1Josepa chulinmi Manases cala, Manasespañatacmi Maquir cala, Maquirpañatacmi Galaad cala. Galaad ayllup puydïnincunam Moisesta, Israel caśhtaćhu ayllucunäpa puydïnincunacta nipäcun:
2“Moises, amtam Tayta Dios camachishulanqui Israel caśhtacunäman allpäta chüsaywan tücachinayquipä. Camachishulanquitacmi Zelofehad ayllup walmi chulincunaman tücäninta tücachinayquipäpis.Num 27.7.
3Sïchuśh chay wamlacunaca Israelpa jucnin aylluncunawan casaracüluptinꞌa chay tücänin allpa wayapanpa ayllunmanñam pasäśha canꞌa. Chaynüpaćh tücamäśhan allpacta pirdipäcüman.
4Israel caśhtacunäpä libri cä wata ćhämuptinmi chay walmicunäpä allpan wayapanpä ayllunmanña wiñaypä pasälunꞌa. Jinaptinćha ayllüćhu allpaca mirmanꞌa” nil.
5Niptinmi Tayta Dios camachishanmannu Israel caśhtacunäta Moises nin: “Josepa milaynin ayllucunaca allintam niyalcan.
6Tayta Diosñatacmi Zelofehadpa wamla chulincunapïta caynu camachila: ‘Amcuna mayanwanpis casaraculcanquimanmi, aylluyqui Josepa milaynincunallawanꞌa.
7Jinantin Israel caśhtacunäćhu manamá ayllunman-cama tücänin allpäta pasanacuyänanchu. Taytanpa tücaśhancunällactam uywapäcunan.
8Mayan wamlamanpis allpacta tücachiptin ayllullanćhu cä walaśhwanmi casaraculcänan. Chaynüpam Israel caśhtacunaca ayllunman tücä allpawan duyñu capäcunꞌa.
9Chaymi juc-juc aylluman-cama tücänincunacta mana pasayalcächinanchu. Israelpa ayllunćhu-camam imam tücaśhancäta uywapäcunan’ ” nil.
10Chaynu Tayta Dios Moisesman camachishanmannümi Zelofehadpa wamla chulincuna lulapäcula.
11Paycuna tiyunpa chulincunawanmi casaraculcäla. Chay walmicunämi cala: Maala, Tirsa, Hogla, Milca, Noapis.
12Chaynüpam Josepa chulin Manasespa ayllunpïta cä walmicunäpä allpancuna jinalla taytanpa allpanćhu quïdacula.
13Moab lädup ulꞌunćhu, Jordan mayup patanćhu, Jerico malcap chimpanćhu Israel caśhtacunaca cayalcaptinmi caycunacta Tayta Dios Moisesman camachila.
Who We AreWhat We EelieveWhat We Do
2025 by iamachristian.org,Inc All rights reserved.
