Proverbios 29 - Old Testament Quechua Wanca（QVW）

1Anyapaptinpis cullu linlicuycuptinꞌa jucllam camacaycüśha canꞌa;

manamá mayanpis manalcachiyta atipanmanchu.

2Allin nuna mandacuptinꞌa malcaca cushicunmi;

juyu mana allin nuna mandacuptinñatacmi ichá malcaca ñacan.

3Yaćhaycäta cuyäcá taytanta cushichinmi;

watica walmiwan pulïcäñatacmi ichá cäninta mana caśhanman muyuchin.

4Tincüninman mandacücá nasyunta tacyaycachinmi;

imallapïtañapis alcabälallactaña mañäcämi ichá pampaman muyuchin.

5Nuna-masinta anchap alawäcá,

trampaman ćhächinallanpämi alawätucun.

6Juyu nunäpá cunca cuchuynin quiquinpa mana allinllanmá;

allin nunäñatacmi ichá cushicuypïta taquinlä canpis.

7Allin nunacá, wacchacuna imacunacta pasaśhanćhüpis tincüninmanmi śhalcuycun;

juyu mana allin nunacunätañatacmi ichá imactapis mana ucunchu.

8Achäquicta śhalcachï nunaca malcacta mana allinmanmi śhalcatityachin;

yaćhayniyücäñatacmi ichá piñacuyninta chasnücänu jawcayalpachin.

9Yaćhayniyüca luclu nunawan chalanacuyta allaycuptinꞌa,

lucluca piñacuylla, palacuylla ćhapaptinmi ima allinmanpis nï ćhanꞌachu.

10Nuna wañuchïcunaca allin nunacunäta ćhïnicunmi;

allin nunacunäta wañuchiytamari ćhapapäcun.

11Lucluca piñacuśhanmannümá lulaycun;

yaćhayniyücäñatacmi ichá piñacuyninta pasachin.

12Mandacüca articunawan apachicuptinꞌa,

lluy yanapänincunapis mana allinllamá capäcunꞌa.

13Ñacäcäpis, ñacachïcäpis chaynü-camallamá;

Tayta Diosllamari pulantapis cawsayta uycun.

14Wacchacunäta tincüninmannu licaycü mandacücäpá

wiña-wiñaypämi dispächun tacyaycunꞌa.

15Anyapaycuycäwan asutim yaćhayta uycun;

imallactapis mana anyapaycuśha ishpï wawicá mamanpa pinꞌayninmi.

16Juyu nunalla timpuyaptinꞌa juchallamá timpuycunꞌa;

ñatac paycuna pampaman muyupäcuśhantam ichá allin nunacunaca licapäcunꞌa.

17Chuliquita anyapaycuptiquiꞌa jawca cawsaytam uycuśhunqui;

awari, śhunꞌuyquita cushiycachinꞌamari.

18Tayta Diospa limapaynin mana captinꞌa malcaca mana allincämanmá liculcan;

yaćhachicuyta cäsucücäpäñatacmi ichá sumä cushicuy.

19Uyway nunacta shimillawanꞌa manamá allin caminuman ćhulaycuchwanchu;

tantiayalpis manamari lulaycunꞌachu.

20¿Licalanquichun uman chalaśhanta limäcunäta?

Chaynu nunapïtá allinlämi luclu nunäpis canman.

21Uyway nunayquita uchuyllanpïta munaśhanta lulacunanpä

caćhaycuptiquiꞌa, jatunyälul waꞌachïniquimá canꞌa.

22Imallapïpis piñacuyäcá pilyayllactamá talcachin;

rabyüsu nunacá mana allincunallactamá lulan.

23Nunatucücá uyshulächishamá canꞌa;

mana nunatucücäñatacmi ichá altuman juluycuśha canꞌa.

24Suwacunawan cunchawänacücá quiquinpa mana allinnintamá ashicun;

rasun cananpä limalicuyalpis upällacuycunmá.

25Nunacunäta manchaculꞌa juc trampactanümá ćhulacuyan;

Tayta Diosman chalapacücäñatacmi ichá salbaycuśha canꞌa.

26Puydïca yanapaycunantamá mayanñapis ashiycälin;

ñatac Tayta Diosllapïmi tincüllanman licaycuśha cayca śhaycamun.

27Allinllacta luläcunaca juyu mana allin luläcunäta millachicunmá;

juyu mana allin luläcunäpis allin luläcunäta millachicunmá.