Sofonias 2 - Old Testament Quechua Wanca（QVW）

1Mana pinꞌacuyniyu malca,

juntunacuycul tantiaculcayꞌari.

2Camachishanca manaläpis ćhämuśhancama,

amuctanu juclla manaläpis chincachishuśhayquicamari tantiaculcay.

Tayta Diospa sumä-sumä piñacuyninpa walaynin

manaläpis ćhämuśhancamari tantiaculcay.

3Cay pachäćhu allin śhunꞌuyücuna,

camachishanmannu cawsäcuna

Tayta Diostari ashiycäliy.

Cällanman cäcätawan mana nunatucuycäta ashiycäliy.

Jinal ichapis Tayta Diospa piñacuyninpi

pacaycuśha capäcunquiman.

4Ay, Gaza malca pulumäśham canqui;

Ascalon malca chunyanquim.

Muyunpamá Asdod malca waycäśha canqui;

Ecron malcaćhu yaćhäcunaca

sapipi uläśhamá capäcunqui.

5¡Imanuylä capäcunqui lamar patanćhu

yaćhä Creta malcayücuna!

¡Imanuylä capäcunqui filisteocuna!

Ampapis cuntrayquimá Tayta Dios niyan:

“Filisteo läducuna yaćhaśhan Canaan malcactamá

jucllactapis mana caćhaycul lluy camacaycüśhä” nil.

6Lamarpa patanćhu malcaca,

uywacta michinä pastulla cä allpamanmá licalinꞌa.

Chayćhu uwish canćhacunallañamari cacunꞌa.

7Chay lädumari Juda ayllu quïdäcunäpä caycunꞌa.

Chayćhümá uwishnincunacta michipäcunꞌa;

tutanpañatacmi Ascalonćhu cä wasicunäćhu puñupäcunꞌa.

Punta caśhanmannümari Tayta Dios allinman cutiycälichinꞌa.

8Moab läducunäpa palacuynincunactamá uyaliycú;

Amon läducunäpa jamuyäcuynincunactapis uyaliycümá.

Sumä nunatucüśhalä malcäta jalutaculculmi

allpancunacta chalacaycälinlä canpis.

9Chaymi Israelpa sumä munayniyu

Tayta Dios cawsaśhannu limalicun:

“Moab lädum Sodoma malcanu licalinꞌa;

Amon lädum Gomorra malcanu canꞌa.

Caśhacunallamá cacunꞌa,

caćhicunalla canan malcamanmá licalinꞌa,

imapis mana cä chunyayämi imaypis canꞌa.

Quïdä malcämari paycunacta waycälälinꞌa;

malcäpi cawsäcunämari allpanćhu yaćhapäcunꞌa.

Cay nishänümi rasunpa lulacacunꞌa” nil.

10Chay nunacunaca sumä munayniyu

Tayta Diospa malcanta

nunatucüśha palapäcuśhanpi, usuchipäcuśhanpïmari

chayman tincüta ćhasquiycälinꞌa.

11 Tayta Dios jinantin pachäćhu lluy taytachacunäta

chaquiyächiptinmari alli-allicta manchälälinꞌa.

Jinaptinmi mayćhu chayćhu cä lluy-lluy malcacunäpis

Tayta Diosman uyshuycälinꞌa.

12Etiope läducuna,

Ninive malcacta pampaman muyulcachilmi

pasaypi chaqui chunyäman licalïchinꞌa.

14Chaymá uwishcunawan munti uywacunap

puñunancunallaña cacunꞌa.

Tucucunawan quillincunallañam

paradïruncunaćhüpis puñupäcunꞌa;

taquishancunapis bintanancunapam yalunꞌa.

Pampaman lluy muyüchishañamari

cidru tablancunallaña uyaypa jitaläculcanꞌa.

15Caynümá puydïtucüśha jawca cacü malcaca camacanꞌa.

Paycuna nipäculalämi canpis:

“Yaꞌanchicnuꞌa manamá mayanpis canmanchu” nil.

Chaynu niyaptinpis camacaycüluptinmi

munti uywacunap wasinmanña licalïlun.

Chayninpa pasäcunämi cuncantapis iwicaćhaśhtinlä

jamuyaśhtin pasapäcunꞌa.