Salmos 91 - Old Testament Quechua Wanca（QVW）

Tayta Diosmi pacaycamäninchic

1Janay pachäćhu cawsäcäpa ñawillanćhu yaćhäcá,

sumä munayniyücäpa llantuyllanćhümá jamaycunꞌa.

2 Tayta Diostam ní: “Anmi pacaycamäní, licaycamäní canqui.

Am Diosllämi chalapacuná caycunqui” nil.

3Payllamá pacäśha trampacunapïpis,

wañuchicü ishyaycunapïpis libraycuśhunquiman.

4Laplanwanmi pacaycuśhunqui,

pülanpa lulïllanćhümi ama-pacha niycul uywaycuśhunqui.

Rasun cayninmá atajachicuyqui, pacaycüniqui.

5Manchanaśh tutapäcäćhüpis manamá manchacunayquichu.

Muyunpa flïchancunactapis manatacmá manchacunayquichu.

6Nïtac tutanpa pulï ishyaycunactapis,

nï muyunpa camacaycü juyu ishyaycunactapis manchacunayquichu.

7Masqui ichüniquićhu walanganpi wañupäcuptinpis,

allïniquiman ćhunca walanganpi palpapämuptinpis,

anmanñatacmi ichá mana imapis ćhaycuśhunquichu.

8Chay mana allin nunacunaca camacaycüśha

caśhanta am quiquiquimá ñawiquiwan licaycunqui.

9 Tayta Diosta pacaycuśhüniquipä ćhulaycuśhayquipam,

jinaman janay pachäćhu cäcäta licäniquipä ćhulaycuśhayquipam,

10ima mana allinpis nï ćhaycuśhunquichu,

nïtac ima ishyaypis wasiquiman ćhaycunꞌachu.

11Tayta Diosmi anjilnincunacta caćhaycamunꞌa

mayćhu captiquipis licaycuśhunayquipä.

12Ima lumimanpis mana chapicacunayquipämi

maquinwan chalaläśhunqui.

13Chay liyuncunactapis, culibraycunactapis jalupäcunquimá.

Uña liyuncunactapis, cala walaśhcunactapis camacaycälälinquimá.

14Tayta Diosmi nin: “Chalapacamäśhanpam

mayanpa maquinpïpis juluycuśhä.

Lisimäśhanpam altuman juluycuśhä.

15Ayamaptinpis uyaliycuśhämi; llaquicuynincunaćhüpis

paywanmi caycuśhä.

Librayculmi altunninmanlä ćhulaycuśhä.

16Achca watacunamá cawsaycachishä.

Salbaycuśhätamá licaycachishäpis” nil.