Jonas 1 - Old Testament Quechua Wanca（QVW）

Tayta Dios nishanta jitapayculmi Jonas ayicun

1Amitai nunap chulin Jonastam

3Niptin Jonasñatacmi “Chay Ninive malcämanlätac yaꞌa licuyäśhä” nil Jope malcaćhu barcup paradïrunman licun. Chayćhümi juc barcu Tarsis läductalä yalucuyäña. Chaymi “Tayta Diospïta ayicuśhä” nil, pasäjintapis jululcul chay läduman lïcunäwan liculcan.

4Chaynu lamarcäpa liyalcaptinñam Tayta Dios sumä-sumä waywacta talcächimun. Jinaptinmi barcuctapis ñaćhaña maśhtacächicuyanpis.

5Chaynu cacuyaptinmi barcup manijänincunapis sumä chucchucuyal diosninta-cama ruygacuyta allacaycälin. Uchuyllapis mana manalcuptinñatacmi jacyalpunanpä lluy cargancunacta yacüman wicapalpucuyalcan. Jonasñatacmi ichá barcup lulï cuartunman jiꞌacuycul wañuśha-wañuśha puñuyäña.

6Chay manijäcunap puydïninmi chayćhu Jonasta talilcul: “¿Am puñuy-siquicá, cayćhu jawca-jawcalächun chuśhnayanquipis? ¡Juclla śhalcuculcul diosniquita ruygacuy! Ichaläpis llaquipaycul salbaycamachwan” nil paćhcächimun.

7Chayćhu manijäcunäñatacmi ninacücuyalcan: “¿Caynu mana allin pasamänanchicpä mayanninchicmá juchayu cayanchic? Yaćhananchicpä chüsaśhunꞌari” nil. Chaynu chüsapäcuptinmi Jonasman ćhälun.

8Jinaptinmi Jonasta nicuyalcan: “Canan willacuy. ¿Amchun juchayüca cayanqui? ¿Caynu pasamänanchicpä ima mana allintamá lulälanqui? ¿Maypïtamá śhamunqui? ¿May malcayümá canqui? ¿Ima caśhtamari canquipis?” nil.

9Niptinmi Jonas: “Israel caśhtam cá. Cay pachätapis, lamarcätapis lulä Tayta Diostam sirbí.

10-11Pay nimäśhanta jitapayculmi juc läducta ayiynïwan cay barcüman ishpimulá” nin.

Chayta uyalïlälil jinaman waywäpis yacüta mas-mastaña śhalcachicayämuptinmi sumä-sumäña manchalicucuyalcan. Chaymi Jonasta nicuyalcan: “¡Imanaltá caynu lulalanqui! ¡Yacuca jawcayänanpä imanapäcuśhayquimari!” nil.

12Niptinmi Jonas: “Yaꞌap janämi cay jatu-jatun ñacaycunaca pasayämanchic. Jawcayänanpä cay lamarcämanꞌari wicapalpälälimay” nin.

13Niptinpis jitalpuyta mana munayninwanmi manijäcunaca “lamarpa patanman filtaśhun” nil imanacuyalcälañapis. Ñatac waywaca mas-mastaña talcämuptinmi imanaculpis manaña atipapäculachu.

14Chaymi Tayta Diosta ruygaculcäla: “Tayta Diosllay, cay nunacta wañunanpä jitaycapäcuśhäpïta amari yaꞌacunacta wañuyman ćhulaycälillämaychu. Mana juchayu nuna wañuśhanpïta amatac cäraycälillämaychu. Amllamari munaśhayquimannu cäninmancama lulaycüca cayanqui” nil.

15Chaynu nilcälilmi Jonasta chalalcälil lamarcäman wicapalpälälin. Jinäluptin-pacham sumä-sumä śhalcamü waywäpis, yacüpis śhaycülun.

16Chayta licälälil-pacham manijäcunaca sumä manchacuywan cañaywan uycälil, Tayta Dios salbaycuśhanpïta sirbinanpä limaliculcäla.

17Ñatac Jonasꞌa yacu śhunꞌunćhüñam cayäla. Chayćhu Tayta Dios jatu-jatun challwacta licalïchimuptinmari intirullanta pasacalpachila. Jinaptinmi chay challwap patanćhu quimsa tuta, quimsa muyun winaläla.