1Judapa mandacünin Josafatñatacmi, allin sänulla palasyunman Jerusalenta cutila.
2Chayćhümi Hananipa chulin willacü Jehu yalalcamul, mandacü Josafatta nicuyan: “¿Imapïmá mana allin lulä nunacunäta yanapanqui? ¿Imapïtá Tayta Diosta ćhïnicücunäta cuyanqui? Chaynu lulaśhayquipïmá Tayta Diospa piñacuynin anman ćhämun.
3Chaynu captinpis allin lulaśhayquicuna cayanmi. Mamacha Aserap liträtuncunactam jinantin malcapi wicapälanqui, llapan śhunꞌuyquiwantacmi Tayta Diostapis ashiyculanqui” nil.
4Má, Josafat Jerusalenćhümi yaćhayäla. Ñatac awquilluncunap Tayta Diosninman caminaycuyninwanmi, watucapayäla Beerseba malcapi aśhta Efrainpa ulꞌuncunacama.
5Jinaman jinantin Judaćhu cä murälläśha malcacunämanmi caminaycücunacta ćhulaycula.
6Jinalculmi nin: “Ima lulapäcuśhayquitapis tuquicta licaycäliy. Amcuna Tayta Diospa pudirnin cayniquiwanmi licaycälinqui; manamá nunacunallap ćhulaycuśha licaycüchu capäcunqui. Chaymi licaycapäcuśhayquićhu quiquin Tayta Dios amcunawan caycunꞌa.
7Chayurá Tayta Diosta manchacuywan licaycälilmi ima lulaśhayquitapis sumäta licaycälinayqui. Payꞌa manamá awniycunchu mayanninman śhalcuyänanchicta, mana allin lulananchicta, nïtac suburnachicuyänanchictapis” nil.
8Chaynütacmi Josafat Jerusalenćhüpis sasirdüticunäta, levitacunäta, Israelćhu puydïnincunacta ćhulala Tayta Diospa camachicuyninta licaycachinanpä, jinaman quijanacuycunaćhu cäcunäta allichaycunanpä. Paycuna Jerusalenćhümari yaćhapäcula.
9Jinalculmi nin: “Amcuna Tayta Diosta manchacuywanmi rasuncällawan, cällanman allin śhunꞌuwan allichaycälinqui.
10Chayurá malca-masiquicuna may malcapïpis quijancunawan nuna wañuchishanpïta ütac Tayta Diospa camachicuyninpi, yaćhachicuyninpi, nishanpïta mana cäsucuśhancunapïta licaycunayquipämi śhapämunꞌa. Jinaptinmi Tayta Diospa cuntran mana lawćhaycuśha capäcunanpä yaćhaycachinqui. Chayćha paypis ampis manaña mućhuycachishañachu capäcunqui. Chaynu lulaycälilꞌa amcunañachu manañam juchayu capäcunqui.
11“Chayurá puydï sasirdüti Amariasmi Tayta Dios cüsacunaćhu licaycücunäpa puydïnin canꞌa. Juda ayllućhu puydï Ismaelpa chulin Zebadiasñatacmi gubirnun cüsacunaćhu puydï mandacü licaycüca canꞌa. Levitacunäñatacmi paycunap yanapänin capäcunꞌa. Chayurá callpanchacul lulapäcuy. Allincäta lulaycücunäwanmi Tayta Dios caycun” nil.
Who We AreWhat We EelieveWhat We Do
2025 by iamachristian.org,Inc All rights reserved.
