1“Acachäcü waywäta anyaśh muyun
aticaćhäcänümi Efrain cawsayan.
Articuycäwan mana allin juyu lulayllancunamari timpuyan.
Asiria läduwanmá limalinaculcan;
Egipto lädumanñatacmi asayticunacta uycapäcun” nil.
2Cananꞌa Tayta Diosmi Judata quijälun.
Lluy lulaśhanpïmá Jacobta mućhuycachinꞌa.
Lulayninman tincütamá uycülunꞌa.
3Mamanpa pantanćhu cayalñamá wawꞌi-caśhanpa ćhaquinta chalaläla.
Jatunyälulñatacmi Tayta Dioswan chalanacüla.
4Tayta Dioswan chalanacuśhanćhu llallichicülamá.
Chayćhu allinpä licaycunanpämari waꞌaśhtin mañacula.
Bet-elćhu Tayta Diosta talilculmi limapäla.
5Sumä munayniyu Tayta Dioswanmá limala.
Paypa śhutinpis Tayta Diosmá.
6Chayurá canan, Tayta Diosniquimanꞌari cutiycuy,
jinaman chalapacuna caycuy, tincüllanman lulaycuy,
imaypis payllaman chalapacuy.
7Tayta Diosmi nin:
“Nigusyanticunänümá suwayä tupucucunacta uywapäcun.
Ingañacuypïtamá wañupacuyalcan.
8Awari, Efrainmi nunatucüśhalä nin: ‘Sumä rïcumanmi muyülú.
Alli-alli cänïyümanmá licalïlú.
Lluy ima gänaśhäćhüpis manamá mayanpis
ima mana allinllactapis taliycunꞌachu’ nil.
9Egipto lädućhu caśhayquipïtamá Tayta Diosniqui yaꞌa cayá.
Chunyäcäćhu chucllacunallaćhu yaćhaśhayquitanümi
cananpis caśhan carpacunallaćhu yaćhaycälichishayqui.
10“Willacücunäta yaꞌami limapayculá.
Imacuna pasanantapis licaycachilämi.
Willacücunawanmari tincuchiycunap limapaycapäculac.
11“¿Galaadćhu yaćhäcunaca mana allin nunacunachun?
Awari, ¿ima allinllamá payćhu caycunman?
Wäcacunactamari Gilgalćhu cañaywan uycälin.
Chaymi uycuna patacnincuna śhüya muntunaläcänu
ćhaclap śhucancunaćhu quïdanꞌa” nil.
12Má, unay aylluyqui Jacobñatacmi Aram läducta ayicula.
Chayćhümari walmin-laycu uwishcunacta michipacula.
13Chaypïta Israel nunacunäta willacüninwanmá
Egiptopïta Tayta Dios julaycamula.
Willacüninwanmá ñawillanćhu licaycula.
14Ñatac Israelꞌa Tayta Diosta sumämi piñachila.
Chay wañuchishancunapïtamari
quiquin Tayta Diosnin tincüninman uycülunꞌa.
Jalutacuśhancunapïtamá tincüninman cutiycächinꞌa.
Who We AreWhat We EelieveWhat We Do
2025 by iamachristian.org,Inc All rights reserved.
