1Izharpa chulin Coremi Moisespa cuntran nunacunäta umachäla. Coremi cala Levi ayllupi Coatpa willcan. Corewan cuscatacmi Ruben ayllupi Eliabpa chulin Datanwan Abirampis, jinaman Peletpa chulin Onpis umachapäcula.
2Paycunawan cuscam ishcay paćhac picha ćhunca (250) Israel caśhtacunäpis Moisespa cuntran śhalcapäcula. Lluy paycunam lisisha-cama, malcap puydïnincuna, allin-cama nuna capäcula.
3Lluy paycunamari juntunacaycälil Moisestawan Aaronta nipäcula: “¡Amcunapïta amïshañam cayá! ¿Manachun jinantin malcaca Tayta Diospa chuyanchaycuśha cayan imamá? ¿Manachun yaꞌanchicwan Tayta Dios cayan imamá? ¿Chayurá imapïtam Tayta Diospa malcanćhu puydïtuculcanqui?” nil.
4Chaynu nipäcuśhanta Moises uyalïlulmi pampäman cäranpis ćhänancama unꞌulacuycula.
5Jinamanmi Coretawan lluy atïninta nin: “Wala wälam quiquin Tayta Dios niycunꞌa mayan aclaśhancuna, jinaman mayancuna japächäśha caśhantapis. Pay aclaśhancällam aśhuycüca canꞌa.
6Am Coremi lluy nunayquiwan wälaman cayta lulapäcunqui: Insinsiu cañacuctam apapämunqui.
7Chayman insinsiucta ćhulayculmi Tayta Diospa ñawquinćhu lataycachinqui. Chayćhu quiquin Tayta Dios mayantapis aclaycuśhancäćha japächäśhanca canꞌa. Am Levipa milaynincunapïta amïshañamari cayá” nil.
8Chaypïtam Coreta Moises nin: “Levi ayllucuna canan uyalipäcuy.
9¿Yanꞌallachun quiquin Tayta Diosninchic Israel caśhtacunäpi aśhuycälinayquipa japächaycuśha cayalcanqui imatá? ¿Yanꞌallachun lluy malcäta carpaćhu sirbiycälinayquipä caśhanca cayan imatá?
10Amtawan lluy wawꞌi-caśhayqui Levi ayllucunätamari quiquin Tayta Dios lädunman aśhuycachipäcuśhulanqui. Chaychun canan, ¿sasirdüti caytala munacuyalcanqui?
11¿Mayanmá Aaron paypa cuntran śhalcapäcunayquipä? Aśhwanpam lluy juntuśhayqui nunacunäwan Tayta Diospa cuntran śhalcälälinqui” nil.
12Chaypïta Eliabpa chulin Datanta, Abiramtam Moises ayachimula. Ñatac paycunam nipäcula: “Manam lipäcümanchu.
13¿Allinchun ampá cay chunyäcäćhu wañupäcunäpä tuqui-tuquicta wayuycachï allpapïta julapämäśhayquica imamá? ¿Jinaman amcuna puydïnïcuna caytalächun ćhapayanquipis?
14Rasunpa chay tuqui-tuquicta wayuycachï allpaman manalämi yaycachipämanquipischu, nïtac ćhaclacunactapis, üba lantacunactapis uycälimanquilächu. ¿Lluy nunacunaca aplachun cayalcá imatá? ¡Manamá lipäcuśhächu!” nil.
15Niptinmi Moises sumä piñacülul Tayta Diosta nin: “¡Lluy uycuśhuśhayquita ama ćhasquïchu! Paycunap aśhnullantapis manamari chalalächu; nïtac paycunacta jucllantapis mana allinta manamari lulalächu” nil.
16Chaypïtam Coreta Moises nin: “Wälamanmi Tayta Diospa ñawpäninman lipäcunqui amwan lluy nunayquicuna. Aaronpis chayćhümi canꞌa.
17Llapallayquim insinsiu latachicucta, insinsiu juntayü-camawan Tayta Diospa ñawpäninman lipäcunqui. Chayurá ishcay paćhac picha ćhunca (250) insinsiu latachicum lluy caycunꞌa. Ñatac ampis Aaronpis apapäcunquimá” nil.
18Chaymi lluypis insinsiu latachicunta insinsiuyü-camacta apticuśha tincuna carpap puncunćhu cayalcäla; paycunawan cuscam Aaronwan Moisespis cayalcäla.
19Chay tincuna carpap puncunćhu Core juntuśhan lluy nunacunäwanñamari cayalcäla. Chayćhümi Tayta Diospa sumä caynin jinantin malcäman licalïmula.
20Jinaptinmi Moisestawan Aaronta Tayta Dios nin:
21“Cay nunacunäpïta aśhuculcay; canallanmi camacaycüśhä” nil.
22Moiseswan Aronñatacmi pampäman cäranpis ćhänancama unꞌulacuycul nin: “Tayta Diosllay, lluy nunacta cawsaycachï, ¿jucllay nunap juchallanpïchun jinantin malcäwan piñacülunqui imamá?” nil.
23Niptinmi Moisesta Tayta Dios nin:
24“Chay Core, Datan, Abiram caśhancunäpïta lluy Israel caśhtacunaca aśhuculcänanpä nimuy” nil.
25Niptinmi Moiseswan Israel caśhtap yaśhancuna lipäcula Datanwan Abiram caśhancäman.
26Chayćhümi jinantin malcäta Moises nin: “Cay mana allin nunacunap yaćhaśhanpïta aśhuculcay. Yanꞌalätac imallantapis yataycälälil amcunapis paypa juchanpïta wañüläli imanquiman” nil.
27Niptinmi Core, Datan, Abiram caśhancunäpïta malcaca aśhuculcäla. Datanwan Abiramñatacmi yaćhapäcuśhanpa puncunman yalälälimula walmintin-cama, lluy chulincunawanpis.
28Chaypïtam Moises nin: “Cananmi yaćhapäcunqui quiquin Tayta Dios caycunacta lulänäpä caćhamäśhantapis ütac quiquilläpi luläśhätapis.
29Sïchuśh mayan nunanüpis cay nunacunaca wañüläliptinꞌa Tayta Dioschu manaćh caćhamäla.
30Ñatac imaypis mana pasaśhannu allpaca quićhacacäluptin, cawsayäta lluy cänintinta millpucalpuptinmi ichá yaćhapäcunqui chay nunacunaca Tayta Diosta piñachipäcuśhanta” nil.
31Chaynu limayällaptinlämi paycuna caśhancäćhu allpaca quićhacacülun.
32Jinaptinmi Coreta lluy nunancunactapis aylluntinta-cama, lluy ima cänintintapis allpaca millpacalpula.
33Chayćhümi lluy cänintin wañüśhacuna canancäman jiꞌacalpälila. Allpäñatacmi shiminta wićhacalpula. Chaynüpam malcapïta chincächishaña capäcula.
34Chaynu apalcaćhapäcuśhanta uyalï lluy Israel caśhtacunäñatacmi chaypïta ayiculcan cay nishtin: “Yaꞌanchictapis yanꞌalätac allpaca millpäma imachwan” nil.
35Jinaman Tayta Diospi nina yalalcamulmi insinsiucta cañä ishcay paćhac picha ćhunca (250) nunacunäta camacaycüla.
36Chaypïtam Moisesta Tayta Dios nin:
37“Insinsiu latachicücunaca chuyam. Chaymi nina lupäcäpïta sasirdüti Aaronpa chulin Eleazar julunꞌa; śhanśhantañatacmi caluman wicapanꞌa.
38Chay juchaculcäśhanpi wañü nunacunäpa insinsiu cañacuncunapïmi palta lumicunactanu lulanqui, uycuna patacta laꞌanapä. Chay insinsiu cañacuncuna Tayta Diospä cañaycunanpä apaycamuśhanpam chuyaña capäcula. Caymari juc licachipä Israel caśhtacunäpä caycunꞌa” nil.
39Chaymi sasirdüti Eleazar pallala, nina lupäcäćhu wañü nunacunäpä brunsipi cä insinsiu cañacuncunacta. Chaywanmi palta lumictanu lulachila uycuna patacta laꞌachinanpä.
40Chay palta lumichanu cä laꞌaśhacunämi Israel caśhtacunäpä licachipä cala; Aaronpa milaynin mana cayalꞌa Tayta Diosman insinsiucta cañaycü manam aśhuycapäcunmanchu. Yanꞌalmi Coreta lluy nunantinta pasaśhannu pasälälinman. Chaymi Tayta Dios Moisespacama nishantanu Eleazar lulaycula.
41Chay walantintam lluy Israel caśhtacunaca Moisestawan Aaronta jamuyäcuyalcan: “Amcunam Tayta Diospa malcanta wañülächinqui” nil.
42Chaymi Moisespawan Aaronpa muyülïninman malcaca lluy juntunacälälin. Ñatac paycuná tincuna carpamanmi pasaculcan. Chay ürallam carpacta pucutay ñitïlun; jinaman Tayta Diospa sumä cayninpis licalïmun.
43Chaymi Moiseswan Aaron tincuna carpap puntanta lipäcula.
44Chayćhu Tayta Diosñatacmi Moisesta:
45“¡Chay malcapïta aśhupäcuy, canallanmi camacaycüśhä!” nin.
Niptinmi paycuna pampäman cäranpis ćhänancama unꞌulacaycälila.
46Chayćhümi Aaronta Moises nin: “Insinsiu cañacuyquita apalcamul uycuna patacpi śhanśhacta ćhulaycuy. Jinalcul malcaca caśhanman lilcul paycunap juchanta Tayta Dioswan chuyanchaycachiy. Tayta Diospa piñacuynin walacuyaptinñamari nunacunaca wañuyta allacaycälin” nil.
47Chaynu Moises nishanmannümi Aaron insinsiu cañacunta apaculcul malcaca caśhanman pasacun. Tayta Diospa piñacuyninñatacmi nunacunäta wañuchiyta allacuycuñäña. Chayćhümi Aaron insinsiucta cañaycula juchancunacta Tayta Dios chuyanchaycälinanpä.
48Jinamanmi Aaron wañücunäpa, cawsäcunäpa ćhawpinćhu śhaycucuycuptin wañuyca śhaycülun.
49Lluy wañücunaca ćhunca tawayu walanga anćhish paćhacmi (14,700) cala. Ñatac Core ayllu wañuśhancunaca manam yupaśhachu capäcula.
50Chay wañuyca manalcüluptinmi tincuna carpap puncunćhu Moises caśhancäman Aaron cutila.
Who We AreWhat We EelieveWhat We Do
2025 by iamachristian.org,Inc All rights reserved.