2 Samuel 5 - Old Testament Quechua Wanca（QVW）

Israelpa mandäninpämi Davidta japächaycun 1Cro 11.1-3

1Chaypïtam Israelćhu cä lluy ayllucunaca Hebronman lipäcula Davidwan limapäcü. Chayćhümi Davidta nipäcun: “Taytallay, juc taytallap yawarllanmi, aychallanmi canchic.

2Saul unay mandacü caśhanpïñamari jinantin Israel pilyäcunäta am mandalanqui. Jinaman Tayta Diosniquipis amtamá limalicuśhulanqui: ‘Anmi Israel malcäta caminaycüca, mandaycüca canqui’ ” nil.

3Chaynümi Israelpa lluy yaśhancuna Hebronman lipäcul mandacü Davidwan limapäcula. Chayćhümi mandacü David Tayta Diospa ñawquin limalicula. Chaypïtam Israelpa mandacünin cananpä Davidta japächaycapäcula.

4Quimsa ćhunca (30) watayümari David mandacü cayta allaycula. Tawa ćhunca (40) watamari lluy mandacula.

5Hebron malcaćhu yaćhalmi anćhish wata süta quillayu Juda nunacunäpa mandacünin cala. Jerusalen malcaćhu yaćhalñatacmi quimsa ćhunca quimsayu (33) wata Israelpa, Judapa mandacünin cala.Jerusalen malcactam David duyñuchacun 1Cro 11.4-9

6Mandacü Davidmari nunancunawan Jerusalenta lipäcula Jebus lädućhu yaćhäcunäwan pilyamü. Ñatac Jebus läducunaca: malcactam David duyñuchacuycula. Chaytam Davidpa Malcanmi nipäcun.

8Chay muyunmi David nin: “Jebus läducunäta camacaycü lïcunaca cay yacu pasä tunilcäpä ishpipäcuy. Jinal llapan śhunꞌüwan ćhïnicuśhá aplacunäta, wishtucunäta wañuchimuy” nil. Chaypïmi cay limay śhamun: “Aśhwanpa cay wasiman wishtupis, aplapis manañamá yaycunmanchu” nil.

9Chay sumänin sigüru cäcämanmi David taycucuycula; jinalmi Davidpa Malcan nïta śhutichäla. Jinamanñatacmi malcap muyülïninta murällälun patacchäśhanpïta aśhta palasyuncama.

10Sumä munayniyu Tayta Dios Davidwan cayaptinmari mandacuynin masta-masta tacyalpula.

Mandacü Hirammi yanapäcunacta Davidman caćhan 1Cro 14.1-2

11Chaynütacmi Tiro malcap mandacünin Hirampis Davidman caćhala willacünincunacta, cedro ilucunacta, jinaman carpintïrucunacta, lumi labräcunactapis palasyunta lulawshinanpä.

12Chaycunawanmari David tantialpula israelcunäpa mandacüninpä Tayta Dios ćhulaycuśhanta. Chaynütacmi Israel malcanta cuyayninwan yanapaycul tacyalpachishantapis tantiala.

Jerusalenćhu näsishan Davidpa chulincuna 1Cro 3.5-9; 14.3-7

13Hebron malcapïta Jerusalenman David liculñatacmi chayćhu walmincunapis uywanacuśhan walmincunapis mas cacula. Paycunaćhümari maslä walaśh wamla chulincunapis cacula.

14Jerusalenćhu näsi Davidpa walaśh chulincuna caycunamari: Samua, Sobab, Natan, Salomon,

15Ibhar, Elisua, Nefeg, Jafia,

16Elisama, Eliada, Elifeletpis.

Filisteo läducunätam David llallin 1Cro 14.8-17

17Chaynu Israelpa mandänin David japächaycuśha caśhanta Filisteo läducunaca yaćhälälilmi cuntran śhacayalcämun. Davidñatacmi chayta yaćhälul sigüru canancäman licula.

18Chay Filisteo läducunäñatacmi śhapämul Refaim pampaman ćhälälimuña.

19Chaymi Tayta Diosta David tapula: “¿Filisteo läducunäwan pilyamü lishächun? ¿Maquïmanchun paycunacta ćhulaycamunqui?” nil.

Niptinmi Tayta Dios: “Liy jinalla. Rasunpa, maquiquimanmari yaꞌa ćhulaycamuśhä” nin.

20Chaymi Baal-perazim läduman lil chayćhu David llallïlun. Jinalmi nin: “Llülla yacu lïcänümi ćhïnicünïcunacta llallinäpä Tayta Dios caminucta quićhaycapaman” nil. Chaymi chay paräjicta Baal-perazim nipäcula.

21Chayćhümá Filisteo läducunaca taytachancunacta caćhaycäläliptin David nunancunawan apaculcäla camacaycälälinanpä.

22Ñatac Filisteo läducunaca caśhan śhapämulmi Refaim pampaćhu achälälin.

23Chayćhu Tayta Diosta David yapa tapuptinmi pay nin: “Puntanpa ama yaycuychu. Aśhwanpa balsamo lantacunäcama cunćhaycälil ipan lädup allacaycäliy.

24Chay balsamo lantap pallaynincunaćhu puliyätanu uyalipäcul-pacham pilyayta allacaycälinqui. Chayta uyalilmi yaćhanqui, pilyä Filisteo läducunäta camacaycünayquipä yaꞌa Tayta Dios puntayquita lishäta” nil.

25Chaynu Tayta Dios nishantanüllam David lulaycula. Jinalmi Geba malcapïta Gezercama Filisteo läducunäta lluy llallïla.