Zacarias 9 - Old Testament Quechua Wanca（QVW）

Israelpa muyülïninćhu malcacunäta mućhuycachinanpämi nin

1Chaypïta Hadrac malcap, Damasco malcap cuntranmi Tayta Dios caynu nin: “Israel ayllucunäpis, lluy-lluy nunacunäpis Tayta Dios lulaycunantam licapayalcan.

2Chaynütac Damascop culindanćhu Hamat malcactapis, jinaman yaćhaysapa Tirowan Sidon malcacunätapis licapayalcanmá.

3Tiro malcamari sumä sigüru murällancunacta śhalcälächin, illaytapis allpactanümá tawacälälin, üructapis mituctanülämá juntucälälin.

4Chaynu cayalcaptinpis Tayta Diosꞌa mana cäniyümanmi muyüchinꞌa. Cänincunacta lamarcämanmá wicapalpülunꞌa. Malcantapis nina latayäwanmá camacaycülunꞌa.

5“Caycunacta licalmi Ascalon malca chucchunꞌa, Gaza malcapis llaquicuypïta wiꞌiwintaycaćhanꞌa; Ecron malcapis chalapacuśhanca mana caśhanman muyuptinmá wañütuculcanꞌa. Mana mandacüniyüñamari Gaza malca canꞌa. Mana nunayüñamá Ascalon malca chunyanꞌa.

6Asdod malcaćhüpis pasaypi jitäśha nunacunañamá yaćhapäcunꞌa. Chaynüpamá Filisteo läducunäpa nunatucuyninta yaꞌa camacaycüśhä.

7Chay yawarnintin anla aycha micuśhantapis shiminpi quitäśhämá. Awari, chay anlapä licaśha micuyta micuśhantapis quilunpïtamá wicapäśhä. Chay Ecron malcaćhu puchü Filisteo läducunäñatacmi Tayta Diospäña capäcul, Juda aylluña capäcunꞌa, Jebus läducuna jucllachaculcäśhannu.

8Yaꞌañatacmi täpäcänu wasïta licaycuśhä, mayanpis mana yaycamunanpä nï yalunanpä. Cananꞌa malcäta ñawilläćhu caycachiptïmá manaña mayanpis ñacachinꞌañachu.

Israelpa śhamü mandacüninpïmi nin

9“Má, ¡tuquish Sionćhu cäcuna sumä-sumäta cushiculcay!

¡Jerusalenćhu cäcuna cushicuypi apalipäcuy!

Licapäcuy, tincüninman licaycü, salbaycü

mandacüniquimá śhacayämunña.

Ñatac mana nunatucullalmá malta aśhnullaman sillacüśha śhacayämun;

malta aśhnuchaman sillacüśhamari śhacayämun.

10Paymari Efrainpa carritancunacta,

Jerusalenpa cawalluncunacta chincächinꞌaña;

gïrrapä flïcha ćhächicuncunactapis mana cämanñamá muyüchinꞌa.

Nasyuncunäćhu jawcayay cananpäñamari niycunꞌa.

Lamarpa patanpi juc lädu patancamamá mandanꞌa;

Eufrates mayupi aśhta allpap manyancamañamari mandanꞌa.

11“Am Jerusalenman yawarnïwanmari limaliculac.

Chaymari mana yacuyu püsućhünu

cä prïsuyquicunacta libraycuśhä.

12Am libraycuśha cä alcäcunaca,

murälläśha malcayquimanꞌari cutipäcuy.

Cananꞌa sumä ñacapäcuśhayquipi

ishcay cuti mastalämá allinpä licaycälishayqui.

13Am Judatam flïcha ćhächicüpä chutaycuśhayqui;

Efraintañatacmi flïchäpä ćhulaycuśhä.

Am Siontañatacmi ispädäpä ćhulaycuśhayqui;

ampa chuliquicunactamari Grecia lädup

cuntran śhalcachishä” nil.

14Chaypïta Tayta Diosmá malcanćhu camalachicunꞌa.

Flïchan räyunümá yaluycunꞌa.

Jinaman Tayta Dios curnitillacta tucalmá,

sur lädupïta sumä-sumä waywap ćhawpinćhu śhamunꞌa.

15Sumä munayniyu Tayta Diosmari malcanpä pacaycünin caycunꞌa.

Jinaptinmi ćhïnicünincuna waracamuśhan

lumicunätapis paycuna jaluypa pawälälinꞌa.

Aśhta shincanülämá lüyaśhtin apalipäcunꞌa;

tasunćhu yawar llüllay-llüllay cäcänülämari capäcunꞌa;

uycuna patacćhu wäla cäcunäman yawar llusïshannülämari capäcunꞌapis.

16Chay muyunćhümá uwishnincunacta

michïnin salbaycücänu Tayta Dios malcanta salbaycunꞌa.

Jinaptinmi paycuna aläja luminu allpanćhu chipipicyapäcunꞌa.

17Chay malca, maynu sumä tuqui allinmi caycunꞌa.

Trïgucunaca, bïnucunaca chaspuycuptinmá

walaśh wamlacunaca: “Cayćhümá bïdallá” nipäcunꞌapis.