1 Samuel 18 - Old Testament Quechua Wanca（QVW）

Davidmi Jonatanwan limalinaculcan

1Chaynu Saulwan limayta David camacalculmi Jonatanwan juc śhunꞌulla licalïlälin. Chaynu tuquip apanaculmi quiquintanu Jonatan cuyala.

2Chay muyunpïtam Davidta yanapäninpä Saul ćhulaycula. Jinalmi papäninpa wasinta manaña cutichilachu.

3Jonatanñatacmi anchap cuyal Davidwan limalinaculcäla pasaypipä amïgu capäcunanpäña.

4Chaymi Jonatan capütanta juluculcul Davidman uycula, chaynütac ispädantapis, flïchantapis, wiyaw watacuntapis.

5Davidꞌa Saul lluy nishantam sumäta yaćhaywan lulaycü cala. Chaymi Saul pilyänincunap puydïninpä ćhulälun. Chayćhümi lluy pilyäcunäpis, Saulpa yanapänincunapis allinpä licapäcula.

6Má, Goliat nunacta David wañuchishanpïta lluy pilyäcunaca cutimuptinmi Israelpa lluy malcancunapïta walmicunaca yalapämula cushicuywan taquishtin, paćhcaśhtin, latillucta, tinyacta, imaymana tucanacunacta tucaśhtin mandacü Saulta ćhasquipäcunanpä.

7Chay walmicunam paćhcaśhtin taquishtin:

“Walanga (1,000) pilyätam Saul wañüchila;

Davidñatacmi ćhunca walangacta (10,000)” nipäcula.

8Chaynu taquipäcuptinmi Saul sumä piñacülul nicuyan: “Davidꞌa ćhunca walangactam (10,000) wañüchin nicuyalcan, yaꞌatañatac walangallacta (1,000) nicayalcäman. Mandacüta ćhulanallanñamá cacuyan” nil.

9Chaymi chay pachapi Saul manaña allinpachu Davidta licala.

10Chay walantintam Tayta Diospa caćhamuśhan mana allin ispirituca Saulman caśhan yaycülun. Jinaptinmi dispächunćhu lücunüña imactapis limayäla. Davidñatacmi imaypis arpanta tucaśhannu tucayäla. Saulꞌa lansan apticüśham cayäla.

11Chay lansantam Davidman chapïlun: “Pilaman läwacacüpa Davidta uycüśhä” nil. Chaynu ishcay cuti chapïluptinpis David juc-lädumanmi aśhutyälun.

12Chaymi Saul yaćhala Tayta Dios manaña yanapäśhanta; aśhwanpa Davidtaña yanapaptinmi Saul payta lisiräla.

13Jinalmi lädunpïta calupachiyninwan walanga (1,000) pilyäcunap puydïninpä ćhulälun. Chaymi caminaycü David pilyäcunap puntanta yalulapis cutiycamulapis.

14Tayta Dios yanapaptinñatacmi Davidpa ima lulaśhanpis sumä allin yaluycula.

15Chaynu imaćhüpis allin yaćhaywan David caycuptinmi Saul manchacula.

16Ñatac israelcunäwan, Juda nunacunaca Davidta cuyapäculam. Paymari yalapäcunanpäpis cutiycälimunanpäpis caminaycüca cala.

17Juc muyunćhümi Davidta Saul nin: “Tayta Diospa pilyaynincunaćhu mana ćhinaśhyällal pilyaptiquiꞌa mayur wamla chulí Merabwanmi casarachishayqui” nil. Chaynu nila śhunꞌunćhu: “Quiquí manam wañuchïmanchu. Aśhwanpa Filisteo läducunäpa maquinwan wañuchun” nilmi.

18Niptinmi David nin: “Taytallay, ¿yaꞌapis ayllücunapis manam imapischu capäcullá? ¿Imanuypatan mandacücäpa maśhanlä cayculläman?” nil.

19Ñatac Saul wamla chulin Merabta Davidwan casarachinan muyunca ćhämuptinmi Mehola lädu Adrielwan casarächin.

20Juc wamla chulin Micalpa śhunꞌun Davidćhu cacuyäta Saul yaćhälulmi cushicula.

21Chayćhümi pay pinsayäla: “Micalmi juc trampanu paypä canꞌa. Chayćha Filisteo läducunäpa maquinwan David wañunꞌa” nil. Chaynu pinsayninwanmi Davidta caśhan nin: “Cananmi ichá maśhäña yaycunqui” nil.

22Chaymi yanapänincunacta Saul nin: “Amcuna japälla Davidwan limapämuy cay nil: ‘Mandacüca allictam cuyaśhunqui; lluy yanapänincunapis sumämi munapäcuśhunqui. Mandacücäpa maśhanña yaycüluy’ ” nil.

23Niptinmi Saulpa yanapänincuna chay nishantanülla Davidman niycälila. Niptinmi David nin: “Mandacücäpa maśhan canäpä mishquicullanmá. Yaꞌa mana cäniyu waccham callá” nil.

24Chaynu David nishantam mandacücäpa yanapänincuna Saulman willaycälimula.

25Saulñatacmi Filisteo läducunap maquinman David palpunanta munala. Chaymi yanapänincunacta jicutäcuyan: “Caynu nipämuy: ‘Mandacüca manam yaycapacuy päguctalächu alcayan. Aśhwanpa munayan ćhïnicünin Filisteo läducunäta cutichiyllactam. Chaymi wañuchishanta yaćhananpä umri cayninpa paćhac (100) utachancunacta apananta alcayan’ ” nil.

26Niptinmi Saulpa yanapänincuna Davidta willaycula. Chayćhümi David tantiälun mandacücäpa maśhan chaynüpa yaycuy allin caśhanta. Chaymi unanchaśhan muyunca manalä pasaptin,

27David pilyänincunawan liculcal ishcay paćhac (200) Filisteo läducunacta wañüchimun. Chaycunap umri cayninpa utachancunactam mandacücäman uycula maśhan yaycunanpä. Chaymi Saul wamla chulin Micalwan cuscächila.

28Chayta licayculmi Saul tantialpula quiquin Tayta Dios Davidta yanapäśhanta. Jinaman wamla chulin Micalpis cuyaśhantam tantiälun.

29Chaymi Saul mas-mastaña Davidta manchalicucuyan. Jinalmi wañunancama Davidpa ćhïnicünin licalïla.

30Chaynütacmi Filisteo läducunap puydïnincuna pilyä yalapämuptinpis David llallïlü-llallïlü cala, Saulpa yanapänincunapïtapis mastalä canpis. Chaynüpam David sumä lisisha-lisisha licalïla.