Proverbios 12 - Old Testament Quechua Wanca（QVW）

1Limapaycäta cuyäcá yaćhaycätamá cuyan;

anyapaycäta ćhïnicücäñatacmi ichá luclu nuna.

2Allin nunäta Tayta Diosmi llaquipaycun;

mana allin pinsamintuyücunätam ichá mućhuycachin.

3Mana allinta lulä nunaca imaypis manamá tacyaycunꞌachu;

allin nunacunäpa tacyaynintañatacmi ichá imapis mana cuyuchinꞌachu.

4Allin walmica wayapanpä curunannu allinpam licachin;

mana allin walmïñatacmi ichá wayapanpa uma nanaynin.

5Allin nunaca allincällamanmá pinsayan;

mana allin nunacunäñatacmi ichá ingañayllacta pinsayalcan.

6Juyu mana allin nunäpa limaynincuna wañuchicü trampanümá;

allin nunäpañatacmi ichá limaynin libraycun.

7Mana allin nunacunäta Tayta Dios pampaman muyuchiptinmá camacapäcun;

allin nunacunäñatacmi ichá wasintin masïsu tacyapäcun.

8Nunaca yaćhayniyu caśhan-laycumá alawäśha;

mana allin śhunꞌuyu nunäñatacmi ichá mana cäpa licaśha.

9Nunatucüśha cayal mana micuyniyu caypïtá,

mas allin, mana cäpa licaśha cayalpis sirbï nunayu caymi.

10Allin nunaca uywancunacta tuqui allinpamá licaycun;

juyu mana allin nunacunäñatacmi ichá pasaypi mana llaquipayniyu.

11Ćhaclanćhu lulacücäpá micuynin manamá pishiycunꞌachu;

yanꞌal muspaycaćhayä illacunacá mana fisyuyümá.

12Juyu nunacunäta mana allin wañupacuynincunamá ćhänalächin;

allin nunacunäñatacmi ichá lantanu allicta wayuycälin.

13Mana allin nunaca quiquinpa limayllanwanmi trampawannu ćhänachicun;

allin nunäñatacmi ichá ima ñacaypïpis allin yaluycun.

14Nunaca allin limaśhanmannümá allincäta ćhasquiycälin;

imanuypis lulaśhanmannümá uycuśha capäcun.

15Luclüpá ima lulaśhanpis allinmá cayan;

yaćhayniyücäñatacmi ichá limapäśhanta uyalicun.

16Luclucá piñacuyninta jucllam camalachin;

tantiayniyücäñatacmi ichá sumä-sumä ruydupaptinpis upällacuycun.

17Allin rasuncällacta limäcá ima licaśhancäpi niyculpis artillactamá limaycun;

casquishcunäñatacmi ichá licaśhanpi casquinwan niycun.

18Nana-nanaypa limäcunäpa limaynin ispädanülämá ćhaycun;

yaćhayniyücäpa limayninñatacmi ichá jampicun.

19Rasun limaycá wiñay-simpripämá tacyaycunꞌa;

arti limaycämi ichá juclla chincälunꞌa.

20Mana allinllacta pinsäcunäpa śhunꞌunćhu casquicuycunallamá cayan;

allincällacta ashiycunäćhuꞌa cushicuyllamá cayan.

21Allin nunäta ima mana allinpis manamá ćhanꞌachu;

mana allin nunätañatacmi ichá mana allincunälla ñitilanꞌa.

22Casquishcunätá Tayta Dios millachicunmi;

rasuncällacta luläcunätañatacmi ichá allinpä licaycun.

23Yaćhayniyu nunaca yaćhaśhanpi manamá alawacuyanchu;

luclucunäñatacmi ichá sumä-sumä luclucayninpi alawacun.

24Allin tantiaywan lulä nunacunämi juccunacta maquinćhu cachinꞌa;

illacunäñatacmi ichá jucpa maquinćhu capäcunꞌa.

25Sumä llaquicuycämi nunap śhunꞌunta pasaypicta lulan;

cuyacuywan limäcämi ichá cushichin.

26Allin nunaca nuna-masinta allinninmanmi puśhaycun;

juyu nunacunäpa puliyninñatacmi ichá mana allinman ćhächin.

27Illa nunaca munti uywa chalamuśhallantapis manamá ancaycunchu;

allin tantiayniyu nunäñatacmi ichá imallactapis mana usuchinchu.

28Allin tincüllanćhu puliycuyca allin cawsaymanmi ćhächin;

allin caminućhuꞌa manamá wañuy canchu.