Job 29 - Old Testament Quechua Wanca（QVW）

Imanuy puntacta cawsaśhanpïtam Job nin

1Nilculmi Job caśhanñatac nin:

2“¿Imanuypalä punta cawsaśhäcäman cutïlüman?

¿Imanuypalä Tayta Dios ñawillanćhu

caycachimäśhan muyuncunäman cutïlüman?

3Pay acchinwan acchiycamaptinmá,

tutawyaycäćhüpis acchinwan allin puliyculá.

4Chaynümari müsu caynïćhu cayculá.

Paywan tuquip apanacuśhäpamá wasintin allin caycälilá.

5Chay muyuncunäćhu Sumä Munayniyücämi yaꞌawan caycula;

chulïcunapis muyülïnïćhümi caycälila.

6May pulishäćhüpis cawsayní mishqui-mishquimá cacula.

Lichipis yacunülämá unyaycamula;

aꞌacunapïpis asayticunamá yalaycamula.

7“Yaśhacunäwan cuscalämá,

malcap puncunćhu cä juntunacuycunäćhu täcapäculäpis.

8Müsucunäpis licälälimalꞌa aśhupäculam.

Awquishcunäpis śhalcalcälilmá ćhasquipämäla.

9Allin puydïcunäpis upällacaycälilam;

maquinwanmi shimintapis chapacaycälila.

10Puydïcunaca limayalcalpis uyalacaycälilamá;

alluncunactapis caćhucaycälilmi uyalapäcula.

11“Uyalimäcunaca yaꞌapïta allintamá limapäcula;

licamäcunaca yaꞌacta altumanmi julaycapämäla.

12Wacchacunäta yaꞌa yanapayculämá;

mana taytayu-mamayücunätapis yanapayculämá.

13Pasaypi palpüśha nunacunäpis yanapäśhäpïta sulpätam upämäla;

japanyäśha walmicunäpa śhunꞌullanpis achicyalculamá.

14Tincüninman licaycuycämi müdaná cala;

allincämi capütänu caycula,

tincüninman licaycuycämi chucünu caycula.

15Aplacunäpämi ñawin yaꞌa cayculá;

wishtucunäpäñatacmi ćhaquin cayculá.

16Pishipacücunäpämi taytan cayculá;

juc malcayücunäpäñatacmi śhalcünin cayculá.

17Mana allin nunacunätañatacmi ichá

caquichcunta paquïlá;

ima waycaśhancunactapis ućhïlümi calá.

18“Yaꞌami pinsalá: ‘Aꞌucunänüćha fintaytapis mana atipana, achca-achca wata allinlla cawsaycuśhä;

yaśhayälulpis wasilläćhüćha ayllücunap lädunćhu wañucuśhä.

19Awari, yacup patanćhu cä lantanümi yaꞌa cayá;

śhullipaycäwan cä pallaycänümari cayá.

20Altuman juluycuśha cayní chaynüllamá caycunꞌa;

callpäpis manamá chincaycunꞌachu’ nilmi nilá.

21“Limapäśhäta lluymi uyaliycälimäla;

limapaycälinätamá sumä alcaycälila.

22Limapaycuptí manañamá ima ninanpis calañachu;

limapäśhäca yacunäśhaman yacu ćhäcänümari ćhaycula.

23Yacupi wañuyalcänümi limapänäta alcaycaćhayalcäla;

achachaycäćhu yacupi piswalpuyäcänümá äśhaycaćhayalcäla.

24Cuyaywan licaycuptïpis paycuna manamá awniyculachu;

cushisha caśhäcämari paycunacta cawsapacachila.

25Paycunacta yaꞌami caminayculá.

Pilyäcunap mandacünincunanümi imacunacta lulaycälinanpäpis niyculá,

llaquisha cayalcaptinpis cunsuylayculämi.