1Mandacü Uzias wañunan wataćhümi, yaꞌa Isaias licälú munayniyu, sumä cä Tayta Diosta täcunanćhu täcuyäta. Müdananpa manyanmi alawana wasi junta cacuña. anjilcuna cayalcäña. Ishcay laplanwanmi cäranta pampaculcäña, ishcaycäwanñatacmi ćhaquinta täpaculcäña, juc ishcaycäwanñatacmi palipäcuña.
3Quiquin-pulam ayaycaćhaypa ninaculcäña:
“¡Sumä munayniyu Tayta Diosꞌa chuya, chuya, chuyam!
¡Sumä caynin jinantin allpäćhümá cayan!” nil.
4Chaynu nipäcuśhancunämá alawana wasip simintuncunactapis cuyuchiña; jinantin alawana wasiman untayllamá juntälunpis.
6Chayćhümi jucnin Serafin anjilca, uycuna patacpi śhanśha walayäta julunapä cayäcäwan jululcul, yaꞌa läduman päliyämuña.
7Chay śhanśhawan shimïta tupaycachilmi niman: “Licayꞌari, cay śhanśham shimiquita tupaycülun. Cananꞌa mana allin lulayniqui juluycuśhañamá; juchayqui pampachaycuśhañamá cayan” nil.
8Chaypïtam Tayta Diosta uyalïlú caynu niyäta: “¿Mayantatá caćhaśhä? ¿Pitá yaꞌanchicpi pudirninchic willacü linman?” nil.
Niptinmi yaꞌa nilá: “Cayćhümi yaꞌa cayá. Yaꞌacta caćhamay” nil.
9Niptïmi niman:
“Cay malcäta nimuy: ‘Maynüpa uyaliyalcalpis
manamá tantiapäcunquichu;
maynüpa licayalcalpis manamá yaćhapäcunquichu’ nil.
10“Cay malcäta limapay masqui śhunꞌunta lumiyächinan captinpis,
linlinta quillpanan, ñawinta wićhanan captinpis.
Paycuna licapäcul, uyalipäculꞌa tantiaculcanmanmi.
Chayćha allintaña tantiaculcal allinyaycachisha capäcunman” nil.
11Nimaptinmi tapulá:
“Taytay, ¿imaycamaćh cay canꞌa?” nil.
Niptïmi niman:
“Caynu canꞌa malcancuna pulumänancama,
wasincuna chunyanancama,
allpancunapis pasaypi mana cäman muyunancama,
12chaynütac calu-caluman nunacunäta Tayta Dios alapacunancama,
jinantin nasyunca pasa-pasaypi chunyanancamamá.
13Paćhacpïta (100) ćhuncapi-cama quïdaptinpis,
chaycunapis camacaycüśhamá capäcunꞌa.
Roble ütac encina ilucta cuchüśhap
quïdä cullunnümari quïdanꞌa.
Chay cullupïmá Tayta Diospa aclaśhanca chillquimunꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
