1 Cronicas 18 - Old Testament Quechua Wanca（QVW）

Davidmi ćhïnicünincunacta llallin 2Sam 8.1-14

1Chaypïta Filisteo läducunäta David llallilcul, duyñuchacuyculmi Gat malcacta lluy malcachancunactawan quitäla.

2Chaynütacmi Moab läducunäpis llallïläliptin, Davidpa uywaynincunaman licalilcälil alcabälacunacta pägapäcula.

3Chaynütacmi Hamat lädućhu cä Soba malcap mandacünin Hadad-ezertapis David llallïla. Eufrates lädućhu pudiracuycuśhanta tacyachinanpä liyalmari David llallïla.

4Paycunapïtamari David duyñuchacuycula: walanga (1,000) carritacunacta, anćhish walanga (7,000) sillädacunacta, ishcay ćhunca walanga (20,000) ćhaquillawan lï pilyäcunactapis. Jinaman carrita aysä cawallucunäpa ancuncunactapis lluymi cuchüla. Paćhac carritacunacta aysanallanpäñam caćhaycüla.

5Ñatac Soba malcap mandacü Hadad-ezerta yanapäninmi, Damascoćhu cä Siria läducuna paćhcälälimula. Jinaptinmi paycunactapis ishcay ćhunca ishcayniyu walangacta (22,000) David wañüchila.

6Jinalmi Damascoćhu cä Siria lädumanpis nunancunacta David ćhulälun. Chaynu Davidpa maquinćhüña Siria läducunaca licalilälilmi, alcabälacta pagapäcula. Chaynüpamari Davidta Tayta Dios yanapäla lluy pilyaśhancunaćhu llallinanpä.

7Chaypïta Hadad-ezerpa puydï pilyänincunap ürupïta atajachicuncunactam, David duyñuchacuycul Jerusalenman apächila.

8Chaynütacmi Hadad-ezerpa Tibhatwan Cun malcancunaćhu cä, achca-achca brunsicunätapis duyñuchacuycula. Chay brunsicunäwanmari Salomon lulachila istanquicta, paradïruncunacta, brunsipi cä lluy sirbichicunanpä cäcunactapis.

9Chay Soba lädup mandacünin Hadad-ezerpa lluy pilyänincunacta David llallishantam, Hamat malcap mandacünin Toi yaćhäña.

10Chaymi chulin Adoramta apachila illaypïta, brunsipïta, ürupïta luläśha aläjacunacta, Davidwan allinpä licachicuyninwan. Jinaman niyculam: “Hadad-ezerta allićhümi llallïlanqui” nil. Chaynu mandacü Toi lulala Hadad-ezerwan ćhïninacuśhan-laycum.

11Chay Joram uycuśhancunäta Tayta Diospämi mandacü David japächaycula. Chaynütacmi Edom, Moab, Amon, Filisteo, Amalec malcacunäpi quitamuśhan illaycunätapis, ürucunätapis japächaycula.

12Jinaman Sarviap chulin Abisaimi, Caćhi Pampaćhu ćhunca pusäniyu walanga (18,000) Edom läducunäta camacaycüla.Sal 60.

13Jinalculmi jinantin Edom malcamanpis nunancunacta David ćhuläla. Jinaptinmi paycunapis Davidpa maquinćhüña capäcula. Chaynüpamari Tayta Dios Davidta yanapäla lluy pilyaśhancunaćhüpis llallinanpä.

Davidpa pilyänincunap puydïnincuna 2Sam 8.15-18; 20.23-26

14Jinantin israelćhümi David mandala sumä allin cällanman, tincüllanman lluy nunancunacta.

15Pilyänincunap puydïninmi Sarviap chulin Joab cala; isquirbïninñatacmi Ahiludpa chulin Josafat cala.

16Sasirdütincunañatacmi Ahitobpa chulin Sadoc, Abiatarpa chulin Abimelec capäcula. Isquirbïninñatacmi Savsa cala.

17Chay Ceret, Pelet ayllucunätañatacmi Joiadapa chulin Benaia mandacula. Davidpa chulincunañatacmi puydï yanapänincuna capäcula.