Daniel 5 - Old Testament Quechua Wanca（QVW）

Pilaćhümi juc maqui isquirbin

1Achca wata pasäluptinñam mandacü Belsasar juc jatun cumbiducta walanga (1,000) puydï yanapänincunapä lulachila. Chayćhümi bïnucta lluy paycunawan upyapäcula.

2Chaynu Belsasar upyayalmi taytan Nabucodonosor Jerusalenćhu alawana wasipïta ürupi, illaypi cä bäsu apachimuśhancunäta apapämunanpä nila. Chay bäsucunawan mandacüca puydï yanapänincunawan, walmincunawan, chuli waćhänincunawan upyapäcunanpämari apamunanpä nila.

3Chaynu niptinmi Jerusalenćhu Tayta Diospa alawana wasinpi unay apachimuśhan üru bäsucunäta apapämula. Chaywanmi mandacüca, puydï yanapänincuna, walmincuna, chuli waćhänincunawan upyapäcula.

4Bïnuwan shincäśha cayalcalmi ürupi, illaypi, brunsipi, jïrrupi, cullupi, lumipi luläśha taytachancunacta alawapäcula.

5Jinayalcaptinmi jatun michïru achquiyaptin juc maquip dïduncuna juclla licalilcamul palasyup yulä pilanćhu isquirbiyta allacuycun. Chay maqui isquirbishanta licälulmi mandacüca,

6manchacuypi imanaytapis mana atipal yuläyälun aśhta ćhaquinpis, unꞌulnincunapis chucchucuyan.

7Chayćhümi mandacüca ayaycaćhacuyan rüjacuna, licacücuna, uyllurwan licacuyta yaćhäcuna śhapämunanpä. Paycunamanmi nichila: “Cay pilaćhu isquirbïshaćhu cäcäta lïgiycul imapä caśhantapis niycamäcätá, yaꞌap atimäní puydïcäpa atimünin puydïpämi ćhulaycuśhä. Chayćha sumä murädu müdanawan, ürupi cullarwan ćhulaycuśhalä canꞌapis” nil.

8Niptinmi lluy yaćhäcunäta mandacücäman puśhapäcula. Ñatac chayćhu paycuna lïgiytapis nï imapä caśhantapis tantiayta manam atipapäculachu.

9Jinaptinmi mandacü Belsasar umapis sumä muyüśha cacuyaptin cäranpis yuläyacalpun. Puydï yanapänincunañatacmi imanaytapis mana atipapäcunchu.

10Mandacü Belsasarpa maman mandacücäñatacmi uyalïlun wawin mandacüca ayachimuśhancunawan cumbidućhu anchap lüyayalcäta. Chaymi chay cuartu caśhanman jiꞌaycuycul nin: “¡Mandacü taytay, wiña-wiñaypä cawsay! Imapïtapis ama manchacuyaychu nï jucmanyayaypischu.

11Cay mandacuśhayqui malcaćhu paywan chuya dioscuna cä nuna cayanmá. Papäniqui mandacü cayal chay nunaćhümi sumä yaćhayta, sumä tantiayta talila; dioscunap yaćhayninmá payćhu caycun. Paytam, papäniqui mandacü Nabucodonosor lluy tantiäcunäpa, musyäcunäpa, licacücunäpa, uyllurcunawan licacü yaćhäcunäpa puydïninpä ćhulaycula.

12Chay nunap Daniel śhutin cayaptinpis papäniquiꞌa Beltsasar nïtam ćhuläla. Payꞌa sumä yaćhayniyu, tantiayniyümá; suyñucuna imapä caśhantapis payꞌa tantiaycunmá; ima mana tantiana cäcunätapis yaćhaycunmá. Chayurá Danielta ayachimuy pilaćhu isquirbïsha caśhanca imapä caśhantapis amta willaycuśhunayquipä” nil.

13Niptinmi mandacü caśhanman Danielta puśhapämula. Chayćhümi mandacüca nin: “¿Papäní mandacü Nabucodonosor, Juda lädupi prïsu puśhamuśhan Danielchun am cayanqui?

14Yaꞌa uyalilá chuya dioscuna amwan caśhanta jinaman sumä allin tantiayniyu, sumä yaćhayniyu caśhayquitamá.

15Ñatac puśhachimulá sumä yaćhayniyücunäta, tantiayniyücunäta cay pilaćhu cäcäta lïgiycul imapä caśhantapis niycälimänanpämi. Ñatac manam imapä caśhantapis tantiapäcunchu.

16Ampïtam ichá uyalilá suyñucuna imapä caśhantapis, sasa tantiana caśhancunactapis tantiaśhayquita. Sïchuśh cay isquirbïshacta lïgiycul imapä caśhantapis niycamaptiquiꞌa yaꞌap ipäćhu cä puydïcäpa ipallanman puydï canayquipämi ćhulaycuśhayqui. Chaymi murädu müdananwanlä, ürupi cullarwanlä ćhulaycuśhapis canqui” nil.

17Niptinmi Daniel nin: “Taytallay, chay uycunayqui caśhanca ampa caycuchun ütac jucman uycunayquipä caycuchun. Pilaćhu isquirbïshacta lïgiycul imapä caśhantapis niycuśhayquimá.

18“Mandacü taytallay, papäniqui Nabucodonosorta sumä munayniyu Tayta Diosmi mandacü cananpä ćhulaycula. Paytacmi altuman juluycula, allinpä licaycachila, munayniyu cananpäpis ćhulaycula.

19Chaynu munayniyüman muyuycachiptinmi malcacunaca, nasyuncunaca, imaymana limayta limäcunaca manchacuywan allinpä licaycapäcula. Papäniquiñatacmi munaśhanmannu nunacunäta wañuchilapis ütac cawsananpäpis caćhaycula. Chaynütacmi puydï cananpäpis ćhulaycula ütac uyshulächilapis.

20Ñatac puydïtucülul, nunatucülul munaśhanta lulaptinmi mandacü cayninpi julüla; sumä allinpä licaśha cayninpïpis wicapäla.

21Payta nunacunäpi japächäluptinmi uywap tantiayninnüña tantiaynin licalïla. Munti aśhnucunäwan cuscañam cawsapäcula. Uywacunäwanmi pastucunacta micapäcula. Tuta śhullipaycäwanmi lluy puśhtäśha cala. Chaynu cayäla sumä munayniyu cä Tayta Diospa maquillanćhu jinantin pachäćhu lluy mandacücunapis caśhanta, jinaman pay munaśhanmannu mayantapis mandacü cananpä ćhulaycuśhanta yaćhaycunancamamá.

22“Chayurá Nabucodonosorpa chulin mandacü Belsasar, chaycunacta am tuquicta yaćhayalmari mana uyshuyculanquichu.

23Aśhwanpa janay pachäćhu cä Tayta Diospa cuntran śhalculculmi alawana wasinpïpis bäsuncunacta apachimulanqui puydïniquicunawan, walmiquicunawan, chuli waćhäniquicunawan upyapäcunayquipä. Chaynütacmi illaypi, ürupi, brunsipi, jïrrupi, cullupi, lumipi luläśha mana uyalï, mana licä, mana yaćhä taytachacunacta alawalanqui. Ñatac janay pachäćhu cä Tayta Diostam ichá mana alawalanquichu, paypa maquinćhu cawsayniqui cayaptinpis, lluy ima lulaśhayquita licaycüca cayaptinpis.

24“Chaymi Tayta Dios maquicta caćhamula pilaman isquirbiycunanpä.

25Chay isquirbishaćhümi niyan: ‘MENE, MENE, TEKEL, PARSIN’ nil.

26Chay caynu cananpämi niyan: MENE ninanꞌa: ‘Tayta Diosmi imaycamalla mandacü canayquipäpis fintaycun; chaynütac mandacuyniqui imay camacaycunanpäpis niycun’ ninanmi.

27TEKEL ninanꞌa: ‘Tayta Dios, lluy lulaśhayquita balansaman ćhulaycuptinmi mana cabalchu llasañanqui’ ninanmi.

28PARSIN ninanꞌa: ‘Mandacuyniqui laquiśham canꞌa; Media, Persia läducunämanmi uycuśha canꞌa’ ninanmi” nil.

29Niptinmi mandacü Belsasar nicuyan: “Yaꞌap ipäćhu cä puydïcäpa, ipanćhu puydï cananpä Danielta ćhulaycuy. Jinaman murädu müdananwanlä, ürupi cullarwanlä ćhulaycäliy” nil.

30Ñatac chay tutallam Caldeo lädu mandacü Belsasar wañüchisha cala.

31Jinaptinmi Media lädu Dario, mandacü yaycula süta ćhunca ishcayniyu (62) watanta liyal.