1Allin caśhanpïta Tayta Diosta sulpäta uculcay.
Llaquipäcuynin wiña-wiñaypämá.
2Ćhïnicüninchicpa maquinpïta julaycamäśhanchictari
Tayta Diospa libraycuśhan cäcunaca niycuśhun.
3Jinantin nasyuncunäpi chaynu niycuśhun.
Inti ishpimunanpi aśhta inti chincalpunancama,
nurti lädupi aśhta sur läducama juntuycuśha cäcunäri niycuśhun.
4Má, may malcaćhu yaćhapäcunanpäpis caminucta
mana talilmá chunyäcäćhu pulumäśhaćhu pantäśha pulipäcula.
5Micuypïmá, yacupïmá pasaypi wañulpuyalcälaña.
6Chaypïtam llaquicuyninćhu Tayta Diosta ayaculcäla.
Jinaptinmá ñacaynincunapïta juluycula.
7Jinalculmi allin malcaćhu yaćhapäcunanpä
caśhancäman tuqui caminup puśhaycula.
8 Tayta Dios llaquipayniyu caśhanpïta sulpäta uculcay.
Nunancunawan sumä-camacta lulaycuśhanpïta altuman julaycäliy.
9Paymá yacunäśhacunäpa yacunayninta tallpulpachin.
Micanäśhacunätapis allincunäwanmá maćhaycachin.
10Má, waquincunañatacmi yananyayä sumä tutapäcäćhu cawsapäcula.
Llaquicuycunäwan jïrruwan cadinäśham ñacayalcäla.
11 Tayta Diospa nishanta mana cäsucul cullu linlicaycälil,
janay pachäćhu cayäcäpa limapaynintamá jalutaculcäla.
12Chaymá sasa-sasa lulaycunamanlä ćhulaycüla.
Cućhpäśhaña cayalcaptinpis manamá pipis yanapaycüninpis calachu.
13Jinaptinmi llaquicuyninćhu Tayta Diosta
ayaculcaptin ñacaynincunapïta libraycula.
14Yanawyayä sumä tutapaycäpïtamá salbaycula.
Cadinawan ćhänalächishancäpïtamá libraycula.
15 Tayta Dios llaquipayniyu caśhanpïta alawapäcuy.
Nunancunawan sumä-camacta lulaycuśhanpïta altuman julaycäliy.
16Paymari brunsipïta cä puncucunactapis
uchuy-uchuyllaman paquiy pawan.
Jïrrupi cä sigüruncunactapis paymari amshuycun.
17Má, luclucunaca mana cäsuculcäśhanpïtamá ishyapäcula.
Mana allinllacta lulapäcuśhanpïtamá llaquillaćhu cawsapäcula.
18Micuycunätapis pasaypiñamá millachicälälila.
Wañuycäpa patancamañamá ćhälälila.
19Chay llaquicuyninćhu Tayta Diosta
ayaculcaptinmá ñacaynincunapïta libraycula.
20Limalcuyllanwanmá allinyaycachila.
Wañuycäpïtamá juluycula.
21 Tayta Dios llaquipayniyu caśhanpïta alawapäcuy.
Nunancunawan sumä-camacta lulaycuśhanpïta altuman juluycäliy.
22Payta sulpäta uycapäcuy.
Sumä lulaśhancunapïta cushicuywan willaculcay.
23Canan má, lamarcäćhu barcucunawan lïcunämá,
yacucunäćhu lanticuycunacta pulïcunämá,
24 Tayta Diospa lulaśhancunactamá licapäcula.
Sumä-cama lulaynincunactamá lamar ćhawpićhu licapäcula.
25Tayta Dios limalcullaptinmá sumä-sumä waywa licalïmula,
yacucunäpis altu-altumanmá śhalcüla.
26Sïlücamamá wicapacapäcula;
lamarpa luli-lulincamatacmá jiꞌalpapäcula.
Chayćhu nunacunäpa śhunꞌuncuna pasaypi wällïshamá chucchucuyalcäla.
27Jinaptinmi shincanu tanli-tanli taplaycaćhayalcäla.
Yaćhaśha-yaćhaśha cayninpis manamá imapäpis bälilañachu.
28Chaymi llaquicuyninćhu Tayta Diosta ayaculcäla.
Payñatacmi ñacaynincunapïta juluycula.
29Sumä waywacunätamá pasächila.
Yacu wicapacücunätamá jawcayächila.
30Chaynu jawcayäluptinmá cushicälälila.
Chaynüpamá lipäcunancäman Tayta Dios puśhaycula.
31 Tayta Dios llaquipayniyu caśhanpïta sulpäta uculcay.
Nunancunawan sumä-camacta lulaycuśhanpïta altuman julaycäliy.
32Malcap juntunacuynincunaćhu altuman julaycäliy.
Yaśhancunap limanacuynincunaćhüpis alawaycäliy.
33Tayta Diosmi mayucunäta chunyä chaquiman muyüchin.
Pucyucunätapis pasaypi chaqui allpamanmi licalïchin.
34Nunacunäpa juchanpïtamá allin allpacunätapis
amya mana wiñachï allpaman muyüchin.
35Chaqui chunyäcunätañatacmi ućhacunaman muyüchin.
Chaqui allpacunätañatacmi pucyucunaman licalïchin.
36Chaymanmá micuypi cäcunäta ćhulaycula.
Paycunañatacmá chayćhu malcanta śhalcachipäcula.
37Ćhaclacunäćhu talpupäculamá, übacunactapis lantapäculamá.
Sumä wayuysapa-camactamá cusichapäcula.
38Tayta Dios allinpä licaycäliptinmá achcaman milälälila.
Uywancunapis mana ulluycälilmá alli-alliman milälälila.
39Má, chay waquincunacta mana allin juyu nunacunaca pasaypi uyshulächiptin,
ñacachiptin, jucmanyachiptinmá ashllaña capäcula.
40Chay ñacachïcunäta Tayta Diosñatacmi mana allinpä licaycun.
Mana caminu cä chunyäcunäpamá pantäśhacta pulichin.
41Mana cäniyücunätañatacmi ichá ñacayninpïta juluycun.
Uwishcunactanümá alli-alliman aylluncunacta milaycachin.
42Cayta licalmá allin nunacunaca cushiculcanꞌa.
Mana allin nunacunäñatacmi ichá shimin wićhäśha upälla capäcunꞌa.
43Mayanpis yaćhayniyücá caycunacta śhunꞌunman
ćhulaycul Tayta Diospa llaquipäcuyninta tantiaycuchun.
Who We AreWhat We EelieveWhat We Do
2025 by iamachristian.org,Inc All rights reserved.
