Levitico 14 - Old Testament Quechua Wanca（QVW）

Lipra ishyaypïta imanuypä chuyanchacunanpämi nin

1Chaypïtam Moisesta Tayta Dios nin:

2“Lipra ishyayniyüca chuyanchacunanpä caymi camachicuyca. Chay liprayücämi sasirdütiman puśhaśha canꞌa.Mat 8.4; Mar 1.44; Luc 5.14; 17.14.

3Paymi yaćhapäcuśhan lädupïta waśhaman yalulcul chayćhu tuquicta licaycunꞌa. Sïchuśh chay nunap lipran allinyäluptinꞌa,

4sasirdütim chuyanchacunanpä apachimunꞌa ishcay chuya-cama cawsä pälïcunacta, cedro ilucta, puca lataśhta, hisopo jaćhactapis.

5Chaypïtam sasirdütica cutuśh mancaćhu mayu yacu winaläcäćhu jucnin pälï uywacta wañuchinanpä ninꞌa.

6Chay mayu yacućhu wañuchishä pälïcäpa yawarninmanmi challpuycunꞌa chay cawsä pälï uywacta, cedro ilucta, puca lataśhta, hisopo jaćhactapis.

7Chay yawarwanmi liprapi chuyanchacücäta anćhish cuti chächuycul chuyanchäśhaña caśhanta niycunꞌa. Jinalculmi chay cawsä pälï uywacta licunanpäña caćhaycülunꞌa.

8“Chay chuyanchacüca müdanancunactam täśhanꞌa, lluy ächantam jićhcacunꞌa, jinamanꞌa almacunꞌam chuyanchaycuśha cananpä. Chaynu jinalculñatacmi ichá yaćhapäcuśhancäman caśhan yaycuycunꞌa. Ñatac anćhish muyun waśhallaćhülämi caycunꞌa.

9Anćhish muyuncäćhüñatacmi jićhcacunꞌa lluy ächanta, śhaplanta, ñawi ichipsanta, lluy wachancunactapis. Jinaman müdananta täśhalculmi lluy almacunꞌa. Chaynüpamari chuyanchäśhaña caycunꞌa.

10Pusä muyuncäćhüñatacmi chuyanchacü nunaca uycunanpä ćhacla micuyta apamunꞌa allin-cama ishcay uwishta, juc watayu allinnin ćhina uwishtapis. Jinaman süta quïlu allinnin arinacta asaytiwan chapüśha uycunacta, chaynütac juc cuartu asaytictapis apamunꞌa.

11Chuyanchäśhaña caśhanta niycü sasirdütïmi chay liprayücätawan lluy apamuśhanta Tayta Diospa ñawpäninman, tincuna carpap puncunman ćhulaycunꞌa.

12Chaypïtam mana allin lulaśhanpi uycunacta sasirdütica altuman pallalcul Tayta Diosman uycunꞌa jucnin uwishtawan juc cuartu asayticta.

13Chay juchacunapïtam uycunapä, jinaman cañaywan uycunapä caśhancäćhu sasirdütica uwishcäta wañuchinꞌa. Chay juchanpi uycunapä cä uywapis, mana allin lulaśhanpi uycunapä cä uywapis sasirdütipämi canꞌa; chay chuyamari.

14“Chaypïtam chay juchanpi chuyanchacuśhancäpa yawarninta sasirdütica dïdunwan challpuycul allï linlinpa saytanman llusiycunꞌa, chaynütac allï maquinpa, allï ćhaquinpa maman dïdunmanpis.

15Jinaman sasirdütica chay cuartu asaytipïtam ashllayllacta ichü maquinpä paltanninman jillpuycunꞌa.

16Chay ichü maquinćhu asayti cäcämanmi allï maquinćhu dïdunwan tupaycachinꞌa. Jinalculmi chay dïdunwan Tayta Diospa ñawpäninman anćhish cuti chächunꞌa.

17Chay maquinćhu puchü asaytiwanñatacmi sasirdütica llusiycunꞌa chuyanchacü nunap allï linlinpa saytanman, allï maquinpa, allï ćhaquinpa maman dïdunmanpis; chay juchanpi cä yawarwan llusïcuśhanpa janäninmanmari asaytïta llusiycunꞌa.

18Chay maquinćhu quïda asaytïtañatacmi chay chuyanchacü nunap umanman llusiycunꞌa. Chaynüpam Tayta Diospa puntanćhu sasirdütica chuyanchaycachinꞌa.

19Jinalculmi chay nunap juchanpi cäcäta sasirdütica Tayta Diosmam uycunꞌa; chaynüpam anla caśhanpïta chuyanchaycuśhaman muyuycachinꞌa. Chaypïtam cañaywan uycunanpä uwishcäta wañuchinꞌa.

20Chaytam ćhacla micuycuna uycuśhancäwan cuscacta uycuna patacćhu uycunꞌa. Chaynüpam sasirdütica chay nunap juchanta chuyanchaycachiptin chuyaña caycunꞌa.

21“Ñatac liprayu nunaca waccha calꞌa mana allin lulaśhanpi chuyanchacunanpä mana captinꞌa juc uwishllactam juchanpïta altuman pallalcul uycunꞌa, jinaman allin cawsaśhanpïpis. Jinaman ishcay quïlu allinnin arinacta asaytiwan chapüśha uycuna ćhacla micuytam, juc cuartu asaytictapis uycunꞌa.

22Chaynütacmi atipäśhanpa ishcay ulpayta, ütac ishcay mallwa ulpaytapis apamunꞌa. Jucninmi juchanpi uycunanpä canꞌa, juccäñatacmi cañaywan uycunanpä canꞌa.

23Lluy caycunactam chuyanchacunanpä pusä muyuncäćhu sasirdütiman apamunꞌa; caycunacta Tayta Dioswan tincuna carpap puncunmanmi apaycunꞌa.

24Chay mana allin lulaśhanpi uycunanpä apamuśhan uwishcätawan juc cuartu asaytïtam altuman pallalcul Tayta Diosman uycunꞌa.

25Chaypïtam mana allin lulaśhanpi uwish apamuśhancäta sasirdütica wañuchinꞌa. Jinalculmi sasirdütica yawarcäman dïdunta tupaycachil chuyanchacü nunap allï linlinpa saytanman llusiycunꞌa, chaynütac allï maquinpa, allï ćhaquinpa maman dïdunmanpis.

26Jinaman sasirdütica ashllay asaytictam ichü maquinpa paltanninman jillpuycunꞌa.

27Chay ichü maquinćhu asayti cäcämanmi allï maquinćhu dïdunwan tupaycachinꞌa. Jinalculmi chay dïdunwan Tayta Dios caśhan läduman anćhish cuti chächuycunꞌa.

28Chay maquinćhu puchü asaytiwanñatacmi sasirdütica llusiycunꞌa chuyanchacü nunap allï linlinpa saytanman, allï maquinpa, allï ćhaquinpa manam dïdunmanpis; chay juchanpi cä yawarwan llusiycuśhanpä janäninmanmari asaytïta llusiycunꞌa.

29Chay maquinćhu quïda asaytïtañatacmi chay chuyanchacü nunap umanman llusiycunꞌa. Chaynüpam sasirdütica chay nunacta Tayta Diospa ñawpäninćhu chuyanchaycachinꞌa.

30Chaynütacmi atipäśhanpa ishcay ulpayta, ütac ishcay mallwa ulpayta apamunꞌa.

31Jucninmi juchanpi uycunanpä canꞌa, juccäñatac cañaywan uycunanpä canꞌa, juccäñatac ćhacla micuyta uycunanpä canꞌa. Chaynüpam sasirdütica chay nunap juchanta chuyanchaycachiptin chuyaña caycunꞌa” nil.

32Chayurá cay camachicuymi cayan pasaypi mana cäniyu nuna lipra ishyayninpi chuyanchaculcänanpä.

Liprayu wasica chuyanchaśha cananpämi nin

33Chaypïtam Moisestawan Aaronta Tayta Dios nin:

34“Maquiquiman ćhulaycamuśhá Canaan malcaman yaycapäcuptiquim waquin wasicunaman paćhpaśhtaycunacta licalichimuśhä.

35Chaynu licalïluptinmi wasiyüca sasirdütiman lilcul ninꞌa: ‘Wasïpa pilancunam uwisäśha licalïlun’ nil.

36“Sasirdütiñatacmi wasicta licaycü manalä yaycul chayćhu lluy imapis cäcunäta julachimunꞌa, anlaman mana muyunanpä. Chaypïlämi chay wasicta tuquicta licaycü yaycunꞌa.

37“Chayćhu licaycuptin wasip pilanćhu birdi-nilä ütac pucanilä licalïsha cayal ućhcutyäśha cayaptinꞌa,

38sasirdütica wasip puncunman yalalcamul anćhish muyunmi wićhälunꞌa.

39Chay anćhish muyuncäćhüñatacmi sasirdütica caśhan licaycü cutiycunꞌa. Chayćhu uwisäśhaca wasip pilanman miläluptinꞌa,

40sasirdütica chay pilaćhu uwisäśha lumïtam julachinꞌa. Jinalculmi malcapi calućhu cä anla sityuman wicapächinꞌa.

41Jinalculmi wasip luli pilanta raspachinꞌa. Chay raspachishancätañatacmi malcapi calućhu cä anla sityuman wicapächinꞌa.

42Chay juluśhan lumicunätam juc allin lumicunawan ćhulachinꞌa. Jinalculmi ñiꞌiwan llutachinꞌa.

43“Sïchuśh chaynu lumintapis juluyächiptin, pilätapis raspayächiptin, ñiꞌiwan caśhan llutayächiptinpis uwisayca caśhan licalimuptinꞌa,

44sasirdütica tuquicta licaycamümi yaycunꞌa. Chayćhu jinantin pilacunäman miläluptinꞌa pasaypi paćhpaśhtäśhañamá; chayurá wasica anlañamari.

45Chaymi chay wasicta tunilcachil lluy lumincunacta, iluncunacta, mitu llutaśhancunactapis juluchinꞌa malcap calućhu cä anla sityuman.

46Chay wasi wićhaläśhancäman mayanpis yaycüca tutalpünancamam anla canꞌa.

47Chaynütacmi chay wasićhu mayanpis puñücá ütac micücá chuyanchacunanpä müdananta täśhanꞌa.

48“Ñatac chay wasi mituwan llutayaptin sasirdütica licä yaycuycuptin lipraca manaña milaptinꞌa chuyanchaycuśha wasi nishañamari canꞌa; lipraca chincälunñamá.

49Chayurá wasicta chuyanchananpä ishcay pälïcunacta, cedro ilucta, puca lataśhta, hisopo jaćhactam apanꞌa.

50Chay jucnin pälïtam sasirdütica cutuśh mancaćhu mayu yacu winaläcäćhu wañuchinꞌa.

51Chay mayu yacućhu wañuchisha pälïcäpa yawarninmanmi challpuycunꞌa chay cawsä ulpayta, cedro ilucta, puca lataśhta, hisopo jaćhactapis. Jinalculmi anćhish cuti wasicta chächunꞌa.

52Chaynüpam wasicta chuyanchanꞌa pälïcäpa yawarninwan, cedro iluwan, puca lataśhwan, hisopo jaćhawan, cawsä pishuwanpis.

53Jinalculmi chay cawsä pälï uywacta malcap waśha lädunman caćhaycülunꞌa licunanpäña. Chaynüpam wasica chuyanchäśhaña cananpä lulaycunꞌa” nil.

54Chayurá cay camachicuymi cayan liprapä, sacsay lipra ishyaypä,

55chaynütac müdanaćhu, wasićhu paćhpaśhtäśhapä,

56jinaman sacsamuyćhu, sacsayćhu, yulä paćhpaśhtayćhu cäcunäpäpis.

57Caycunamari imaymana anlapä ütac chuyapä licaśha caśhantapis yaćhanapä cayan. Cay camachicuycunamari liprapä, paćhpaśhtäśha cäcäpäpis cayan.