1Quimsa muyunpïtañatacmi mandacücäpa walmin Ester, sumä allin müdacunan müdanawan ćhulaculcul, palasyup patyunman yaycuycul mandacücäpa chimpanćhu śhaycucuycula. Mandacücäñatacmi dispächunćhu täcuyäla.
2Chaynu patyućhu Ester śhäcuyäta mandacüca licälulmi, allinpä licaycul maquinćhu uywaśhan ürupi bäranta chacchaycula. Jinaptinmi Ester pasaycul chay bäranpa puntanta yataycula.
3Chayćhümi mandacüca nin: “Mama Ester, ¿imam pasäśhunqui? ¿Imam mañacuyniqui? Masqui cay mandacuśhäta ćhawpipi mañamaptiquipis uycucmanmi” nil.
4Niptinmi Ester: “Tayta mandacü, allin ampä captinꞌa cumbidu lulapuśhacman Amanwan cusca canan muyun śhapämuy” nin.
5Niptinmi yanapänincunacta mandacüca nin: “Ester munaśhanta lulanäpä, canan-pacha Amanta ashipämuy” nil.
Chaynüpam mandacüca Amanwan lipäcula Ester cumbidu lulachishanman.
6Chay cumbidućhu bïnucta upyayalcalmi Esterta mandacüca nin: “Ima munaśhayquitapis mañamay jinalla, uycuśhayquim. Masqui cay mandacuśhäta ćhawpipi mañamaptiquipis uycuśhayquimari” nil.
7-8Niptinmi Ester: “Cayllactam mañacullac: Tayta mandacü, allinpä ampä captinꞌa, jinaman munaynïta lulaycuyta munalꞌa wälaman yapa cumbidu lulapuśhacman Amanwan cuscari śhapämuy. Wälamanñamari ima mañacuyní caśhantapis niycuśhayqui” nin.
Mardoqueocta wañuchinanpämi Aman alistacun9Chay muyun cumbidupïta Amanñatacmi sumä cushisha yalula. Chaynu pasayaptinmi mandacücäpa palasyunpa puncunćhu Mardoqueoñatac mana śhalculcunchu nï limaycunpischu. Chaymi Amanpa śhunꞌun sumä timpucuyan.
10Ñatac Aman manam camalachilachu, sinuꞌa wasinta ćhayculñam lisinacuśhancunactawan walmin Zeresta ayächimun.
11Chayćhümi lluypa ñawquin alawacucuyan maynu cäniyu caśhanpïta, achca chulincuna caśhanpïta, imaymanawan mandacüca altuman juluycuśhanpïta, chaynütac puydïcunäpa sirbïcunäpa mas puydïninman ćhulaycuśhanpïtapis.
12Jinaman Aman nicuyanmi: “Esterpis, mandacü wayapanpä cumbidu lulachishanman paytawan yaꞌallactam ayächiman. Chaynütacmi wälamanpis cumbiduman lipäcunäpä pulä ayachisha cayalcá.
13Ñatac lluy caycuna manamari imapäpis bälimanchu chay anla Israel lädu Mardoqueo palasyup puncunćhu jinalla täcuyaptinꞌa canpis” nil.
14Niptinmi walmin Zereswan lluy lisinacuśhancunaca nipäcun: “Walcachinayquipä iluctari lulächiy; aśhta ishcay ćhunca pichayu (25) mitructalä. Jinalcul wälaman mandacücäta mañay chayman Mardoqueocta walcächinanpä. Chaynüpa uma nanachïniquita chincalcachilmi cumbiduman mandacücäwan jawcallaña linqui” nil.
Nishanca Amanpä allin captinmi jatun ilucta lulächin.
Who We AreWhat We EelieveWhat We Do
2025 by iamachristian.org,Inc All rights reserved.
