1Tincunan carpäpïtam Tayta Dios Moisesta ayala. Chayćhümi nin:
2“Israel caśhtacunäta caynümi ninqui: Mayanpis Tayta Diosta uywacta uycälilꞌa apapämuy wäcacta ütac uwishta.
3“Sïchuśh uycuyniquićhu wäcacta cañaycälilꞌa allinnin wirannin wäcacta uycäliy. Chayta tincunan carpap puncunćhümi uycälinqui Tayta Dios ćhasquiycunanpä.
4Chay cañaywan uywa uycuśhanpa umanman maquinta ćhulaycuchun, juchanta uywaca lluy apananpä. Chaynüpam juchancunapi chuyanchaycuśha canꞌa.
5Chay malta wäcacta Tayta Diospa ñawpäninćhümi ćhipiycunꞌa. Aaronpa chulincunawan sasirdüticunäñatacmi chay wäcap yawarninta Tayta Diosman uycälinꞌa, jinaman uycuna patacpä muyülïninman chächuycälinꞌa. Chay cala tincuna carpap puncuscanćhümi.
6Jinaman chay cañaywan uycuśhancäpä utanta uśhtiyculmi wartuśhchaycunꞌa.
7Sasirdüti Aaronpa chulincunañatacmi uycuna patacman yamtacta ćhulaycul ninacta lataycachinꞌa.
8Jinaman paycunatacmi chay yamtap janäninman aycha cuchüśhacunäta tincüllanman ćhulaycapäcunꞌa: umanta, allashquinćhu cä wilacunactapis.
9Paycuna allashquincunacta, caćhpancunacta yacuwan paꞌapäcuptinmi sasirdütïñatac uycuna pataccäćhu cañaycunꞌa. Cay cañaywan uycuycämi Tayta Diosman tuqui mishqui aśhnä ćhaycunꞌa.
10“Mayanpis uwishta ütac capishta cañaycul uycunanpä apamul allinnin ulu uywactam apamunꞌa.
11Chay uywactam Tayta Diospa puntanćhu ćhipinꞌa uycuna patacpa nurti lädunćhu. Aaronpa chulincuna, sasirdüticunäñatacmi yawarninta chächunꞌa chay uycuna patacpa muyülïninman.
12Chaynu uyculmi chay partïsha aychacta, umantawan allashquinćhu wilantapis japächaycunꞌa. Jinalculmi uycuna patacćhu yamta waläcäman sasirdütica ćhulaycunꞌa.
13Chay uycüca allashquintapis, ćhaquintapis lluy paꞌaycuptinmi sasirdütiñatac chay uycuna pataccäćhu cañaycunꞌa. Chaynu cañaywan uycuśhanmi Tayta Diosman tuqui mishqui aśhnä ćhaycunꞌa.
14“Sïchuśh Tayta Diosta uycuyniquićhu pälï uywacunacta cañaycula ulpaycunacta ütac mallwa ulpaycunacta apamuchun.
15Chaytapis chaynümi sasirdütica uycuna pataccäćhu uycunꞌa. Umanta jululculmari uycuna patacpa muyülïninman yawarninta apchïlunꞌa. Jinalculmi uycuna patacćhu cañaycunꞌa.
16Uśhcuntawan laplantañatacmi uycuna patacpa inti yalamunan läduman jitaycunꞌa. Chay ućhpa julunancämanmari jitaycunꞌa.
17Jinalculmi chay pälï uywacta ishcayman partïlunꞌa mana pasachillal. Jinaptinmi laplan wicćhu cayćhu quïdanꞌa. Jinalculmi uycuna patacćhu yamta waläcäćhu sasirdütica cañaycunꞌa. Chaynu cañaywan uycuśhanmi Tayta Diosman tuqui mishqui aśhnä ćhaycunꞌa”.
Who We AreWhat We EelieveWhat We Do
2025 by iamachristian.org,Inc All rights reserved.
