Numeros 32 - Old Testament Quechua Wanca（QVW）

Rubenwan Gad ayllucunam tücäninta ćhasquipäcun Deut 3.12-22

1Ruben aylluwan Gad ayllupam achca-achca uywancuna capäcula. Paycunam Jazer lädućhu, Galaad lädućhu uywacunacta uywananpä allin caśhanta licapäcula.

2Chaymi Moisesman, sasirdüti Eleazarman, malcap puydïnincunaman lilcälil caynu nipäcula:

3“Atarot, Dibon, Jazer, Nimra, Hesbon, Eleale, Sebam, Nebo, Beon,

4läducunacta Tayta Diosmari Israel malcap maquinman ćhulaycamula. Caycunamari cay nunayquicuna uywacunacta uywapäcunäpä allin caycullan.

5Llaquipaycälimalꞌa cay allpacunätari tücaycälichillämay; chayćha Jordan mayucta manaña pasachipällämanquichu” nil.

6Nipäcuptinmi Moises nin: “¿Allinchun amcuna cayćhu quïdacaycäliptiqui wawꞌi-caśhayquicuna pilyä liyalcäśhan imatá?

7¿Imapïmi Tayta Dios limalicuśhan allpaman Israel malca-masiqui chimpapäcünanpä jucmanyayalcächinqui?

8Taytayquicunapis caynümi lulapäcula Cades-barnea lädupi allpäta licachimü caćhaptí.

9Escol pampacama licä lipäcuśhanpi cutilälimulmi israelcunäta jucmanyälälichin Tayta Dios limalicuśhan allpaman mana yaycapäcunanpä.Num 13.17-33.

10Chaymi Tayta Diospa piñacuynin sumä-sumä waläluptin limalicüla cay nil:

11‘Awquilluyqui Abrahamman, Jacobman, Isaacman limalicuśhá allpäman mana cäsuculcäśhanpam Egiptopi yalamücunaca ishcay ćhunca (20) watayüpi janaman mana ćhäpacunꞌachu.

12Jefonep chulin Caleb, jinaman Nunpa chulin Josuellam yaycapäcunꞌa; paycunallamari Tayta Diosman llapan śhunꞌunwan chalapaculcäla’ nil.

13Chaymi Israel caśhtacunäpä Tayta Dios sumä-sumä piñacüla. Jinalmi mana allin lulä milaynincunacta lluy wañunancama tawa ćhunca (40) wata chunyäcunäćhu pulichila.Num 14.26-35.

14Canan am ¡juchasapap milaynincuna! Amcuna taytayquita atichïniquiwan Israel caśhtacunäman Tayta Diospa piñacuynin sumä walanantamari ćhapayalcanqui.

15Sïchuśh amcuna Tayta Diosta mana cäsuculcaptiquiꞌa jinantin malcätam chay chunyäcäćhu caćhaycälälishunqui. Amcuna-laycutacmi malcantinta camacaycälälishunqui” nil.

16Niptinmi Ruben aylluwan Gad ayllu Moisesman aśhuycälil nipäcula: “Cayćhümi yaꞌacuna uywäcunapä canćhacta lulapäcuśhä; milaynïcunapäpis malcachaculcäśhämi.

17Ñatac yaꞌacunam Israel caśhtacunäpa puntanta listu-listu armädu lipäcuśhä, chay allpaman ćhächipäcunäcama. Milaynïcunañatacmi murälläśha malcaćhu quïdapäcunꞌa, chay malcayü nunacunaca imactapis mana lulapäcunanpä.

18Lluy Israel caśhtacunaca allpancunacta ćhasquipäcunancamam wasïcunacta mana cutipämuśhächu.

19Ñatac yaꞌacunap tücaní allpacunaca Jordan mayup inti ishpimunan lädućhüñam cayan. Chaymi Jordan mayup chimpanćhu cä allpacunäpïta manaña tücachimänayqui canꞌañachu” nil.

20Niptinmi Moises nin: “Chaynu pilyanayquipä listu-listuña cayalꞌa Tayta Diospa ñawpäninta pilyapämu lipäcuyꞌari.

21Jordan mayucta chimpapäcul Tayta Diospa yanapayninwan pilyapämuy, ćhïnicüniquicunacta pay camacaycunancama.

22Chaynu Tayta Dios allpäta maquiquiman ćhulaycämuptinmi wasiquita libriña cutipämunquiman. Tayta Dioswanpis israelwanpis limalicuśhayquita lulälälinquiñamari. Chaynüpam cay allpaca Tayta Dios nishanmannu amcunapäña capäcunꞌa.

23Ñatac chaynu mana luläpäculꞌa mana cäsucuyniquiwanmi Tayta Diospä mana allin cayalcanqui. Chay juchayquipïta mućhuchishamari capäcunqui.

24Milayniquicunapä malcacta śhalcachipäcuyꞌari, uywayquicunapäpis canćhacta lulapäcuy. Ñatac limalicuśhayquitapis lulaycäliyꞌari” nil.

25Niptinmi Gad ayllucunäwan Ruben ayllucunaca Moisesta nipäcun: “Cay nunayquicuna Tayta Dios nishanmannüćha lulaycälilläśhä.

26Cay Galaad lädućhüćha chulïcunapis, walmïcunapis lluy uywäcunapis quïdaculcanꞌa.

27Cay nunayquicunañatacćha Tayta Dios nishanmannu listu-listu pilyapämü paypa ñawquin lipäcuśhä” nil.

28Chaynu captinmi sasirdüti Eleazarta Nunpa chulin Josueta, Israel ayllup yaśhancunacta Moises camachila, cay nil:

29“Sïchuśh Tayta Dios munaśhanmannu Gad ayllucunäwan Ruben ayllucunaca amcunawan cusca, Jordan mayucta chimpal allpaca maquiquićhüña cayaptinꞌa, paycunamanmi uycälinqui, chay duyñuchaculcäśhayqui Galaad malcacta.

30Mana chimpapäculñatacmi ichá Canaan malcäćhu amcunawan cuscacta tücaycälishunqui” nin.

31Niptinmi Gad ayllucunäwan Ruben ayllucunaca nipäcun: “Tayta Dios nishannüćha cay nunayquicuna lulaycälilläśhä.

32Yaꞌacuna Tayta Diospa yanapayninwanćha Canaan malcäman listu-listu chimpapäcuśhä. Ñatac yaꞌacunap tücäní Jordan mayup inti yalamunan lädućhümari canꞌa”Jos 1.12-15. nil.

33Chaynüpam Gad, Ruben ayllucunäman, jinaman Josepa chulin Manases partin ayllumanpis Moises uycula Amhor läducunäpa mandänin Sehonpa allpanta. Chaynütacmi Basan nasyunpa mandänin Ogpa allpantapis, jinaman muyülïninćhu cä malcacunätapis uycula.

34Gad ayllucunämi cay malcacunäta śhalcachipäcula: Dibon, Atarot, Aroer,

35Atarot-sofan, Jazer, Jogbeha,

36Bet-nimra, Bet-aran malcactapis. Chaynütacmi uwishcunap canćhantapis lulapäcula.

37Ruben ayllucunañatacmi cay malcacunäta śhalcachila: Hesbon, Eleale, Quiriataim,

38Nebo, Baal-meon, Sibma malcactapis. Cay lulaśhancunätam muśhü śhuticta ćhulala.

39Manasespa chulin Maquirpa milaynincuna Galaadman lipäculmi chayćhu yaćhä Amhor läducunäta alapacälälila.

40Chaynüpa Galaad malcacta Manasespa chulin Maquirman Moises uycuptinmi chayćhu yaćhapäcula.

41Chaynütacmi Manasespa chulin Jairpis tacsha malcacunäpi pudiracuycul Havot-jair nïwan śhutichäla.

42Chaynütacmi Nobapis Kenat malcacta, lluy tacsha malcantincunacta pudiracuycul quiquinpa śhutinta ćhuläla, Noba śhutiwan.