Numeros 3 - Old Testament Quechua Wanca（QVW）

Levitacunap ima lulaynincuna caśhantam nin

1 Tayta Dios Moisesta Sinai ulꞌüćhu limapaptin caycunam Aaronpawan Moisespa milaynincuna capäcula.

2Aaronpa milaynincuna caycunamari: Wamä chulin Nadab, jinaman Abiu, Eleazar, Itamar.Num 26.60.

3Paycunam Aaronpa milaynin, sasirdütipä llusiycul japächaycuśhancunaca capäcula.

4Ñatac chunyä Sinaićhu Tayta Dios camachishanmannu ninawan mana cañaycapäcuśhanpam sasirdüti Nadabwan Abiu wañülälila, Tayta Diospa puntanćhu.Lev 10.1-2; Num 26.61. Paycuna mana chuliyü-camam wañuculcäla. Chaymi Eleazarwan Itamarllaña sasirdüti lulaycunacta lulaycälila taytan Aaron cawsaśhancama.

5Chaypïtam Moisesta Tayta Dios nin:

6“Levi ayllucta sasirdüti Aaronman puśhaycuy.

7Jinaptiquim paycuna tincuna carpaćhu Aaronpa, malcäpa lulanancunäta lulaycapäcunꞌa.

8Chayćhüćha tincuna carpap lluy ima cänincunactapis licaycapäcunꞌa; jinaman carpaćhu Israelcunaca lulaycunancunäta lulaycapäcunꞌa.

9Levi ayllucunäta Aaronpa chulintinpa maquinmanmi ćhulaycunqui. Paycunamari Aaronta chulinta sirbïca capäcunꞌa.

10Sasirdüti lulaycätañatacmi Aaronpawan chulincunap maquinman ćhulaycunqui. Ñatac mayanpis mana sasirdüti cayal carpaman aśhuycücá wañuchisham canꞌa” nil.

11Chaypïtam Moisesta Tayta Dios nin:

12“Yaꞌami jinantin Israelcunap wamä chulincunap pudirninta levitacunäta aclaycú. Paycuna yaꞌapa japächäśham capäcunꞌa.

13Lluy wamäcunaca yaꞌapamari cayan.Exo 13.2, 11-16. Egiptocunap wamä chulincunacta wañuchishä-pachapïtam Israel caśhtacunap lluy wamä chulincunacta japächayculá, chaynütac lluy uywancunactapis. Yaꞌamari Tayta Diosniqui cayá” nil.

Levitacunäćhu cä walaśhcunätam sinsan

14Chaypïtam chunyä Sinaićhu Moisesta Tayta Dios nin:

15“Levi ayllucunäćhu milayninpi-cama, wasinpi-cama quillayüpïta janaman lluy walaśhcunacta sinsapäcuy” nil.

16Chaynu Tayta Dios nishanmanümi Moises sinsala.

17Levipa chulincuna caycunam capäcula: Gerson, Coat, Merari.

18Gersonpa chulincunañatacmi ayllunpa-cama caycuna cala: Libni, Simei.

19Coatpa chulincunañatacmi ayllunpa-cama caycuna cala: Amram, Izhar, Hebron, Uzielpis.

20Merarip milaynincunañatacmi cala: Mahli, Musi. Caycunamari Levipa milaynincuna ayllunpi-cama capäcula.

Gerson ayllucunäćhu walaśhcunätam sinsan

21Chaynütac Gersonpa milayninmi Libniwan Simei capäcula. Paycunamari Gersonpa milaynincuna capäcula.

22Quillayüpi janaman walaśhcunacta sinsaptinmi anćhish walanga picha paćhac (7,500) capäcula.

23Cay Gerson ayllucunam carpap ipan lädu, inti jiꞌalpunan lädućhu capäcula.

24Paycunap puydïninmi Laelpa chulin Eliasaf cala.

25Cay Gerson ayllucunämi licaycapäcunan cala: tincuna carpap utapi atacunta, curtïnanta, yaycunaćhu curtïnacta,

26patyup curtïnacta, patyup puncunpa curtïnantapis, uycuna patactapis, jinaman curtïnap lluy watacuncunactapis.

Coat ayllućhu walaśhcunätam sinsan

27Coatpa milaynincunañatacmi cala: Amram läducunaca, Izhar läducuna, Hebron läducunaca, Uziel läducunaca. Paycunamari Coatpa milaynincuna capäcula.

28Paycunatacmi carpaćhu chuya cuartucunacta licaycüca capäcula. Quillayüpi janaman cä walaśhcunacta sinsaptinmi pusä walanga süta paćhac (8,600) capäcula.

29Cay Coat ayllucunämi carpap allï lädunćhu capäcula.

30Coat ayllucunap puydïnincämi Uzielpa chulin Elizafan cala.

31Paycunam licaycapäcunan cala: babulta, mïsacta, jatun michïructa, uycuna pataccäta, chayćhu lluy cänintinta-cama, jinaman Chuya Sityucta laquï curtïnactapis, lulapäcunanpä lluy cacunätapis.

32Levi ayllucunap, carpap lluy licaycücunäpa puydïnin sasirdüti Aaronpa chulin Eleazarmi cala.

Merari ayllućhu walaśhcunätam sinsan

33Merarip milaynincunañatacmi cala: Mahli, Musi. Paycunamari Merarip milaynincuna capäcula.

34Quillayüpi janaman walaśh sinsaśhancunämi süta walanga ishcay paćhac (6,200) capäcula.

35Paycunap puydïninmi Merari partipi Abihailpa chulin Zuriel cala. Paycuna carpap ichü lädunćhümi capäcula.

36Paycunam licaycapäcunan cala: carpap iluncunacta, bärancunacta, paradïruncunacta, simintuncunacta, jinaman lluy cänintinta, imapis lluy sirbichicunantinta-cama,

37jinaman patyup muyülïninćhu paradïrucunätapis, simintuncunactapis, ishtacancunactapis, lluy watacuncunactapis.

38Moiseswan Aaronñatacmi chulintin-cama tincuna carpap inti yalamunan lädućhu capäcula. Paycunam lluy Israelcunap pudirnin carpaćhu capäcula. Ñatac mayanpis sasirdüti mana cayal carpaman lulaycu aśhuycücá wañuchisham cala.

39 Tayta Dios nishanmannüllam Moiseswan Aaron sinsapäcula levitacunäta. Chayurá quillayüpïta janaman ishcay ćhunca ishcayniyu walanga walaśhcunam (22,000) capäcula.

Wamä chulinta juluculcänanpämi nin

40Chaypïtam Moisesta Tayta Dios nin: “Jinantin Israel caśhtacunäpa lluy wamä walaśh chulincunacta quillayüpïta janaman sinsal śhutincunacta isquirbinqui.

41Chaynütac jinantin Israel caśhtacunap wamä chulincunap pudirninpi lluy Levi ayllucunäta japächaycapamay. Chaynütac wamä lluy uywancunap pudirninpi levitacunap uywancunactatac japächaycapamay. Yaꞌamari Tayta Diosniqui cayá” nil.

42Chay Tayta Dios nishallanmannümi lluy Israelcunäpa wamä chulincunacta Moises sinsala.

43Chayurá quillayüpi janaman śhutinpa-cama wamä chuli sinsaśhancunaca ishcay ćhunca ishcay walanga ishcay paćhac anćhish ćhunca quimsayüninmi (22,273) capäcula.

44Chaypïtam Moisesta Tayta Dios nin:

45“Jinantin Israelpa wamä chulincunap pudirninpi cä lluy Levi ayllucunäta japächaycapamay. Chaynütac Israelpa uywancunap pudirninpi levitap lluy uywancunacta japächaycapamay. Lluy levitacunaca yaꞌapañamari cayalcan. Yaꞌamari Tayta Diosniqui cayá.

46“Ñatac Israel caśhtacunäpa wamä chulincuna mas achca-achcam Levi ayllucunäpi capäcula. Chay ishcay paćhac anćhish ćhunca quimsayu (273) wamä chulicunäta julucunmanmi.

47Chaynu julucul picha illaytam jucninpi-cama unꞌa; carpap midïdanmannümi tupuśha canꞌapis. Chay midïda llasan ćhunca jucniyu grämucta-camam.

48Chay quïdä wamä chulicunacta juluculcäśhanpa ćhanintá Aaronmanpis chulincunamanpis uycunquim” nil.

49Chaymi wamä chulicunäpi Levi ayllucuna julucuśhan puchü cä illaycunäta Moises juntula.

50Lluy juntuśhan israelcunaca ćhäla juc walanga quimsa paćhac süta ćhunca pichayu (1,365) illaymanmi; carpap midïdanmannümi tupuśha cala.

51Chay illaycätam Tayta Dios nishanmannu Aaronman chulintincunaman Moises uycula.