Exodo 40 - Old Testament Quechua Wanca（QVW）

Chuya carpactam śhalcachin

1Chaypïtam Moisesta Tayta Dios nin:

2“Wamä quillaćhu, wamä muyuncäćhu chuya carpacta, juntunacunacta śhalcachiy.

3Chay chuya carpap lulïninman limalicuśhá babulcäta ćhulaycuy. Jinalcul laquina curtïnacta ćhulay mana licananpä.

4Chaynütac mïsactapis cänintincunacta apaycul cällanman ćhulaycuy. Jinaman michïrucunätapis lluy cällanman ćhulaycuy.

5Insinsiu lupachicuctapis limalicuśhan babulpa chimpallanman ćhulaycuy. Curtïnactañatac Chuya Sityup puncunman ćhulay.

6Chaynütac Chuya Sityup puncuscanman cañanapä uycuna patacta ćhulaycuy.

7Chuya cuartup puncuncascamantac maqui paꞌacunacta taycaycachil yacucta ćhulaycuy. Chayurá maqui paꞌacunaca cayäla uycuna patacpawan Chuya Sityup ćhawpinćhümi.

8Jinaman chuya carpap muyülïnintapis lulaycul yaycunanman curtïnanta ćhulaycuy.

9“Chaypïta chay chuya carpacta lluy cänintinta llushiycuna asaytiwan llushiycuy. Chaynüpam lluy chayćhu cänincunactawan chuyanchaycunqui chuya-cama capäcunanpä.

10Chaynütacmi cañanapä uycuna patactapis lluy cänintinta llushiycunqui. Chaynüpaćh sumä chuya-cama capäcunꞌa.

11Chaynütacmi maqui paꞌacunactapis täcunantinta llushiycuptiqui chuya caycunꞌa.

12“Chaypïta Chuya Sityup puncunmanmi Aarontawan chulincunacta puśhaycunqui, chayćhu paꞌanayquipä.

13Jinaman chuya müdanancunawanmi Aaronta ćhulachinqui. Jinalculmi asaytiwan llushiycunqui, japächaycunqui sasirdütinu sirbimänanpä.

14Chaypïta chulincunactapis aśhuycachimulmi sasirdüti müdanancunawan ćhulaycunqui.

15Jinalcul taytantanu chuyanchaycunqui sasirdütïnu lulaycälinanpä. Chaynu llushiycuśhayquiwanmi lluy milaynincunapis wiña-wiñaypä sasirdütí caycälinꞌa” nil.

16Chaynu Tayta Dios nishantanüllamari Moises lulaycula.

17Chaynüpam chuya carpaca lulaśha cala, ishcay watäćhu, allaycuna quilläćhu, wamä muyuncäćhu.

18Chayćhümi chuya carpacta Moises śhalcachil simintuncunactapis cällanman ćhulaycula: ilucunäta śhalcachila, bärancunacta uśhtuycachila, paradïruncunactapis śhalcachilamari.

19Jinaman chuya cuartuctapis lulayculmi tïlacunawan janäninman ataycula. Chaynu lulaycula Tayta Dios nishanmannümari.

20Chaypïtam ćhuncantin camachicuyta limalicuśhan babulcäman ćhulaycula. Jinalculmi babulcäpa bärancunactapis ćhulaycula. Jananmanñatacmi täpanta ćhulaycula.

21Jinalculmi babulcäta sumä Chuya Sityuman apaycula. Chayta atajananpämi curtïnacta walcaycula. Tayta Dios nishantanüllamari lulaycula.

22Chaypïta Chuya Sityumanmi allï lädunman, laquina curtïnap luli lädunman mïsactapis apaycula.

23Chay mïsa jananmanmi tantacunätapis cällanman ćhulaycula. Chaynu Tayta Dios nishantanüllamari lulaycula.

24Chaynütacmi jatun michïructapis Chuya Sityuman ćhulaycula, mïsap chimpanman, sur läduman.

25Jinalculmi Tayta Diospa puntanćhu michïrucunäta Moises latachila. Chaynu lulaycula Tayta Dios nishannüllamari.

26Chay Chuya Sityumantacmi insinsiu cañana cä ürupi pataccätapis ćhulaycula; cuartucta laquinan curtïnap puntan lädunmanmari.

27Jinalculmi mishqui aśhnä insinsiucta lupaycachila, Tayta Dios nishannülla.

28Chaynütacmi Chuya Sityup puncunmanpis curtïnacta ćhulala.

29Jinaman Chuya Sityup yaycunan-cascamanmi uycuna pataccätapis ćhulaycula. Jinalculmi chayćhu uywacunacta cañaycapula, jinaman ćhacla micuycunactapis uycula. Chaynu lulaycula Tayta Dios nishannüllam.

30Chaynütacmi chuya cuartup yaycunanman maqui paꞌacunacta ćhulaycula. Jinalculmi chayman yacucta ćhulaycula paꞌaculcänanpä.

31Chayćhümi Moises, Aaron, lluy chulinpis maquinta, ćhaquinta paꞌaculcäla.

32Chaynümi paꞌaculcäla Chuya Sityuman yaycul ütac uycuna patacman aśhuyculpis. Chaynu lulaycälila Tayta Dios nishannüllamari.

33Chaypïtam chuya carpap jinantin muyülïninta Moises śhaycaycachila. Jinalculmi chaypa yaycunanman curtïnacta ćhulaycula. Chaynüpamá Moises lulayta camacäla.

Tayta Diospa sumä caynin chuya carpamanmi juntaycun Num 9.15-23

34Chayürallam chuya carpacta pucutay ñiticalpula; lluy-lluymanmi Tayta Diospa sumä caynin