Daniel 4 - Old Testament Quechua Wanca（QVW）

Jatun lanta cućhpächisha cayätam mandacü Nabucodonosor suyñucun

1Yaꞌa mandacü Nabucodonosormi cay cartacta lluy nasyuncunäman, malcacunäman, imaymana limayta limäcunäman, jinantin allpäćhu cäcuna jawca allinlla caycälinanpä apayächimú:

2“Sumä munayniyu Tayta Dios yaꞌapa faburní sumä-cama lulaycunacta, milagrucunacta lulaycuśhanta amcunaman willaycälinacmi.

3Sumä-cama lulaynincuna sumä-sumämá. Milagru lulaśhancuna jatu-jatunmá. Mandacuynin wiña-wiñaypämá. Milaycuna pasaptinpis sumä munaynin jinallamá cayan.

4Má, yaꞌa Nabucodonosor palasyüćhu jawcallam cawsayälá; manam imapis pishiycamälachu.

5Chaynu cayäśhäćhümi juyucta suyñucülú. Chaymi chay suyñuśhäman tantiapacul umapis tumanyäśha manchalicucuyälá.

6Chaymi Babiloniaćhu lluy yaćhayniyücunaca yaꞌaman śhapämul suyñuśhäca imapä caśhantapis niycälimänanpä ayachilá.

7Chay yaćhäcunaca, tantiäcunaca, musyäcunaca, uyllurcunawan licacuyta yaćhäcunaca ćhälälimuptinmá suyñuśhäta willayculá. Ñatac paycuna imapä caśhantapis manamá tantiayta atipapäculachu.

8Chaypïta Danielpis śhamulam; paymi diosnïpa śhutinwan śhutichäśha Beltsasar nisha cala. Paywanmari chuya dioscuna cayan. Chaymi suyñuśhäcäta payman willayculá caynu nil:

9‘Yaćhäcunäpa puydïnin Beltsasar, chuya dioscunam amwan cayan. Ampá ima sasapis manamá sasachu. Suyñuśhäta willaycuśhayqui imapä caśhantapis willaycamänayquipä.

10Puñuyalmi suyñuynïćhu caynüta licälú: Cay allpap ćhawpinćhümi jatu-jatun lanta cayäña.

11Lantaca wiñaśhanpa maspam sumä tacyaña. Puntanmi sïlücama ćhäña. Allpap manyanpïtapis licapaśhmi licanapä caña.

12Tuqui-tuquim lapincuna caña; wayuynincunapis achca-achcamá cacuña; micunacta payćhu lluy-lluymá talipäcuña. Llantuyninmanmi munti uywacunäpis śhapämuña. Sïlüćhu pälï pishucunäpis pallaynincunaćhümá ishñachaculcäña. Chaypïmi lluy uywacuna micapäcuña.

13Chaynu puñunäćhu suyñuyal licapayäśhäćhümi Tayta Diospa anjilnin sïlüpïta jiꞌalpayämüta licälú.

14Sumä-sumä apalcaćhaypam nimäña: “Chay lantacta ćhaćhächiy; pallaynincunacta cuchüluy; lapincunacta wicapäluy; wayuynincunacta wacäluy. Llantuyninpi munti uywacunaca ayiculcächun. Pälï pishucunäpis ishñanta caćhaycapäcuchun.

15Ñatac culluntá, sapintá jina allpällaćhu caćhaycüluy. Ćhaclaćhu pastucunäman brunsi, jïrru cadinawan sumäta watäluy. Tutanpa shullipaywan puśhtachun. Munti uywacunawan pastucta micuchun.

16Paypa tantiaynin manañamá nunap tantiayninnüñachu canꞌa. Uywap tantiayninmanüñamá muyülunꞌa. Chaynu anćhish watam canꞌa.

17Chaynu cananpä lluy imactapis licaycü anjilcunämari niyan. Chayćha sumä munayniyu Tayta Diospa maquillanćhu lluy nunacunap mandacuynincuna caśhanta yaćhapäcunꞌa. Pay munaśhannu mandacüta ćhulaycuśhantapis yaćhaycapäcunꞌamá. Mana nunatucüśha nunactalä dispächuman taycaycachishantapis yaćhapäcunꞌamá” nil.

18Chaytanümari yaꞌa Nabucodonosor suyñülá. Beltsasar, canan má suyñuyní imapä caśhantapis niycamay. Mandacuynïćhu jinantin cä yaćhäcunäpïta manamá mayanllanpis niycamayta atipanchu. Anmi ichá atipanqui. Amtá, dioscunap ispiritunmá yanapaycuśhunqui’ nil.

19Niptïmi chay willaśhäcäman tantiaśhtin Beltsasar nishan Daniel manchäśha mana limapacul-ima quïdälun. Chaymi yaꞌa mandacüca nilá: ‘Beltsasar, suyñucuśhäcäpi jinaman imapä caśhanpïpis ama llaquicuychu’ nil.

Niptïmi Beltsasar niman: ‘Taytallay, suyñuśhayquica ćhïnicüniquicunallapäri caycullächun; imapä caśhantapis mana allinniquita munäcunällapäri caycullächun.

20Anmi licalanqui, wiñaśhan maspa sumä tacyaśhanta, puntanpis sïlücama ćhäśhanta. Chaymi allpap manyanpïtapis licapaśh cala.

21Tuqui-tuquim lapincuna cala. Wayuynincunapis achca-achcam cala. Lluy-lluymá micunacta payćhu talipäcula. Llantuyninmanmi munti uywacunäpis śhapämula. Sïlüćhu pälï pishucunäpis pallaynincunaćhümi ishñachaculcäla.

22Mandacü taytallay, chay lantaca anmi canqui. Tacyaycul wiñälulmi sumä munayniyüman licalïlunqui. Lisisha cayniquiꞌa sïlücamamá ćhäyan. Mandacuyniquiꞌa jinantin allpämanmi ćhälun.

23Taytallay, chay sïlüpi licäca jiꞌalpalcamulmi nishulanqui: “Chay lantacta ćhachächiy; pallaynincunacta cuchüluy; lapincunacta wicapäluy. Llantuyninpi munti uywacunaca ayiculcächun. Pälï pishucunäpis ishñanta caćhaycapäcuchun. Ñatac cullunta, sapinta jina allpällaćhu caćhaycüluy. Ćhaclaćhu pastucunäman brunsi, jïrru cadinawan sumäta watäluy. Tutanpa shullipaycäwan lluy puśhpachun. Munti uywacunawan pastucta micuchun anćhish wata pasanancama” nil.

24Taytallay, chay cayan sumä munayniyu cä Tayta Diosní ampa cuntrayqui camachishanmá.

25Taytallay, amtam nunacunäpïta japächäśhunqui munti uywacunäwan yaćhanayquipä. Uywacunäwanmi pastucunacta micapäcunqui. Tutanpa shullipaycäwan puśhtäśhamá canqui. Chaynu anćhish watacamam cawsanqui. Jinantin pachäćhu cä mandacücunäta sumä munayniyu Tayta Dioslla munayllanćhu cachishanta, jinaman pay munaśhanmannu mayantapis mandä cananpä ćhulaśhanta tantianayquicamamari chaynülla canqui.

26Chaynütacmi uyalilanqui: “Cullunta, sapinta jina allpällaćhu caćhaycuy” nishanta. Chay caynümi canꞌa: Janay pachäćhu cäca lluypa munayniyu caśhanta tantiaycuptiquilämi mandacuyniquiman caśhan cutiycachishunqui.

27Chayurá mandacü taytallay, canan limapaycuśhacta uyaliycallämay: Juchayquicunacta wanaculcul allin tincüllanman lulaycuy. Mana allin lulayniquita caćhaycul ñacachisha cäcunäta yanapaycuy. Chaynu lulaycul ichapis canan cawsaśhayquinu cawsaycunquiman’ nil.

28Awari, Daniel nishanmannümari yaꞌa Nabucodonosorwan lluy pasala.

29Juc watapïtañatacmi Babiloniap palasyunćhu pulipayälá.

30Chayćhümi niculá: ‘Licayꞌari, Babiloniap sumä malcanta śhalcachilá mandacuyní cayćhu cananpämá. Altuman juluycuśha canäpämá sumä munaynïwan lulalá’ nil.

31Chaynu niyällaptïmi janay pachäpïta ayalpämun: ‘Mandacü Nabucodonosor uyaliy. Mandacü caśhayquipi wicapäśhañamá cayanqui.

32Nunacunäpïta japächäśhañamá munti uywacunäwan yaćhanqui. Uywacunänümi pastucunacta micunqui. Anćhish watam chaynu canqui, sumä munayniyu Tayta Diospa maquillanćhu lluy nunacunaca caśhanta yaćhanayquicama. Pay munaśhannu mandacüta ćhulaycuśhantapis yaćhaycunquimá. Mana cäpa licaśha nunactalä dispächuman taycaycachishantapis yaćhaycunquimá’ nil.

33Chay nïluptin-pachallam yaꞌa Nabucodonosorwan chaynu pasäla. Nunacunäpi japächäluptïmi uywacunänüña pastucunacta miculá. Aychäpis tuta shullipaycäwanmi lluy pïtüla. Jinaptinmi ancap laplannu ächäpis wiñäla; ancäpa shillunnümi shillüpis wiñäla.

34Anćhish wata pasäluptinñatacmi yaꞌa Nabucodonosor janay pachäćhu cä Tayta Diosman licalculá. Jinaptïmi tantiayní juclla cutiycämun. Chaymi sumä munayniyu Tayta Diosta allinpä licayculá, alawalá, wiña-wiñaypä cäcäta altuman juluyculá:

‘Munaynin wiña-wiñaypämá.

Mandacuynin manamá imaypis camacanchu.

35Paypá jinantin allpäćhu cä nunacunaca,

manamá imapischu capäcun.

Payꞌa munaśhanmannümi lulaycun,

cay pachäćhüpis, janay pachäćhüpis.

Manamá mayan manalcachïnin canchu.

Paypa lulayninta manamá mayanpis imaniycunmanchu’ nil.

36Chaynu alawaycuyällaptïmi caśhan tantiayniyüman muyülú. Mandacuyní sumä lisisha cananpämá allin, sumä caynïta cutiycachimäla. Jinaptinmi puydï yanapänïcuna, limapamänïcuna ashimänï śhapämula. Mandacuynïman caśhan cutiycachimaptinmi puntapïtapis mas munayniyülä caläpis.

37Chaymi janay pachäćhu cä mandacücäta yaꞌa Nabucodonosor alawaycú, allinpä licaycú, altuman juluycú. Paypa lulayninꞌa cällanman, tincüllanmanmá. Sumä nunatucüśha cäcunäta pay uyshulächinmá” nil.