2 Samuel 8 - Old Testament Quechua Wanca（QVW）

Juc malcacunactapis David llallilculmi duyñuchacuycun 1Cro 18.1-13

1Chaypïtam Filisteo läducunäta David llallilcul duyñuchacuycula. Jinalmi Meteg-ama malcactapis maquinćhu cachila.

2Chaynütacmi Moab läducunätapis llallilcul pampäman achallacta pilatalcachil curdilwan tupuycula. Chayćhu ishcay tupu-camaman ćhäcätá wañüchilam; juc tupu-camallaman ćhäcätá manam wañuchilachu. Chaynüpam Moab läducunaca Davidpa uywaynincunaman licalilcälil alcabälacunacta uycapäcula.

3Chaynütacmi Rehobpa chulin Soba malcap mandacünin Hadad-ezertapis David llallïla. Pay Eufrates mayu lädu particunaca caśhan maquinćhu cananpä juntuyta munayaptinmari llallïla.

4Paycunapïtam David duyñuchacuycula: walanga anćhish paćhac (1,700) sillädacunacta, ishcay ćhunca walanga (20,000) ćhaquillawan lï pilyäcunacta. Jinaman carrita aysa cawallucunäpa ancuncunactapis lluymi cuchüla; paćhac carritacunacta aysanallanpäñamari caćhaycüla.

5Ñatac Soba malcap mandacü Hadad-ezerta yanapänanpämi Damascoćhu cä Siria läducunaca paćhcälälimula. Jinaptinmi paycunactapis ishcay ćhunca ishcayniyu walangacta (22,000) David wañüchila.

6Jinalmi Damascoćhu cä Siria lädumanpis nunancunacta David ćhulälun. Chaynüpa Davidpa maquinćhüña licalïlälilmi alcabälacta uycapäcula. Chaynümi Tayta Dios Davidta yanapäla lluy pilyaśhanćhüpis llallinanpä.

7Ñatac Hadad-ezerpa puydï pilyänincunap ürupïta atajachicuncunactam David duyñuchacuycul Jerusalenman apächila.

8Chaynütacmi Hadad-ezerpa Beta, Berotai malcancunaćhu cä achca-achca brunsicunätapis duyñuchacuycula.

9Ñatac Hadad-ezerpa lluy pilyänincunacta David llallishantam Hamat malcap mandacünin Toi yaćhäña.

10Chaymi chulin Joramta apachila illaypïta, brunsipïta, ürupïta luläśha aläjacunacta Davidwan allinpä licachicuyninwan. Jinaman limaycul allin caycunanpämi Hadad-ezerta niycula. Chaynu mandacü Toi lulala Hadad-ezerwan ćhïninacuśhan-laycum.

11Chay Joram uśhancunäta Tayta Diospämi mandacü David japächaycula. Chaynütacmi lluy malcacunacta duyñuchacuśhanpïpis illaycunäta, ürucunäta japächaycula.

12Chay malcacunaca cala: Sirio, Moab, Amon, Filisteo, Amalecpis. Chaynütacmi Rehobpa chulin, Soba malcap mandacü Hadad-ezerta waycamuśhancunätapis japächaycula.

13Ñatac Caćhi Pampaćhu ćhunca pusäniyu walanga (18,000) Edom lädu nunacunactam David wañüchila. Chaypi David cutïluptinmi mas lisisha-lisisha licalïla.Sal 60.

14Chaynütacmi jinantin Edom malcamanpis nunancunacta David ćhuläla. Chaynüpam paycunapis Davidpa maquinćhüña capäcula. Chaynüpamari Tayta Dios Davidta yanapäla lluy pilyaśhancunaćhüpis llallinanpä.

Davidpa puydï yanapänincuna 2Sam 20.23-26; 1Cro 18.14-17

15Jinantin Israelćhümi David mandala sumä allin cällanman, tincüllanman.

16Pilyänincunap puydïninmi Sarviap chulin Joab cala; isquirbïninñatacmi Ahiludpa chulin Josafat cala.

17Sasirdütincunañatacmi Ahitobpa chulin Sadoc, Abiatarpa chulin Ahimelec capäcula. Isquirbïninñatacmi Seraias cala.

18Mandacücäpa täpänin Ceret, Pelet ayllucunätañatacmi Joiadapa chulin Benaia mandacula. Davidpa chulincunañatacmi sasirdüticuna capäcula.