä limalicuśhäcäpis
manamá camacanꞌachu.
Amta llaquipaycüniqui Tayta Diosmari niyá” nil.
Muśhü Jerusalenpïmi nin11Jerusalentam Tayta Dios nin:
“¡Am, pasaypi llaquipaypa cä,
pishipäśha cä, mayanpapis mana cunsuylaycuśha Jerusalen!
Tuquish carbunclo nishan lumimanmi simintuyquita ćhulaycuśhä;
zafiro lumipïtam simintuyquipis sumä caycunꞌa.
12Licanayquipä cä türriquicunam
tuquish-cama rubi lumipïta caycunꞌa;
puncuyquicunam carbunclo lumipïta canꞌa;
murällayquicunañatacmi tuquish-cama sumä lumicunapïta caycunꞌa.
13Yaꞌa Tayta Diosmi lluy chuliquicunacta yaćhaycachishä;
paycuna sumä jatun jawca cawsayćhümi caycälinꞌa.
14Tincüninman licaycuycäwanmi adurnaycuśhapis caycunqui.
Ñacaycäpis ampïta calućhüñamá caycunꞌa;
manchacuycäpis manañamá imaypis aśhuycuśhunquiñachu.
15Mayanpis cuntrayqui śhalcüca manamá
yaꞌapa caćhaśhachu śhayämun.
Cuntrayqui śhalcücunaca puntayquićhümá
camacaycüśha capäcunꞌa.
16“Jïrru tacäcäta yaꞌami lulayculá;
paymi śhanśhacta walachin imaymana
armacunacta lulananpä.
Camacaycücätapis camacaycunanpä yaꞌamari lulalá.
17Ñatac cuntrayqui cananpä ima arma
lulaśhancunäpis manamá imanaśhunquipischu;
cäraycuycäćhu cuntrayqui tumpäcunätapis upällachinquimá.
Lluy caycunamá sirbïnïcunap tücänincuna;
yaꞌapïmari mana juchayüpa licaycuśha cayca śhamun.
Yaꞌa Tayta Diosmi chaynüta niyá” nil.
Who We AreWhat We EelieveWhat We Do
2025 by iamachristian.org,Inc All rights reserved.
