Proverbios 24 - Old Testament Quechua Wanca（QVW）

19

1Juyu nunacunäta ama imbidicuychu;

amatac paycunawan jucllachacuypischu.

2Wañuchicuycunallamá śhunꞌunćhu timpuyan;

mana allin lulaycunallactamá shiminpis limayan.

20

3Yaćhaywanmi wasicta śhalcachinchic;

allin tantiaywanmi simintunta tacyachinchic.

4Yaćhaywanmi wasinman alli ćhaniyücunacta,

tuquish cäcunacta juntachinchic.

21

5Yaćhayniyüca mas munayniyümá;

tantiayniyüca mas callpasapamá.

6Allin caminaycüwanmi pilyayta allaycunchic;

achca tantiachïcücunawanmá pilyayta llallinchic.22

7Lucluca yaćhaycäta manamá tantiayta atipanchu;

juntunacuyćhu ima limananpäpis umanćhu imapis manamá canchu.

23

8Mana allinllacta lulananpä śhunꞌunćhu imaypis uywäcá

“Mana allin lulä nuna” nisham.

9Luclüpa ima lulay munaśhanpis juchallamá;

jamurish nunätá lluymá ćhïniculcan.

24

10Ñacaycuna caśhayquićhu jucmanyälulꞌa

pishi callpayüllamá canqui.

25

11Yanꞌal-yanꞌalpi wañunanpä cäraycuśha cäcunäta libraycuy;

wañuypa patanćhu cäcunätari salbaycuy.

12Masqui “manam yaćhalächu” niptiquipis,

¿śhunꞌucta lisiycüca manachun licayan imamá?

¿Cawsayniquita licaycüca manachun yaćhayan imatá?

Paymari lulaśhanman tincüta lluytapis pägaycunꞌa.26

13Iju, urunwaypa mishquintari micuy;

chay urunwaypa ćhulananćhu mishquin sumä allin mishqui-mishquimá.

14Chaynümá cawsayniquipä yaćhayca mishqui-mishqui cayan.

Talïlulꞌa allin wayuynintamá cawsayniquićhu licaycunqui;

alcaycuśhayquica lulacacanꞌamá.27

15Juyu nunanuꞌa, amari allin nunap wasinta licapayaychu;

amari wasinpi imantapis waycayaychu.

16Allin nunaca anćhish cuti palpülulpis caśhanmá śhalcapacamun;

mana allin nunacunäñatacmi ichá palpülul pampamanña muyülun.

28

17Ćhïnicüniqui imamanpis ćhaptin ama asipaychu;

mana allinman palpuśhanpi śhunꞌuyqui ama cushipächunchu.

18Chay cushipäśhayquica manamá Tayta Diospa śhunꞌunpänüchu;

chayćha piñacuyninta ćhïnicüniquipi manalcächinman.

29

19Juyu nunacunäpi ama piñacuychu;

mana allin nunacunäpi ama imbidicuychu.

20Chay nunacunaca allinćhüchu manamá camacanꞌa;

juyu mana allin nunaca michïrunümá wañunꞌa.

30

21Iju, Tayta Diostari manchacuy, mandacücätari cäsucuy;

mana sujitacü nunacunäwan amari jucllachacuychu.

22¿Mayanmá yaćhan Tayta Dios chaynütac mandacüca imanuypa lawćhaycunantapis?

Unꞌaypïtamá mućhuchicuynin ćhämunꞌa.

Yaćhäcunäpa masta limapaycuśhancuna

23Yaćhäcunäpa limapaynincunamá caycunapis:

Quijanacuycunaćhu jucllanman śhalcuśhan manamá allinchu.

24Juchayücäta: “Cayꞌa mana juchayümi” niptinꞌa,

malcacunämi mana allinpä licapäcunꞌa,

nasyuncunämi ćhïnipapäcunꞌa.

25Juchayücäta tincüninman lawćhaycücäñatacmi ichá cushisha,

sumä allinpä imaćhüpis licaycuśha caycunꞌa.

26Imacta tapuptinpis tincüllanman niycücá

rasunpa apanacuśhanmá.

27Wasiquita śhalcachiyta munalꞌa

ćhaclayquicunaćhülä puntacta talpucamuy.

28Nuna-masiquip cuntran ama yanꞌalpi tistïgunu śhaycuyaychu;

mana cäpïta ama yanꞌalta limayaychu.

29Amatac niyaychu: “Imam lulamäśhantanümi yaꞌapis luläśhä;

tincüninmannümi cutichicüśhä” nil.

30Juc muyunmi illa nunap ćhaclanpa pasalá;

mana fisyuyu nunap üba talpuyninpamari pasalá.

31Chayćhu licälú caśhacunalla lluy juntäśhactamá,

itañacunalla wiñäśhactamá, lumi pilanpis lluy tunïshactamá.

32Chayćhu chay licaśhäta licapayalmi tantiapacülú.

Chay licaśhäwan caytamari yaćhaycú:

33Puñuylla puñucuptiquiꞌa, jitalaylla jitaläcuptiquiꞌa,

maquictapis curuśhpacuycul anćhaläcuptiquiꞌa,

34wacchayayca janayquićhu licalïlunman suwanümi,

pishipacuyca juclla alcansäśhunquiman armayu nunanümari.