1 Tayta Diosllay, amllaćhümi pacacú;
lluy aticaćhamänïcunapi salbaycallämay, libraycallämay.
2Liyuncunanümi cayalcan;
yanꞌalätac uchuy-uchuyllacta
ticshiy-pawämanman mana pipis libraycamäní captinꞌa.
3 Tayta Diosnillay, ¿ima mana allintamá lulällalá?
¿Ima juchactamá lulällalá?
4¿Allinta lulaycamänïtachun
mana allincäwan cutiycächilá imamá?
Icha ¿ćhïnimänïtachun yanꞌalpi ñacachilá imamá?
5Chaynu luläluptiꞌa ćhïnicüní aticaćhamächun;
alcansalcul pampäćhu jalutacamächun.
Sumä caynïta pinꞌayman ćhulaycamächun. Selah
6 Tayta Diosllay, sumä piñacuyniquiwanꞌari śhalcuy;
ćhïnicünïcunap piñacuyninwan chalanacuy.
Taytallay licaćhacuyñari.
Yaꞌaman śhalcalcamal tincüninman uycüluy.
7Jinantin malcacunaca ñawpäniquiman juntunacalcämuchun.
Paycunactari mas altunninpi mandaycuy.
8Am Tayta Diosmá lluy malcacunäta cäraycunqui.
Chayurá allin tincünïmannu licaycamay;
allin śhunꞌuyu caśhämannu niycamay.
9Lluy tantiaytapis, śhunꞌuctapis lisiycü,
tincüllanman licaycü Tayta Dios,
mana allin luläcunäpa juchanta camacaycüluyñari.
Allin luläcunätañatac tacyaycachiy.
10Tayta Diosmá pacaycamäní.
Allin śhunꞌuyücunätamá salbaycun.
11Tayta Diosmá tincüllanman-cama cäraycüca.
Mana allin nunäpa imaypis piñacüśhamá cayan.
12Mana wanacuptinñatacmi ichá
Tayta Dios ispädanta afilaycunꞌa.
Flïcha ćhächicunpis listullañamá alcayan.
13Nina waläcänu flïchanpis listullañamá cayan.
Wañuchicunpis listullañamá cayan.
14Mana allin nunäta licayꞌari:
mana allincätamá patalayan,
nanaytamá apayan, artictamá waćhacunꞌa.
15Luli-luli ućhcuctamá ućhcülunpis.
Chay ućhcuśhancämanmá quiquin palpunꞌa.
16Mana allin lulayninmá quiquinman cutiycunꞌa.
juyu cayninmá quiquinpa cunca cuchuynin caycunꞌa.
17Yaꞌañatacmi tincüninman licaycü caśhanpi
Tayta Diosta sulpäta ucuśhä.
Janay pachäćhu cä Tayta Diospa śhutinta taquicunawanmá alawaycuśhä.
Who We AreWhat We EelieveWhat We Do
2025 by iamachristian.org,Inc All rights reserved.
