Levitico 15 - Old Testament Quechua Wanca（QVW）

Umrica imanuypa anlapä licaśha caśhanpïtam nin

1Chaypïtam Moisestawan Aaronta Tayta Dios nin:

2“Israel caśhtacunäta caynu nimuy: Mayan wayapapapis umri cayninpa lulinćhu mana allin captinꞌa anlapä licaśhañam cayan.

3Chay mana allinca umri cayninpä chulicuyninta yalachimuptin ütac mana yalachimuptinpis chay nuna anlapä licaśhañam.

4“Chayurá chaynu ishyayniyu wayapa ima cämaman puñuycuśhanpis anlañam cayan. Chaynütac imaman täcuśhancäpis anlañamari cayan.

5“Chay cämacta mayanpis yataycücá yacuwanmi almacunꞌa, jinaman müdanancunactapis täśhanꞌam. Tutalpunancamamari anlapä licaśha canꞌa.

6“Chaynütacmi ishyäca täcuśhanman täcücäpis yacuwan almacunꞌa, müdanantapis täśhanꞌa. Tutalpunancamamá anlapä licaśha canꞌa.

7“Chaynütacmi ishyä wayapäta yataycücäpis, almacunꞌa, müdanantapis täśhanꞌa. Tutalpunancamamari anlapä licaśha canꞌa.

8“Chaynütac chay ishyäca mayan chuya nunamanpis tuwaycüluptinꞌa, chay chuya nunaca almacunꞌam, müdanantapis täśhanꞌam. Tutalpunancamatacmá anlapä licaśha canꞌa.

9“Chaynütacmi chay ishyä wayapaca sillanapä cäcunäman silläluptinꞌa chaypis anlañamari canꞌa.

10“Chaynütac ishyäca täcuśhanta mayanpis yataycülulꞌa almacunꞌam, müdanantapis täśhanꞌam. Tutalpunancamamá anlapä licaśha canꞌa.

11“Chay ishyäca maquinta mana paꞌacul mayantapis yataycüluptin chay yataycachicüca yacuwanmi almacunꞌa, müdanantapis täśhanꞌam. Tutalpunancamamari anlapä licaśha canꞌa.

12“Chaynütac chay ishyäca ima cutuśh mancactapis yataycüluptinꞌa paquïsham canꞌa; ilupi luläśha cäcunäta yataycüluptinmi ichá paꞌaylla paꞌapäcunꞌa.

13“Chay ishyä wayapaca allinyälulꞌa anćhish muyunmi alcanan. Chaypïlämi mayüćhu almacunan, müdanancunactapis täśhanan. Chaylämari chuyanchaycuśha caycunꞌa.

14Jinaman pusä muyuncäćhümi Tayta Dioswan tincuna carpap puncunman apamunꞌa ishcay ulpayta ütac ishcay mallwa ulpaytapis. Chaytam sasirdütiman uycunꞌa.

15Chayćhümi sasirdütica jucninta juchanpi uycunꞌa, juccäñatacmi cañaywan uycunapä cäcäta uycunꞌa. Chaynüpamari umri cayninwan ishyä wayapacta Tayta Dioswan chuyanchaycachinꞌa.

16“Ñatac wayapäpa chulicunanca yalüluptinꞌa almacunꞌam; tutalpunancamatacmi anlapä licaycuśha canꞌa.

17“Chaynütacmi chay chulicunanca ima müdanamanpis ütac cuyrupi luläśha imamanpis śhutüluptinꞌa täśhananmi; tutalpunancamatacmi anlapä licaśha canꞌa.

18“Chaynütacmi mayan wayapapis walmiwan puñülulꞌa ishcaynin almaculcänan; tutalpunancamatacmari anlapä licaśha canꞌa.

Walmica imanuypa anlapä licaśha caśhanpïtam nin

19“Juc walmi quilla ishyacuyninćhu cayal anćhish muyunmi anlapä licaśha canꞌa. Mayanpis yataycücá anćhish muyun tutalpunancamam anlapä licaśha canꞌa.

20Chay walmi ishyacuyninćhu cayal imamanpis ćhaćhaycuśhanca anlapä licaśham canꞌa. Chaynütacmi imaman taycuycuśhancäpis anlapä licaśha canꞌa.

21Chaynütacmi chay walmip cämanta yataycücäpis yacuwan almacunꞌa, müdanantapis täśhanꞌam; tutalpunancamatacmi anlapä licaśha canꞌa.

22Chaynütac chay walmi imamanpis täcuycuśhancäta mayanpis yataycüca almacunꞌam, müdanantapis täśhanꞌam; tutalpunancamatacmi anlapä licaśha canꞌa.

23Cämanćhu ima cäcätapis ütac täcuśhanćhu imapis cäcäta mayanpis yataycüca tutalpunancamam anlapä licaśhatac canꞌa.

24Chaynütac chay walmiwan mayan wayapapis puñülulꞌa anćhish muyunmi ishyacuyninwan anlaman muyülunꞌa. Jinaman puñuśhan lluy cämacunaca anlapä licaśham canꞌa.

25“Ñatac juc walmi yawarpa janallanćhu cayaptin ütac ishyacuynin camacäluptinpis jinalla yawar śhayämuptinꞌa chay śhamuśhancama anlapä licaśham canꞌa, ishyacuyninćhunüpis.

26Chaymi chay walmip yawarnin śhamuśhancama puñuśhancunaca, jinaman imamanpis täcuśhancunaca anlapä licaśha canꞌa, ishyacuyninćhünüpis.

27Chaycunacta mayanpis yataycücá anlapä licaśham canꞌa; chaymi yacuwan almacunꞌa, müdanantapis täśhanꞌa; tutalpunancamamari anlapä licaśha canꞌa.

28“Ñatac chay yawar śhamuśhanca manalcüluptinꞌa anćhish muyuncamam chuyanchacunanpä alcanan.

29Jinaman pusä muyuncäćhümi Tayta Dioswan tincuna carpap puncunman śhamunꞌa ishcay ulpaywan ütac ishcay mallwa ulpaywan; chaytam sasirdütiman uycunꞌa.

30Chayćhümi sasirdütica jucninta chuyanchaycuśha cananpä uycunꞌa, juccäñatacmi cañaywan cä uycunapä uycunꞌa. Chaynüpamá Tayta Diospa ñawpäninćhu chuyanchaycuśha canꞌa anlapä licaśha cä walmica.

31“Chayurá Israel caśhtacunätam anla caypïta japächaculcänanpä yaćhachipäcunqui. Chayćha amcunap ćhawpiquićhu cä tincunanchicpä cäcäta anlachipäcul mana wañupäcunquichu” nil.

32Chayurá cay camachicuycunamari cayan yawar ishyacuyninwan cä walmicunaca, ütac wayapacunäpä chulicunan yalamuśhanpi anlapä licaśha cäcunäpä.

33Chaynütacmi cay camachicuyca ishyacuyniyu walmicunäpä, walmip wayapap ishyaptin yalamücunäpäpis, jinaman ishyacuyninćhu cayä anla walmiwan puñü wayapapäpis cayan.