1Babiloniaman prïsu puśhapämäśhanpïta anćhish watañam pasäla. Chay watap picha quillap ćhunca muyunninćhümi Israel lädup waquin puydïnincuna śhapämula Tayta Diosta tapuculcä. Chaymi yaꞌapa ñawpänïćhu taycacaycälila.
2Chayćhümi Tayta Dios nimäla:
3“Wañucülla nuna, Israel lädup yaśhancunawan limal caynu niycuy: Tayta Diosmi nin: ‘¿Tapuculcäćha yaꞌaman śhayalcämunqui aw? Yaꞌa cawsaśhämannümi imallactapis mana niycälishayquichu. Yaꞌa Tayta Diosmari niyá’ nil.
4“¿Amchun cäraycuyta munayanqui? ¿Am wañucülla nunachun ‘cäraycuśhä’ niyanqui? Chayurá awiluyquicunap mana allin millachicuy lulaynincunactari licaycachiy.
5Caynu niycuy: Tayta Diosmi nin: ‘Yaꞌami Israelta aclayculá, Jacobpa milaynincunamanmá maquïta pallalcul limaliculá. Egiptoćhümá lisichiculá. Chayćhu caśhanmi limaliculá: “Yaꞌami Tayta Diosniqui cayá” ’ nil.
6Chay muyunćhümari maquïta pallalcul limaliculá: ‘Egiptopïta jululcul ashiycul aclaycuśhá allpaman puśhaycälishayqui, lluy allpapïtapis mas tuquinninman, tuqui-tuquicta wayuycachï allpamanmari’ nil.
7Chay muyuntacmi nilá: ‘Chay ama-pacha nipäcuśhayqui millachicuy taytachayquicunacta wicapapäcunayquim. Egiptop taytachancunawan manañamá anlatacuyalcänayquiñachu. Yaꞌa Tayta Diosniquim niyá’ nil.
8“Paycunañatacmi cuntrá śhalcalcälil manaña uyalicalcämälachu. Ćhïnicuśhá chay cuyaśhan millachicuynincunacta manamá mayanninpis caćhaycapäculachu; manatacmá Egiptop taytachancunacta alawaytapis caćhaycapäculachu. Chaymi Egiptoćhülä cayalcaptin sumä piñacuynïwan camacaycüluyta munalá.
9Ñatac cay malcäman Egiptop ñawquinmari camalachiculá. Chaymari allin caśhä-laycu cay malcacta julaycamulá. Śhutí jalutacüśha mana cananpämari julaycamulá.
10Chaymi Egiptopi julalcamul chunyäcäman yaꞌa puśhamulá.
11Chayćhümi yaćhachicuynïcunacta uyculá, camachicuynïcunacta yaćhaycachilá. Chaymannu mayanpis lulaycücunaca allin cawsayta taliycälinanpämari.
12Chaynütac jamana muyuncunactapis japächayculá paycunaman yaꞌa limalicuśhäta camalaycachinäpämi. Jinaman paycuna yaꞌa Tayta Diosllapäña japächäśha capäcuśhanta yaćhapäcunanpämari.
13“Ñatac Israel läducunaca chunyäcäćhu cunträmi śhalcälälila. Cäsucücunäta allin cawsayta taliycachï yaćhachicuynïta manamá uyalïtuculcälachu. Aśhwanpam camachicuynïta wicapaycälil jamana muyun japächaycuśhäcätapis jalutacälälila. Chaymi sumä piñacuynïćhu: ‘Cay chunyäcäćhümi camacaycälälishayqui’ nilá.
14Ñatac chay yaćhapäcuśhan nasyuncunap ñawquin pinꞌayman ćhulaśha yaꞌa mana canäpämá nï camacaycülächu.
15“Chay chunyäcäćhütacmi maquïta pallalcul limaliculá aclaycapuśhá allpaman manaña puśhaycunäpä, lluy allpapïtapis mas tuquinninman, tuqui-tuquicta wayuycachï allpaman manaña ćhaycachinäpä.
16Chaynu lulayculá yaćhachicuynïta wicapaycälälishanpïtamá; camachicuynïcunacta jalutacälälishanpïtamá. Taytachancunaćhu śhunꞌuncuna cayalcaptinmari jamana muyuntapis jalutacälälila.
17Chaynu captinpis llaquipayculämá; chunyäcäćhu manam wañuchilächu nï camacaycülächu.
18Aśhwanpam chunyäcäćhu chulincunacta nilá: ‘Taytayquicunap yaćhachicuynincunacta ama atichipäcuychu; lulaynincunacta ama lulapäcuychu nïtac taytachancunawanpis anlataculcaychu.
19Yaꞌamá Tayta Diosniqui cayá; yaćhachishämannu cawsaycäliy, camachicuynïmannu puliycälil lulayman ćhulaycäliy.
20Jamana muyuncunätapis japächaycuy yaꞌa limalicuśhäta camalaycachinayquipä. Chaynüpaćh yaꞌa Tayta Diosllapäña japächäśha capäcuśhayquita yaćhapäcunqui’ nil.
21“Chaynu niptïpis chulincuna cunträmi śhalcälälila. Cäsucücunäta allin cawsaycachï yaćhachicuynïtapis manamá yaćhaycälilachu, nïtac camachicuynïtapis lulaycälilachu. Lulayman ćhulaycälinantá jamana muyunnïtapis jalutacälälilamá. Chaymi sumä piñacuynïwan chay chunyäcäćhu camacaycüluyta munalá.
22Ñatac śhutí allinpä licaycuśha cananpämi camacaycunäpïta manalculá. Nasyuncunap ñawquinmari librayculá. Chaymi śhutí jalutacüśha mana cananpä manalculá.
23Chunyäcäćhütacmi maquïta pallalcul limaliculá paycunacta jinantin malcacunäman, nasyuncunäman chiꞌichinäpä.
24Awquilluncunap taytachancunaćhu muspayninpis cayaptinmá yaćhachicuynïta mana cäsuculcälachu, camachicuynïtapis wicapaycälälila, jamana muyunnïtapis jalutacälälila.
25Chaymi cawsayta apaycamü camachicuypïtá, paycunacta caćhayculá mućhuchicuycunallacta apamü yaćhachicuycunallaman.
26Caćhayculá wamä chulincunacta taytachancunaman cañaywan uycälil anlataculcänanpämari; chaynu lulayculá sumä manchaculcänanpä, millachiculcänanpä jinaman yaꞌa Tayta Dios caśhäta tantiapäcunanpämá.
27“Chayurá wañucülla nuna, Israel malcacta niycamuy: Tayta Diosmi caynu niyäśhunqui: ‘Awquilluyquicuna ipanchalculmá jalutacälälimäla.
28Chaynu captinpis uycunäpä maquïta pallalcul limalicuśhá allpamanmi puśhaycamulá. Chayćhümi altusca ulꞌucta ütac pallaysapa lantacunacta licapäcuśhanćhu uycunanta, piñachimä uycunacunacta uycapäcula, jinaman insinsiucunacta cañaycapäcula, jićhaywan uycunacunactapis uycapäcula.
29Chaymi nilá: “¿Imapïtá chay altusca ulꞌucunäman lipäcunqui?” nil. Niptïmi: “Uycapäcümi lipäcú” nipäcula. Chaymi canancama “Altusca Ulꞌu” nisha cayan’ nil.
30“Israel läducunäta niycamuy: Tayta Diosmi nin: ‘Amcuna, ¿manachun taytayquicunanu juchacuyalcanqui imamá? ¿Manachun millachicuy lulaynincunawannu waticacuyalcanqui imatá?
31Awari, taytachayquiman uycuyniquiwan, chuliquicunacta cañaywan canancamapis jinalla uycapäcuśhayquiwan millachicuy lulaycunactamá lulayalcanqui. Jinayalcalchun, ¿tapucüpis taplayalcämunquimanlä canpis? Israel läducuna, yaꞌa Tayta Diosniqui rasunpa manamá imallactapis uyaliycuśhayquichu.
32“ ‘Amcunamá niyalcanqui: “Juc nasyuncunänu caśhun; juc caśhtacunänu ilupïta, lumipïta taytachacta lulacuycul alawaśhun” nil. Amcuna tantiaśhayquimannüchu manamari canꞌa.
33Yaꞌa Tayta Diosniquiñatacmi ichá nanay maquiwan, sumä munaynïwan, piñacuynïwan mandapäcuśhayqui.
34Chiꞌisha caśhayqui nasyuncunapïta, malcacunapïtam julaycälimuśhayqui. Awari, nanay maquiwan, sumä munaynïwan, piñacuynïwanmá juntuycälimuśhayqui.
35Chay malcacunapi chunyäcäman puśhaycamulmi chayćhu quiquí cäraycälishayqui.
36Egiptop chunyäninćhu awquilluyquicunacta cäraycuśhänümi amcunactapis cäraycälishayqui. Yaꞌa Tayta Diosmi niyá.
37Maynümi uwish michïca uwishninta aclaycun, chaynümi garutïpa lulinpa lluyta pasachipäcuśhayqui limalicuśhämannu lulaycälinayquipä.
38Cuntrá śhalcü cullu linlicunätamari japächaycuśhä. Chay pulicünülla yaćhaśhan malcapïta jululculpis Israelpa allpanman manamá yaycachishächu. Chaynüpamá yaꞌa Tayta Dios caśhäta yaćhapäcunqui.
39“ ‘Am Israel läducunätañatacmi Tayta Dios niyäśhunqui: Cäsucamayta mana munapäculꞌa taytachayquicunacta sirbï wayra taplapäcuy. Ñatac chaypïta uyalicalcämänayqui muyun ćhämunꞌañamá; jinaman yaꞌapa chuya caynïta taytachayquicunawan, anla uycuyniquicunawan manañamari jalutacayalcämanquiñachu.
40“ ‘Israel läducuna, chuya ulꞌüćhu, altunnin ulꞌućhu, cay allpacunäćhümari alawapämanquiña. Chayćhümi ćhasquiycuśhayqui; chaymanmi apaycamunqui uycunayquicunacta, wamä cusichayquicunacta, lluy japächaycuśhayquicunactawan cuscacta. Yaꞌa Tayta Diosmari niyá.
41Malcacunäpi julaycamul amcunacta ćhasquiycälishayqui tuqui mishqui aśhnä insinsiuctanümá. Mayćhu chiꞌisha capäcuśhayquipïtapis juntuycamuptïmá chuya caśhäta nasyuncunaca licapäcunꞌa.
42Amcunacta Israelpa allpanman, awquilluyquicunaman uycunäpä maquïta pallalcul limalicuśhá allpaman yaycaycachiptïmá yaćhanqui Tayta Dios yaꞌa caśhäta.
43Chayćhülämi lluy mana allin lulayniquicunapi, anla cawsayniquicunapi yalpaćhaculcanqui. Lluy lulapäcuśhayquicunacta millachiculcanquiñamari, manaña caśhan lulapäcunayquipä.
44Juchacta lulaśhayquimannüchu manamá camacaycüśhayqui, juyu lulaśhayquicunaman tincütachu manam lawćhaycuśhayqui, sinuꞌa śhutí-laycumá licaycuśhayqui. Chaynüpam amcuna tantiapäcunqui Tayta Dios yaꞌa caśhäta. Yaꞌa sumä munayniyu Tayta Diosmari niyá’ ” nil.
Neguev lädup cuntranmi willacun45Jinaman Tayta Diosmi niman:
46“Wañucülla nuna, sur läduman licalcuy; chay läduman willacuy, Neguev lädu muntip cuntran willacuy.
47Neguev munticta niy: ‘Tayta Diospa willacuyninta uyaliy: Tayta Diosmi nin: Ampa ćhawpiquimanmi ninacta lataycächiná cacuyan. Lataycachiptïmari lluy lantacta chaquictapis birdictapis camacaycülunꞌa. Ninacta imapis mana wañuchiyta atipaptinmá, sur lädupïta nurti läducama lluy-lluy imacunactapis, nunacunactapis camacaycülunꞌa.
48Chaynüpamá lluy nunacuna licapäcunꞌa yaꞌa Tayta Dios cañaycuśhäta. Chay ninacta manamá mayanpis wañuchiyta atipanꞌachu’ ” nil.
49Nimaptinmi nilá: “Tayta Diosllay, cay nunacunaca nipäman: ‘Yanꞌal tincuchicuycunallactam cay liman’ nilmá” nil.
Who We AreWhat We EelieveWhat We Do
2025 by iamachristian.org,Inc All rights reserved.
